ស៊ុម វណ្ណា បង្ហាញ Top4 លីគកំពូលឆ្នាំនេះ តែមិនមានក្រុមខ្លាំងមួយ

2017-02-17 06:55:21
ចំនួនមតិ 0 | ចំនួនចែករំលែក 0

ចន្លោះមិនឃើញ

“សម្រាប់ខ្ញុំ ក្រុមដែលរំពឹងថាអាចជាប់ក្នុង Top4 ក្នុងលីគកំពូលកម្ពុជារដូវកាលនេះ មានដូចជា ក្រសួងការពារជាតិ ណាហ្គាវើល ព្រះខ័នរាជស្វាយរៀង និងបឹងកេតអង្គរ”។ សម្ដីរបស់លោក ស៊ុម វណ្ណា គ្រូបង្វឹកក្លឹបវេស្ទើនភ្នំពេញ។

លោក ស៊ុម វណ្ណ

ក្លឹបវេស្ទើនភ្នំពេញបានត្រៀមខ្លួនរួចជាស្រេចហើយសម្រាប់លីគកំពូលរដូវកាលនេះ ដោយពួកគេរំពឹងត្រឹមយក Top5 ប៉ុណ្ណោះ។ ខណៈដែលការរំពឹងនេះ ដោយសារតែក្រុមមួយនេះបានរៀបចំខ្លួនរួចជាស្រេចហើយ ដោយបាននាំយកកីឡាករបរទេសនិងក្នុងស្រុកល្អៗជាច្រើនមកពង្រឹងក្រុម។ មួយវិញទៀត ពួកគេក៏បានលើកទឹកចិត្តកីឡាករច្រើនផងដែរ ក៏ដូចជាមានការហ្វឹកហាត់ខ្លាំងសឹងតែទ្វេដងពីរដូវកាលមុន ក្រោយពីតែងតាំងលោក ស៊ុម វណ្ណា មកធ្វើជាគ្រូបង្គោល។

ក្នុងឱកាសបើកសន្និសីទមុនលីគកំពូលចាប់ផ្ដើមនៅចុងសប្ដាហ៍នេះ លោក ស៊ុម វណ្ណា បញ្ជាក់ពីគោលចំហរបស់ខ្លួនគឺមិនឱ្យក្រុមផ្សេងស៊ីដោយស្រួលៗនោះទេ។ មួយវិញគោលដៅសម្រាប់រដូវកាលដំបូងរបស់គ្រូបង្វឹករូបនេះគឺធ្វើយ៉ាងណាឱ្យវេស្ទើនជាប់ក្នុង Top5 ឱ្យបាន ដើម្បីស្ដាប្រជាប្រិយភាពនិងឱ្យដៃគូសហការទាំងអស់សប្បាយចិត្ត។

មួយវិញទៀតសម្រាប់ការប្រជែងយក Top4 រដូវកាលនេះវិញ អតីតគ្រូបង្វឹករបស់ស៊ីម៉ាក់ខាងលើនេះបានព្យាករណ៍ថាអាចនឹងមាន ក្រសួងការពារជាតិ ណាហ្គាវើល ព្រះខ័នរាជស្វាយរៀង និងក្រុមបឹងកេតអង្គរ។ ដោយមិនមានវត្តមានរបស់ក្រុមខ្លាំងនៅកម្ពុជា ភ្នំពេញក្រោននោះទេសម្រាប់រដូវកាលនេះ។ យ៉ាងណាមិញ លោកបានបន្ថែមដែរថា ការព្យាករណ៍នេះអាចនឹងប្រែប្រួលបាន ប្រសិនណាបើក្លឹបខ្លាំងអស់នេះ មានរបួសកីឡាករសំខាន់ៗច្រើននោះ។

សម្រាប់ការប្រកួតបើកឆាកលីគកំពូលរដូវកាលនេះ ក្រុមវេស្ទើនភ្នំពេញនឹងបើកកីឡដ្ឋានរបស់ខ្លួនស្វាគមន៍ក្រុមភ្ញៀវប៉ូលិស នៅថ្ងៃអាទិត្យនេះវេលាម៉ោង ៣:០០នាទីរសៀល៕

អត្ថបទ៖ មុន្នីរម្យ