សប្ដាហ៍នេះ សំ វ៉ាន់ដេត សង្ឃឹមឈ្នះទ័ពរហូត៧០%ក្រោមហេតុផល...

2017-04-21 01:29:20
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សំ វ៉ាន់ដេត គ្រូបង្វឹកក្រុមបាល់ទាត់ព្រះខ័នរាជស្វាយរៀងលើកឡើងថា ក្រុមរបស់លោកមានក្ដីរំពឹងឈ្នះទៅលើក្រុមក្រសួងការពារជាតិ (ទ័ព) រហូត៧០% នៃជំនួបចុងសប្ដាហ៍នេះក្នុងការប្រកួតលីគកំពូលកម្ពុជា ដោយលើកហេតុផលកែប្រែចំណុចខ្វះខាតបានរួចរាល់។

លោក សំ វ៉ាន់ដេត

ក្រុមព្រះខ័នរាជស្វាយរៀងបានបរាជ័យជាប់ៗគ្នាក្នុងជំនួបប៉ះទ័ព៤លើកចុងក្រោយ។ ប៉ុន្តែនាថ្ងៃទី២៣ ខែមេសា ឆ្នាំ២០១៧ នេះក្រុមទាំងពីរ នឹងប៉ះគ្នាក្នុងជំនួបជើងទី១ នៃការប្រកួតលីគកំពូលកម្ពុជាសប្ដាហ៍ទី៨នៅទីលានស្តាតចាស់វេលាម៉ោង៦:០០នាទីល្ងាច។

ទាក់ទងនឹងប្រកួតនេះគ្រូបង្វឹកខាងលើបានឲ្យដឹងថា ហេតុផលដែលលោកគិតថាអាចឈ្នះទ័ពគឺចំណុចខ្វះខាតដែលលោកមើលឃើញធ្លាប់ចាញ់ទ័ពកន្លងមកត្រូវបានកែប្រែរួចរាល់ទាំងស្រុង។ ប៉ុន្តែទោះជាបែបនេះក្ដីលោកនៅតែប្រាប់កូនក្រុម ឲ្យមានការប្រុងប្រយ័ត្នគ្រប់ពេលវេលាក្នុងកំឡុងប្រកួត ដើម្បីបិទកីឡាកររបស់ម្ចាស់ផ្ទះមិនឲ្យទាត់បញ្ចូលទីក្រុមខ្លួន។

លោកលើកឡើងទៀតថា ប្រកួតខាងមុខនេះមានបញ្ហាតិចតួចដោយសារការអវត្តមានខ្សែការពារ រស់ គង់សម្រេច និងខ្សែបម្រើ សំអឿន ពិដោរ។ ជំនួបនេះជាការប្រកួតដ៏សំខាន់បំផុត ដែលធ្វើឲ្យលោកត្រូវតែត្រៀមខ្លួនឲ្យបានល្អដល់កម្រិតខ្ពស់មួយ ដើម្បីប្រជែងយក៣ពិន្ទុពីទ័ពឲ្យបាន។

ក្រុមព្រះខ័នរាជស្វាយរៀង

ព្រះខ័នរាជស្វាយរៀង ប្រកួត៧លើកនៃក្របខណ្ឌលីគកំពូលកម្ពុជាមិនទាន់ចាញ់នោះទេ ដោយពួកគេឈ្នះ៦លើក និងស្មើមួយលើក។ បច្ចុប្បន្នក្រុមនេះកំពុងស្ថិតនៅកំពូលតារាងលីកកំពូលកម្ពុជាដោយមាន១៩ពិន្ទុ។

ចំណែកក្រសួងការពារជាតិឆ្លងកាត់៧ប្រកួតកន្លងមក ឈ្នះ៥និងស្មើ២លើកពោលគឺ មិនទាន់ស្គាល់ពាក្យបរាជ័យដូចគ្នា។ ក្រុមដែលមានលោក ទេព ឡុងរចនា ជាគ្រូបង្វឹកកំពុងស្ថិតនៅលេខ២ដោយមាន១៧ពិន្ទុ៕