ជំងឺធ្វើទុក្ខឡើងវិញ អាជ្ញាកណ្តាល ជ័យ ប៊ុនឈឿ និយាយទាំងអស់សង្ឃឹម

2017-02-21 03:42:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលនេះអាការៈជំងឺមហារីកសាច់ដុំជើងរបស់តាព្រឹទ្ធាចារ្យអាជ្ញាកណ្តាល ជ័យ ប៊ុនឈឿ បានធ្វើទុក្ខខ្លាំងឡើងវិញ បន្ទាប់ពីជាសះស្បើយម្តងហើយកាលពីដើមឆ្នាំ២០១៦កន្លងទៅ។ យ៉ាងណាលើកនេះក្រុមគ្រួសារលោកគ្រូគ្មានលទ្ធភាពដើម្បីនាំយកទៅព្យាបាលនៅមន្ទីរពេទ្យឡើយ។

លោកតា ជ័យ ប៊ុនឈឿ

កាលពីជាងមួយឆ្នាំមុន លោកតា ជ័យ ប៊ុនឈឿបានទៅព្យាបាលនៅមន្ទីរពេទ្យខ្មែរ-សូវៀតដែលមានលោកជំទាវ ហ៊ុន ម៉ាណាចេញថ្លៃព្យាបាលរហូតដល់ជាសះស្បើយ។ ក្រោយជាសះស្បើយលោកគ្រូក៏បានវិលត្រឡប់មកធ្វើអាជ្ញាកណ្តាលម្តងទៀត ហើយបានមួយរយៈពេលខ្លីក៏បានឈប់សម្រាក។ នៅចុងឆ្នាំ២០១៦កន្លងទៅនេះអាការៈជំងឺក៏បានចាប់ធ្វើទុក្ខឡើងវិញដោយអាការៈធ្ងន់ធ្ងរជាងលើកមុន។

ក្រុមការងារ Sabay បានទៅជួបលោកតាជ័យ ប៊ុនឈឿ ដល់ផ្ទះទេវតាដែលជាអំណោយរបស់លោកជំទាវ ហ៊ុន ម៉ាណាកាលថ្ងៃចុងសប្តាហ៍កន្លងទៅនេះ។ ក្នុងអាការៈឈឺចាប់ខ្លាំងលោកគ្រូបានរៀបរាប់ទាំងអស់សង្ឃឹមហាក់ដូចជារង់ចាំថ្ងៃចុងក្រោយនៃជីវិត និងឆ្ងល់ថា ហេតុអ្វីបានជាលោកកើតមានអាការៈជំងឺខុសគេ។

លោកគ្រូតាអាជ្ញាកណ្តាល ជ័យ ប៊ុនឈឿប្រាប់ថា អាការៈជំងឺមហារីកសាច់ដុំភ្លៅធ្វើទុក្ខឡើងវិញរយៈពេលប្រហែលជា៤ខែហើយ។ លើកនេះអាការៈធ្ងន់ធ្ងរជាងលើកមុនដោយភ្លៅកាន់តែរីកធំជាលំដាប់ ឈឺចាប់កាន់តែខ្លាំង ដើរមិនរួច និងអង្គុយក៏មិនបាន។ ក្រោយធ្វើទុក្ខឡើងវិញប្រហែលជា៤ខែមកនេះ លោកគ្រូមិនបានទៅមន្ទីរពេទ្យម្តងណាឡើយដោយសារគ្មានប្រាក់។ សូម្បីតែនៅផ្ទះក៏គ្មានថ្នាំព្យាបាលឡើយពោលគឺបានត្រឹមតែលេបថ្នាំបំបាត់ការឈឺចុចចាប់ម្តម្កាលប៉ុណ្ណោះ។

អតីតអាជ្ញាកណ្តាលប្រដាល់ដ៏ល្បីរូបនេះបន្តថា អាការៈជំងឺលើកនេះលោកមិនបានផ្តល់ដំណឹង ឬផ្សព្វផ្សាយទៅនរណាម្នាក់ដើម្បីឲ្យជួយដល់ការព្យាបាលលោកទៀតឡើយ។ លោកហាក់ខ្លាចចិត្តគេដោយសារកន្លងមកមានគេជួយលោកច្រើនណាស់ជាពិសេសគឺលោកជំទាវ ហ៊ុន ម៉ាណា តែម្តងដែលបានជួយចេញថ្លៃព្យាបាលរហូតជាសះស្បើយកាលពីដើមឆ្នាំ២០១៦។

ទោះបីជាយ៉ាងណាក្រុមគ្រួសាររបស់លោកចង់យកលោកទៅពិនិត្យ និងព្យាបាលទៀតណាស់ ប៉ុន្តែគ្មានលទ្ធផល។ ក្រុមគ្រួសារបានអំពាវដល់សប្បុរសជនសូមជួយលោកគ្រូតា ជ័យ ប៊ុនឈឿដើម្បីបានទៅព្យាបាលនៅមន្ទីរពេទ្យផង៕