គ្រូស្វាយរៀង ពេញចិត្តការរៀបចំពានបើករដូវកាល តែស្ដាយពីរចំណុចធំៗ

2017-02-06 03:30:41
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សំ វ៉ាន់ដេត គ្រូបង្វឹកក្រុមព្រះខ័នរាជស្វាយរៀងពេញចិត្តចំពោះការរៀបចំបង្កើតព្រឹត្តិការណ៍ប្រកួតត្រៀមបើករដូវកាលថ្មី២០១៧ សម្រាប់លីគកំពូលកម្ពុជាដូចនេះពិតជាល្អមែនទែន ប៉ុន្តែលោកសោកស្ដាយលើកត្តាធំពីរ។

គ្រូបង្វឹកកម្រិត B-License រូបនេះបានឲ្យដឹងថា លោកពិតជាពេញចិត្តចំពោះការរៀបចំព្រឹត្តិការណ៍បែបនេះដែលអាចឲ្យក្រុមនីមួយៗស្វែងយល់ពីកម្រិតក្រុមរបស់ខ្លួនមុនពេលការប្រកួតផ្លូវការមកដល់។ ជាងនេះទៅទៀតវាអាចឲ្យក្រុមចូលរួមបានរៀបចំប្រព័ន្ធលេងឲ្យបានស៊ីចង្វាក់គ្នា និងកែខៃចំណុចខ្វះខាតឲ្យមកជាល្អ នៅពេលលេងលីគកំពូល។

លោកបញ្ជាក់ថា ចំពោះចំណុចគួរឲ្យសោកស្ដាយពីរនោះគឺ ក្រុមចូលរួមតិច និង កម្មវិធីប្រកួតជាប់គ្នាពេក។ ការរៀបចំឲ្យមានការប្រកួតជាប់ៗគ្នាពេកអាចឲ្យកីឡាករមានបញ្ហារបួស ខណៈចំនួនក្រុមចូលរួមតិចដែលធ្វើឲ្យមានការប្រកួតប្រជែងតិចដូចដែរ។

សូមបញ្ជាក់ថា ការប្រកួតពានរង្វាន់ត្រៀមបើករដូវកាលឆ្នាំ២០១៧នេះ មាន៤ក្រុមចូលរួម និងមានរយៈពេលប្រកួតចន្លោះពីថ្ងៃទី១ ដល់ទី៥ ខែកុម្ភៈ ដែលក្រុមជើងឯកបានទៅក្រសួងការពារជាតិ យកឈ្នះព្រះខ័នរាជស្វាយរៀងដោយបាល់ប៉េណាល់ទី ៥-៣ ក្រោយស្មើគ្នា ១-១ ៕