មានស្ត្រីម្នាក់ទៀតចោទ សុគន្ធ ធារ៉ាត់ ខ្ចីលុយទិញឡានមិនព្រមសង

2017-02-21 03:43:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗកន្លងទៅ តារាចម្រៀងលោក សុគន្ធ ធារ៉ាត់ ត្រូវបានស្ត្រីម្នាក់ឈ្មោះកញ្ញា ស៊ុន សុវណ្ណធារី ចោទប្រកាន់ថាបានខ្ចីប្រាក់១០០ដុល្លារមិនព្រមសង រឿងនោះដោះស្រាយមិនទាន់ចប់ស្រួលបួលផង ស្រាប់តែមានស្ត្រីម្នាក់ទៀតឈ្មោះ នួន ស្រីទូច ហៅ Bini Ta អះអាងថា ជាសង្សារចាស់ ចោទតារារូបនេះ បានខ្ចីប្រាក់ខ្លួនរហូតដល់ទៅជិត ៥០០០ ដុល្លារ ដើម្បីយកទៅទិញរថយន្ត Porsche ដែលកំពុងជិះរាល់ថ្ងៃ មិនព្រមសង។

នួន ស្រីទូច ហៅ Bini Ta បានប្រាប់Sabay ដោយហ៊ានទទួលខុសត្រូវតាមផ្លូវច្បាប់ ប្រសិនបើ លោក សុគន្ធ ធារ៉ាត់ ហ៊ានចេញមុខមកតតាំងនោះ។ នាងបានរៀបរាប់ថា លោក សុគន្ធ ធារ៉ាត់ បានខ្ចីប្រាក់ខ្លួនជាង១ឆ្នាំហើយ កាលនៅជាសង្សារនឹងគ្នា ការខ្ចីនោះមានចំនួន ៥០០០ដុល្លារ ដោយយកទៅទិញរថយន្តPorsche ដែលកំពុងជិះរាល់ថ្ងៃ។

នាងបានបន្តឲ្យដឹងថា រថយន្ត Porsche ដែលលោក សុគន្ធ ធារ៉ាត់ តែងអួតប្រាប់គេឯងថា ជាម៉ូដែលPorsche Factory Sport 2009 តម្លៃជិត៧ម៉ឺនដុល្លារ មិនមែនជាការពិតឡើយ ។ រថយន្តនោះបានទិញពីតារាជើងចាស់ម្នាក់ តម្លៃត្រឹមតែ៤៨០០ដុល្លារប៉ុណ្ណោះ ដោយយកមកកែ មិនមានពន្ធឡើយ។

ការរៀបរាប់ឆ្លងឆ្លើយរវាង នួន ស្រីទូច និង សុគន្ធ ធារ៉ាត់៖

ស្ត្រីវ័យ២៤ឆ្នាំមានកំណើតមកពីខេត្តព្រៃវែងដដែល បានរៀបរាប់ឲ្យដឹងទៀតថា ខ្លួននិងលោក សុគន្ធ ធារ៉ាត់ ស្គាល់គ្នាជាង៣ឆ្នាំមកហើយ ក្នុងនោះចាស់ទុំទាំងសង្ខាងក៏បានដឹងឮផងដែរ ជាហេតុធ្វើឲ្យទុកចិត្តសម្រេចឲ្យខ្ចីប្រាក់ទិញរថយន្ត ព្រោះគិតថា មុននិងក្រោយគង់តែក្លាយជាប្ដីប្រពន្ធនឹងគ្នា។

ដោយសារតែលួចមានស្រីខាងក្រៅ Bini Ta តាមទាន់ជាក់ស្ដែង២លើក ជាហេតុធ្វើឲ្យអ្នកទាំង២សម្រេចចែកផ្លូវគ្នា ។ បន្ទាប់មក នាងទារប្រាក់នោះមកវិញ ប៉ុន្តែ លោក សុគន្ធ ធារ៉ាត់ មិនព្រមសងវិញឡើយ ដោយនិយាយថា លុយទិញឡាននោះ មិនបានខ្ចីទៅវិញ។

Bini Ta ទទួលស្គាល់ថា ការខ្ចីនោះ ពិតជាមិនមានលិខិតស្នាមឡើយ ព្រោះដូចបានរៀបរាប់ខាងលើ នាក់ទាំងពីរគឺជាសង្សារនឹងគ្នា គ្រោងនឹងរៀបការជាមួយគ្នា ដូច្នេះទើបមិនបានធ្វើលិខិតស្នាម។

Bini Ta មិនសង្ឃឹមថា ខ្លួនអាចទារប្រាក់ពី លោក សុគន្ធ ធារ៉ាត់ បានមកវិញឡើយ គ្រាន់តែនាងចង់បង្ហាញឲ្យមហាជនដឹង ចរិតពិតរបស់តារាចម្រៀងរូបនេះតែប៉ុណ្ណោះ និងចង់ឲ្យខាងពន្ធដារ តាមចាប់រថយន្តដែលកំពុងជិះរាល់ថ្ងៃ។

ជុំវិញការចោទប្រកាន់នេះ លោក សុគន្ធ ធារ៉ាត់ បានបដិសេធទាំងស្រុង ដោយលោកលើកឡើងថា គ្មានភស្តុតាងណាដែលបញ្ជាក់ថា រថយន្តនោះជារបស់ កញ្ញា Bini Ta ព្រោះអី រថយន្តនោះទិញបានដាក់ឈ្មោះលោកផ្ទាល់ មានឯកសារត្រឹមត្រូវ មិនបានខ្ចីប្រាក់ពី កញ្ញា Bini Ta សូម្បីតែ១រៀល។

ចំពោះរថយន្តPorsche Factory Sport 2009 ដែលអះអាងថា ទិញតម្លៃជិត៧ម៉ឺនដុល្លារ លោក សុគន្ធ រ៉ាត់ បានប្រាក់ថា ខ្លួនបានទិញពីមេទាហាន ពាក់ផ្កាយ៤ម្នាក់សូមមិនបញ្ចេញឈ្មោះ។

លោក សុគន្ធ ធារ៉ាត់ បានចាត់ទុកថា ទាំងកញ្ញា Bini Ta និង កញ្ញា ស៊ុន សុវណ្ណធារី កំពុងតែតាមរករឿងខ្លួន ប៉ុន្តែលោកមិនខ្វល់ឡើយ ប្រសិនបើចង់តតាំងតាមផ្លូវច្បាប់លោកស្វាគមន៍ជានិច្ច៕

អត្ថបទ៖ ខុត សីហា