ពីជិះម៉ូតូកូនទា ឃុន វុត្ថា ប្រឹងសន្សំបានទិញឡានជិះហើយ

2017-03-21 23:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតបេក្ខភាព The Voice Cambodia រដូវកាលទី១ ឃុន វុត្ថា បានទម្លាយការឆ្លងកាត់រឿងរ៉ាវមួយចំនួនក្នុងវិថីសិល្បៈ ដែលក្នុងនោះលោកបានជម្នះផ្លាស់ប្តូរពីការជិះម៉ូតូកូនទា មកជិះឡាន Camry Balen វិញម្តង។

ដំបូងឡើយកាលឡើងមកភ្នំពេញដំបូងលោកជិះម៉ូតូកូនទា រយៈពេលយូរគួរសមទាល់តែប្រឡងកម្មវិធី The Voice Cambodia រដូវកាលទី១ចប់បានកន្លះឆ្នាំ ទើបមានឱកាសសន្សំថវិកាទិញឡានជិះ។ មិនតែប៉ុណ្ណោះតារាចម្រៀងមកពីខេត្តព្រៃវែងរូបនេះ អះអាងទៀតថាលោកនៅតែមិនភ្លេចគុណសិល្បៈដែលជួយលោកមកដល់ថ្ងៃនេះ។ ចំណូលពីសិល្បៈពេលនេះ លោកកំពុងតែសន្សំថវិកាខ្លះទុកសម្រាប់ទិញផ្ទះដោយសារពេលនេះកំពុងនៅផ្ទះជួលនៅឡើយ។ ម្យ៉ាងត្រូវរ៉ាប់រងគ្រួសារទៀត ដែលសព្វថ្ងៃលោកត្រូវចំណាយប្រហែល ៦០០ទៅ៧០០ដុល្លារក្នុងមួយខែ។

"រាល់ពេលបើកប្រាក់ខែ ខ្ញុំតែងផ្ញើជូនម្ដាយជានិច្ច ចំណូលពីសិល្បៈបានគួរសមដែរ ណាមួយឥឡូវរៀងស្ងាត់បន្តិច តែយ៉ាងណានៅមានប្រាក់ខែពីហាងដែលខ្ញុំច្រៀងរាល់យប់ គ្រាន់បានជួយផ្គត់ផ្គង់ជីវភាពដែរបង"។ វុត្ថា ថ្លែង។

សម្រាប់ការងារសិល្បៈមួយរយៈនេះ ឃុន វុត្ថា ប្រាប់ថាស្ងប់ស្ងាត់បន្តិច ប៉ុន្តែលោកក៏មានត្រៀមបទថ្មីក្នុងឱកាសបុណ្យចូលឆ្នាំប្រពៃណីជាតិខាងមុខ ២បទដែរ។ សព្វថ្ងៃ ឃុន វុត្ថា ប្រាប់ថាច្រៀងនៅ វីហ្វ្រេនបឹងត្របែក ចាប់ពីថ្ងៃច័ន្ទ ដល់សុក្រ និងនៅ Les Cocktails ចាប់ពីថ្ងៃ សុក្រ ដល់អាទិត្យ៕

អត្ថបទ៖ ថា ម៉ាលីដា