ស៊ីម៉ាក់ រំពឹងអាចគេចផុតតំបន់កាត់ចោល ទោះឆ្នាំនេះក្រុមខ្លាំងច្រើនក៏ដោយ

2017-03-16 03:00:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់មជ្ឈមណ្ឌលកំចាត់មីនកម្ពុជា ហៅកាត់ ស៊ីម៉ាក់ មានក្ដីរំពឹងខ្ពស់ថានឹងអាចគេចផុតពីតំបន់កាត់ចោលក្នុងការប្រកួតពានរង្វាន់លីគកំពូលកម្ពុជាឆ្នាំនេះ បើទោះជាពួកគេចាប់ផ្ដើមរដូវកាលមិនទាន់បានល្អខ្លាំងក៏ដោយ។

លោក កែវ សារិន គ្រូបង្វឹកក្រុមស៊ីម៉ាក់ បានបង្ហើបថាក្រុមរបស់លោកកំពុងតែមានបញ្ហាបន្តិចបន្តួចជាមួយកីឡាករបរទេស ដោយសារតែពួកគេមិនទាន់យល់ច្បាស់ពីក្បួនលេងនិងអ្វីដែលលោកចង់បាន។ យ៉ាងណាមិញ អ្វីគ្រប់យ៉ាងនឹងត្រលប់មកជាល្អវិញ ក្រោយពីធ្វើការហ្វឹកហាត់ប៉ុន្មានសប្ដាហ៍ទៀត។ លោក បន្តថានៅរដូវកាលនេះ ក្រុមទាំង១២នៅលីគកម្ពុជា សុទ្ធតែបានត្រៀមខ្លួនយ៉ាងល្អ និងមានកីឡាករល្អៗច្រើនជាពិសេសបរទេសតែម្ដង។ ដោយនេះអាចបញ្ជាក់ថាក្រុមទាំងអស់ មិនអាចមើលស្រាលបានឡើយ ពោលគឺក្រុមខ្លាំងមិនប្រាកដថាឈ្នះក្រុមខ្សោយ ១០០%នោះទេ។

លោក កែវ សារិន គ្រូបង្វឹកក្រុមស៊ីម៉ាក់

ទន្ទឹមគ្នានេះដែរ លោក កែវ សារិន បានបញ្ជាក់ថាក្រុមរបស់លោកនឹងមិនកសាងប្រវត្តិដដែលដូចឆ្នាំមុននោះទេ ពោលគឺឆ្នាំនេះធ្វើយ៉ាងណាឱ្យបានគេចផុតតំបន់កាត់ចោល ធ្លាក់ទៅលេងលីគទី២។ ខណៈដែលតាមគម្រោង ប្រធានក្លឹបនឹងស្វែងរកកីឡាករបរទេសបន្ថែមទៀតនៅជើងទី២ ដើម្បីបំពេញចំណុចខ្វះខាតក្នុងក្រុម។

ស៊ីម៉ាក់ ឆ្លងកាត់៤ប្រកួតកន្លងមកនេះ ទើបតែទទួលបាន២ពិន្ទុប៉ុណ្ណោះ ដោយស្មើ២និងចាញ់២ប្រកួត។ ២ប្រកួតដែលពួកគេស្មើនោះ គឺស្មើប៉ូលិស ១-១ និងស្មើ Cambodian Tiger ១-១៕

អត្ថបទ៖ មុន្នីរម្យ