Ranieri ជាបេក្ខភាព អាចនឹងឡើងដឹកនាំក្រុមជម្រើសជាតិថៃ

2017-04-04 04:49:07
ចំនួនមតិ 0 | ចំនួនចែករំលែក 0

ចន្លោះមិនឃើញ

Claudio Ranieri អតីតអ្នកចាត់ការក្រុម Leicester City គឺជាបេក្ខភាពមួយរូប ក្នុងចំណោមបេក្ខភាពច្រើននាក់ទៀត ដែលអាចនឹងឡើងដឹកនាំក្រុមជម្រើសជាតិថៃ ជំនួសតំណែងលោក Kiatisuk Senamuang ដែលបានលាលែងពីតំណែង កាលសប្ដាហ៍មុន។

វីរបុរសថៃ Senamuang ឈ្មោះក្រៅ Zico បានលាលែងពីតំណែងគ្រូបង្វឹកក្រុមជម្រើសជាតិ កាលថ្ងៃសុក្រសប្ដាហ៍មុន បន្ទាប់ពី៧ប្រកួតនៅវគ្គជម្រុះជុំទី៣ World Cup 2018 ចាញ់៦ប្រកួត និងចុងក្រោយចាញ់ជប៉ុន ៤-០ ទៀត។

លោក Ranieri ធ្លាប់ដឹកនាំក្រុមជម្រើសជាតិក្រិក និងធ្លាប់ដឹកនាំក្រុម Chelsea។ ជាពិសេសលោក បានដឹកនាំ Leicester ឲ្យលើកពាន Premier League ជាលើកដំបូងក្នុងប្រវត្តិសាស្ត្រ កាលពីរដូវកាលមុន ស្ទើរមិនគួរឲ្យជឿ។ បុរសវ័យ៦៥ឆ្នាំរូបនេះ ក៏ធ្លាប់ដឹកនាំក្រុម Leicester មកលេងមិត្តភាពទល់នឹងជម្រើសជាតិថៃ កាលឆ្នាំមុនផងដែរ មុនពេលត្រូវក្លឹបបណ្តេញចេញពីតំណែង កាលខែកុម្ភៈ ដោយសារដឹកនាំក្រុមពុំបានល្អ រដូវកាលនេះ។

ក្រៅពី Ranieri សហព័ន្ធបាល់ទាត់ថៃ កំពុងពិចារណាចង់បានលោក Alejandro Sabella អតីតគ្រូបង្វឹកក្រុមជម្រើសជាតិអាហ្សង់ទីន ដែលជួយឲ្យអាហ្សង់ទីន ឡើងដល់ផ្តាច់ព្រ័ត្រ World Cup 2014, អតីតគ្រូបង្វឹកជប៉ុន Takeshi Okada, អតីតគ្រូបង្វឹក U-23 ជប៉ុន Makoto Teguramori, អតីតគ្រូបង្វឹកចាម៉ៃកា Winfried Schäfer (ធ្លាប់ដឹកនាំថៃពីមុនដែរ), លោក Totchtawan Sripan អ្នកចាត់ការក្រុម Muangthong United និង Dragan Talajić អតីតអ្នកចាត់ការក្រុម Muangthong ផងដែរ៕

ប្រភព៖ ESPN FC ប្រែសម្រួល៖ វិន ជីវ័ន្ត