Autumn Allen ដែលអ្នកឃើញតាំងពីកុមារ ឥឡូវពេញក្រមុំនៅតែស្អាតកប់

2017-05-09 02:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តប្រហែលជានៅចាំកុមារី Autumn Allen កូនខ្មែរ-អាមេរិកាំង ដែលធ្លាប់បានធ្វើឲ្យមានចាប់អារម្មណ៍ពេលដែលនាងតែងបង្ហាញមុខចម្រៀងបទចម្រៀងជាភាសាខ្មែរ ពិសេសបទរបស់ ឱក សុគន្ធកញ្ញា។

បន្តពីនោះមក នាងរមែងមានមុខក្នុងកម្មវិធីសិល្បៈនានា។ ករណីគួរឲ្យកត់សម្គាល់មួយ គឺកើតឡើងនាដើមឆ្នាំ ២០១៥ នាថ្ងៃ "ទិវាអ្នកម្ដាយ" ដែលនាងត្រូវបានទូរទស្សន៍ក្នុងស្រុកមួយអញ្ជើញឡើងកម្មវិធីអបអរបុណ្យខាងលើ ដោយខាងកម្មវិធីប្រាប់ថា នាងនឹងបានជួបជាមួយម្ដាយដែលបែកគ្នាជាច្រើនឆ្នាំ។

ប៉ុន្តែម្ដាយដែលគេប្រាប់នោះ គឺជា រ៉ូលីន ជាអ្នកដើរតួជំនួសទៅវិញ ធ្វើឲ្យនាងខកចិត្ត ហើយប្រិយមិត្តបានរិះគន់កម្មវិធី មុនពេលភាគីទាំងពីរបានសម្រុះសម្រួលគ្នាវិញ។ បន្តមកទៀត នាងបានបង្ហាញខ្លួនចុងក្រោយមួយ ក្នុងកម្មវិធីជួបជុំជាមួយតារាសាំងហ្គាពួរ ដែលរៀបចំដោយទូរទស្សន៍ PPCTV អំឡុងចុងឆ្នាំ ២០១៥។

ចាប់តាំងពីពេលនោះមក Autumn Allen បានបាត់ខ្លួនឈឹងពីសិល្បៈ មិនដឹងថាបច្ចុប្បន្ននាងនៅក្នុងស្រុក ឬប្រទេសណា និងកំពុងធ្វើអ្វីឡើយ ខណៈការព្យាយាមសាកសួរនាងតាមរយៈ Chat មិនទាន់ទទួលផ្លែផ្កា ដោយនាងបានឃើញ ប៉ុន្តែមិនទាន់ឆ្លើយតប។

យ៉ាងណាក៏ដោយ នៅលើបណ្ដាញសង្គមរបស់នាង គេនៅឃើញមានរូបភាពនាងថ្មីខ្លះៗ ត្រូវបានបង្ហោះចែកជូនអ្នកគាំទ្រទស្សនា ដែលតាមរយៈរូបភាពតិចតួចនោះ បង្ហាញថា ពេលនេះនាងពេញក្រមុំហើយ ហើយសម្រស់ក៏រឹតតែស្អាតថែមទៀតផង។

Autumn Allen គឺជាកូនខ្មែរ-អាមេរិកាំង ដោយម្ដាយជាជនជាតិអាមេរិក ឪពុកជាជនខ្មែរ។ Autumn បានមករស់នៅក្នុងប្រទេសកម្ពុជាជាមួយឪពុកតាំងអាយុ ៦ឆ្នាំ ឯម្ដាយរស់នៅសហរដ្ឋអាមេរិក។ កុមារីរូបនេះ ប្រាប់សារព័ត៌មានថា តាំងពីបែកម្ដាយមក នាងមិនដែលបានជួបម្ដាយជាថ្មីទេ៕