រ៉ាំបូសុខចិត្តថតមិនយកប្រាក់ខែ ឲ្យតែបានចូលរួមសម្ដែងក្នុងពិភពរឿង Marvel

2017-04-27 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកSylvester Stallone នឹងបង្ហាញខ្លួនជាលើកដំបូងក្នុងពិភពរឿងរបស់ Marvel នៅក្នុងរឿង Guardians of the Galaxy Vol.2 ដែលសម្ដែងជាតួអង្គ Stakar។

លោកពិតជាពេញចិត្តនូវខ្សែរឿងនេះយ៉ាងខ្លាំង ដល់ថ្នាក់មិនចង់បានលុយថ្លៃថត ដើម្បីឲ្យតែបានចូលសម្ដែង។ តារារូបនេះយល់ថា ពិភពរឿងវីរបុរស (Super Heroes) គឺពេញនិយមយ៉ាងខ្លាំងចំពោះមនុស្សជំនាន់នេះ។

បើតាមប្រភពរបស់ Inside the Magicតារាសម្ដែងវ័យ ៧១ ឆ្នាំរូបនេះបាននិយាយក្នុងសន្និសីទរឿង GOTG Vol.2 ថា៖ "តាំងពីចាប់ផ្ដើមអាជីពសម្ដែង ខ្ញុំតែងតែចាប់អារម្មណ៍រឿងប្រភេទព្រេងនិទាន។ ដូចជារឿង "Hero with a Thousand Faces " ជាដើម។ នៅពេលដែលខ្ញុំចាប់ផ្ដើមថតរឿង Rambo ខ្ញុំចាប់ផ្ដើមយល់ថា អ្វីៗតែងតែមានការផ្លាស់ប្ដូរ។ មនុស្សជំនាន់នីមួយៗ តែងតែរកអ្វីដែលជាចំណុចសម្គាល់របស់ខ្លួន មិនថាជាវីរជនប្រចាំជំនាន់ ឫក៏រឿងព្រេងប្រចាំជំនាន់នោះទេ។ ហើយចំពោះរឿងទាំងឡាយរបស់ Marvel គឺជាព្រេងនិទានពេញនិយមសម្រាប់ជំនាន់នេះ ហើយក៏អាចសម្រាប់ជំនាន់ក្រោយផងដែរ។ នៅពេលដែលលោក Kevin បានអញ្ជើញខ្ញុំមកទីនេះ ខ្ញុំបាននិយាយថា 'វាគួរឲ្យចាប់អារម្មណ៍ណាស់ ព្រោះខ្ញុំមិនដែលធ្លាប់ថតរឿងប្រភេទនេះទេ ធ្លាប់តែថតរឿងធម្មតាៗ។ ប៉ុន្តែរឿងនេះគឺស្ថិតនៅលើអវកាសទាំងស្រុង ដែលលោក James និងស្ថាបនិករបស់ Marvel បានបង្កើតពិភពមួយ ដែលដាច់ដោយឡែកនិងខុសប្លែកពីពិភពលោកធម្មតា។' ដូច្នេះហើយទើបខ្ញុំបាននិយាយថា៖ 'បាន ចាំខ្ញុំសាកស្វែងយល់ពីវា ចូលរួមសម្ដែងក៏ដូចជាពិចារណាអំពីរឿងនេះនិងប្រមើលមើលតើអនាគតនឹងទៅជាបែបណា។' បន្ទាប់មកខ្ញុំក៏ចូលចិត្តខ្លាំង ដោយសុខចិត្តចាកចេញពីផ្ទះចោលកូនស្រីទាំង៣របស់ខ្ញុំ ព្រមទាំងដល់ថ្នាក់សុខចិត្តថតឲ្យហ្វ្រីៗមិនយកលុយទៀតផង។"