"ត្រុដិ" របាំប្រជាប្រិយ ដេញគ្រោះចង្រៃ និងសុំពរសុភមង្គលសម្រាប់ឆ្នាំថ្មី
- 2017-04-05 08:04:36
- ចំនួនមតិ 0 | ចំនួនចែករំលែក 0
"ត្រុដិ" របាំប្រជាប្រិយ ដេញគ្រោះចង្រៃ និងសុំពរសុភមង្គលសម្រាប់ឆ្នាំថ្មី
ចន្លោះមិនឃើញ
របាំត្រុដិ ជារបាំដ៏មានប្រជាប្រិយ ដែលគេនិយមលេងក្នុងពេលចូលឆ្នាំខ្មែរដើម្បីប្រសិទ្ធិ សព្វសាធុការជូនពរដល់អ្នកភូមិ អ្នកស្រុក និងបណ្ដេញគ្រោះចង្រៃពីឆ្នាំចាស់ និងនាំមកនូវភាពសម្បូរសប្បាយ សម្រាប់ឆ្នាំថ្មី។
តាមឯកសារស្ដីពីរបាំប្រជាប្រិយខ្មែររបស់ក្រុមជំនំទំនៀមទម្លាប់បានបញ្ជាក់ថា "ត្រុដិ" ជាពាក្យដើមមកពីភាសា សំស្ក្រឹត ប្រែថា ផ្ដាច់ឬកាត់ផ្ដាច់ សំដៅដល់ការផ្ដាច់ឆ្នាំចាស់ចូលទៅឆ្នាំថ្មី។
តាមរយៈការសំដែងរបាំនេះ នៅឱកាសបុណ្យចូលឆ្នាំ នៅគ្រប់ស្ថាប័ន ក្រុមហ៊ុន ឬនៅតាមស្រុកភូមិ ប្រជាពលរដ្ឋ តែងមានសេចក្ដីសប្បាយរីករាយ ព្រោះអ្នករាំរបាំត្រុដិបានចូលទៅដល់មុខផ្ទះ ក្រុមហ៊ុន ផ្ទាល់ ស្របពេលដែលពួកគេមានជំនឿថា ក្នុងឆ្នាំថ្មីសុភមង្គល លាភសក្ការៈ នឹងកើតមានឡើងក្នុងស្ថាប័ន ក្នុងស្រុក ភូមិរបស់ពួកគេជាមិនខាន។
ការសម្ដែងរបាំត្រុដិ គឺមានការរៀបចំជាលក្ខណៈសាមញ្ញ ដោយគេដង្ហែជាក្បួនទៅមុខ ដោយមានអ្នកកាន់ដងចន្ទោល ដែលមានការចងកំណាត់លម្អ និងមានសិល្បករម្នាក់ជាអ្នករាំនាំផ្លូវ។ គេអាចឃើញពិធីរាំនោះ គឺហាក់ដូចជាអ្នករាំ ឬអ្នកហែកំពុងជិះរទេះមួយ។ នៅខាងចុងនៃដងចន្ទោល គឺមានកូនថង់មួយសម្រាប់រៃអង្គាសប្រាក់ ហើយអ្នកដែលមកឈរមើលការរាំរបាំត្រុដិ នឹងមានសទ្ធាជ្រះថ្លា ពួកគេនឹងដាក់ប្រាក់ក្នុងថង់នោះ ព្រោះគេមានជំនឿថាបុណ្យកុសល ដែលបានដាក់ទាន នឹងចម្លងគ្រោះកាចចង្រៃនៃឆ្នាំចាស់ទៅបាត់អស់ ហើយចូលឆ្នាំថ្មីសិរីសួស្ដីសុភមង្គល នឹងមកដល់។
ដោយឡែក តាមទម្លាប់របស់ប្រជាជនខ្មែរក្រៅតែពីសម្ដែងរបាំនោះនៅឱកាសបុណ្យចូលឆ្នាំ ជួនកាលគេលេងរបាំនោះម្ដងៗ នៅពេលគេប្រារព្ធពិធីបន់ស្រន់សុំទឹកភ្លៀងឲ្យស្រោចស្រពពេញមួយឆ្នាំ ទៅតាមកន្លែងដែលមានការរាំងស្ងួតខ្វះទឹកភ្លៀងរយៈពេលយូរផងដែរ។
ផ្អែក លើឯកសារនៃការស្រាវជ្រាវរបស់ក្រុមជំនុំទំនៀមទម្លាប់ខ្មែរដដែល បាន លើកឡើងទៀតថា ប្រវត្តិនិងដើមកំណើតនៃរបាំត្រុដិគឺមានប្រភពច្រើន ក្នុងនោះមានប្រភពបែបរឿងនិទាន ប្រភពបែបជំនឿអ្នកស្រុកនិងប្រភព អ្នកស្រាវជ្រាវ ។
ប៉ុន្តែបើផ្អែក លើឯកសារខ្លះទៀតថា របាំត្រុដិ មានប្រវត្តិចេញពីជនជាតិដើមភាគតិចសំរ៉ែ តាំងពីយូរយារណាស់មកហើយ។ វាជាមរតកបន្តពីជំពូកជនជាតិដើមភាគតិចមួយនេះ និងជាចំណែកមួយនៃ អារ្យធម៌អំបូរ អូស្រ្តូអាស៊ីយាង ដែលបានចាប់កំណើតនៅដែនដីប្រទេស កម្ពុជាសព្វថ្ងៃ តាំងពីបុរាណកាលរាប់ពាន់ឆ្នាំមុន។ ប្រពៃណី វប្បធម៌ដ៏យូរលង់ ក៏នៅបន្តរហូតដល់សង្គមសម័យនាបច្ចុប្បន្ន របាំ ត្រុដិ តែងទទួលការពេញនិយមសម្ដែងក្នុងកម្មវិធីនានាពុនឆ្នាំថ្មីប្រពៃណីជាតិចូលមកដល់៕