ក្រោយរងការព្យួរពី NOCC ខេមរៈសហព័ន្ធយូដូ យល់ព្រមកែទម្រង់ឡើងវិញ

2017-02-09 07:39:52
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មាធិការជាតិអូឡាំពិកកម្ពុជា បានបើកកិច្ចប្រជុំកាលពីព្រឹកមិញជាមួយខេមរៈសហព័ន្ធយូដូកម្ពុជា ក្នុងគោលបំណងរៀបចំកំណែទម្រង់សាជាថ្មីក្រោយសហព័ន្ធមួយនេះត្រូវបានព្យួរសមាជិកភាព ដោយសមាជិកប្រតិបត្តិរបស់ NOCC កាលពីថ្ងៃទី២៣ ខែមករា ឆ្នាំ២០១៧ កន្លងទៅ។

សកម្មភាពប្រជុំព្រឹកមិញ

ក្រោយមានកិច្ចប្រជុំជជែកវែកញែកឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ជាមួយក្រុមការងារ និងកីឡាករខេមរៈសហព័ន្ធយូដូកម្ពុជាបានព្រមព្រៀងរៀបចំកំណែទម្រង់ថ្មីក្នុងទិសដៅ ពង្រឹងសមត្ថភាពសម្រាប់ឆ្នាំ២០២៣។ ក្នុងកិច្ចព្រមព្រៀងនេះខេមរៈសហព័ន្ធយូដូ និងគណៈកម្មាធិការជាតិអូឡាំពិកកម្ពុជា បានសម្រេចយកវេលាម៉ោង ១១ព្រឹកថ្ងៃទី១៣ ខែកុម្ភៈ សប្ដាហ៍ក្រោយ ដើម្បីប្រជុំចង្អៀតសម្រេចផែនការមេ និងសកម្មភាពកីឡាផ្សេងៗ។

ឯកឧត្ដម វ៉ាត់ ចំរើន

ឯកឧត្ដមអគ្គលេខធិការបានលើកឡើងថា កិច្ចប្រជុំនេះគោលបំណងសំខាន់គឺស្នើសុំយោបល់ឯកភាពគ្នាលើការរៀបចំយន្តការទ្រទ្រង់មួយ ដើម្បីរៀបចំមហាសន្និបាតពេញអង្គរបស់ខេមរៈសហព័ន្ធយូដូឡើងវិញ។ គណៈកម្មាធិការជាតិអូឡាំពិកបើតាមតួនាទី និងភារកិច្ចគ្មានសិទ្ធិចូលខ្លួនចូលមហាសន្និបាត ឬការរៀបចំរបស់សហព័ន្ធនោះទេ។

ឯកឧត្តមបន្ថែមថា ដោយសារឆ្នាំ២០២៣ កម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម ដូច្នេះ NOCC ត្រូវរៀបចំកំណែទម្រង់រាល់សហព័ន្ធដែលគ្មានការរីកចំរើនឲ្យងាកមកមានចលនាកីឡាខ្លាំងគឺជាទិសដៅផែនការមេរបស់ស៊ីហ្គេម។ រាល់សហព័ន្ធដែលមានបញ្ហាផ្ទៃក្នុង មិនព្រមដោះស្រាយក្រសួងអប់រំយុវជន និងកីឡាបានផ្ដល់សិទ្ធជូន NOCC ចូលខ្លួនដោះស្រាយត្រឹមដើមឆ្នាំ២០១៧ ឲ្យបានរួចរាល់ទាំងស្រុង។

ឯកឧត្តមអគ្គលេខាធិការរូបនេះបញ្ជាក់ថា ត្រឹមឆ្នាំ២០១៧ នេះតទៅគ្រប់សហព័ន្ធត្រូវបណ្ដុះធនធានកីឡាករល្អឲ្យបានច្រើន។ ប្រសិនបើត្រឹមឆ្នាំ២០២០ មានប្រភេទកីឡាណាមួយដែល NOCC មើលឃើញថា គ្មានការរីកចំរើន ឬគ្មានកីឡាករល្អ និងមិនសង្ឃឹមទទួលបានមេដាយនឹងដកសិទ្ធិចូលរួមប្រភេទកីឡានោះចេញពីស៊ីហ្គេមឆ្នាំ២០២៣។

ឯកឧត្ដម អ៊ុក សិទ្ធិជាតិ

ខេមរៈសហព័ន្ធកីឡាយូដូកម្ពុជាត្រូវបានសមាជិកប្រតិបត្តិគណៈកម្មាធិការជាតិអូឡាំពិកកម្ពុជាសម្រេចព្យួរដោយបញ្ហាផ្ទៃក្នុង។ គណៈកម្មាធិការជាតិអូឡាំពិកកម្ពុជាវាយតម្លៃគ្រប់សហព័ន្ធចំនួន ៣ ប្រភេទគឺទី១ សហព័ន្ធមានអង្គរដ្ឋបាលល្អ (មានកិច្ចប្រជុំច្បាស់លាស់ មានសកម្មភាពកីឡាល្អ មានការប្រកួតថ្នាក់ជាតិទៀងទាត់ និងមានសកម្មភាពហ្វឹកហាត់ក្លឹបច្រើន) ទី២ សហព័ន្ធមានរដ្ឋបាលមិនរឹងមាំ (សហព័ន្ធដែលមួយឆ្នាំមានសកម្មភាពកីឡាម្ដង ឬមួយឆ្នាំប្រជុំម្ដង) និងទី៣ សហព័ន្ធមានតែឈ្មោះ (គ្មានសកម្មភាពកីឡាអ្វីសោះ)៕