ដឹងអាជ្ញាកណ្ដាលនៅលីគកម្ពុជាមានប៉ុន្មាននាក់ និងបានប្រាក់ប៉ុន្មាន១ប្រកួត?

2017-03-01 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាកណ្ដាលកាត់ក្ដីលើទីលានបាល់ទាត់កម្ពុជា មានផលវិបាកច្រើនរាប់មិនអស់ ជារឿយៗតែងរងការរិះគន់ពីអ្នកទស្សនា ឬកីឡាករជាដើមថា កាត់ក្ដីមិនបានត្រឹមត្រូវ តែចំណូលវិញតិចចាយមិនគ្រប់។ នេះជាការឲ្យដឹងពីលោក ទុយ វិច្ឆិកា ប្រធានការិយាល័យអាជ្ញាកណ្ដាលរបស់សហព័ន្ធបាល់ទាត់កម្ពុជា (FFC)។

លោក ទុយ វិច្ឆិកា

បុរសដែលប្រកាសឈប់កាត់ក្ដីលើទីលានរូបនេះបានឲ្យដឹងថា បច្ចុប្បន្នអាជ្ញាកណ្ដាលដែលអាចកាត់ក្ដីក្នុងលីគកំពូលកម្ពុជាមានចំនួនតែ ១០នាក់ប៉ុណ្ណោះ។ ក្នុងនោះមាន ៣នាក់ដែលទទួលបានឱកាសកាត់ក្ដីលើទីលានចន្លោះពី ៣-៤ ប្រកួតក្នុងមួយឆ្នាំ ដោយសារកម្រិតកាត់ក្ដីនៅទាប។

លោកបន្ថែមថា ៧នាក់ទៀតអាចទទួលបានការកាត់ក្ដីលើទីលានចន្លោះពី ១៤ -១៥ ប្រកួតក្នុងមួយឆ្នាំ។ ចំពោះចំណូលវិញលីគកំពូលកម្ពុជាទទួលបាន ៥០ ដុល្លារអាមេរិកក្នុងមួយប្រកួត ហើយយ៉ាងច្រើនបំផុតទទួលបានការកាត់ក្ដីត្រឹម ៤ ដងក្នុងមួយខែ ដែលគិតជាមធ្យមទទួលបាន ២០០ ដុល្លារអាមេរិកក្នុងមួយខែ។

អាជ្ញាកណ្ដាលកម្រិត FIFA រូបនេះបញ្ជាក់ទៀតថា បើនិយាយពីរការហ្វឹកហាត់វិញ ហាត់យ៉ាងចិត ៣ដងក្នុងមួយសប្ដាហ៍ ដើម្បីបង្ការមិនឲ្យរមូលក្រពើ។ ជាងនេះទៅទៀតគ្មានប្រាក់ខែពីការធ្វើអាជ្ញាកណ្ដាលនេះឡើយ។

បច្ចុប្បន្នអាជ្ញាកណ្ដាលដែលអាចកាត់ក្ដីលើទីលានបញ្ជាការប្រកួតក្របខ័ណ្ឌលីគកំពូលកម្ពុជារួមមានលោក ជី សាមឌី, ឃួន វិរៈ, ស៊ាំង សុភ័គ, ថោង ច័ន្ទកិត្យា, អឿន សំរឹទ្ធ, ជួប ស៊ីពិសាល, ប្រាក់ ព្រហស្បវិសា, រតនា សុយុទ្ធត្រា, រិទ្ធ វីណូតា (កម្រិតកាត់ក្ដីនៅទាប) និង ស ជួបវាសនា (កម្រិតកាត់ក្ដីនៅទាប)៕

អត្ថបទ៖ ស្រី សុវណ្ណដារ៉ា