ដឹងសកម្មភាពចុងក្រោយរបស់លោកតា ជ័យ ប៊ុនឈឿ រឹតតែធ្វើឲ្យអ្នកកីឡាខ្លោចចិត្ត...

2017-05-12 03:08:26
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតលោកព្រឹទ្ធាចារ្យអាជ្ញាកណ្តាលដ៏ល្បីល្បាញក្នុងពិភពប្រដាល់គុនខ្មែរ ជ័យ ប៊ុនឈឿ បានទទួលមរណភាពកាលពីយប់មិញក្នុងវ័យ៧២ឆ្នាំនៅផ្ទះរបស់លោកឯខេត្តបាត់ដំបង បន្ទាប់ពីអាការៈជំងឺមហារីកសាច់ដុំជើងបានធ្វើទុក្ខខ្លាំងឡើងវិញ ក្រោយជាសះស្បើយម្តងហើយកាលពីដើមឆ្នាំ២០១៦។

អាការៈជំងឺធ្វើទុក្ខឡើងវិញកាលពីចុងឆ្នាំ២០១៦កន្លងទៅនេះ ក្រុមគ្រួសារលោកគ្រូគ្មានលទ្ធភាពដើម្បីនាំយកទៅព្យាបាលនៅមន្ទីរពេទ្យឡើយ។ លោកគ្រូបានដេកឈឺលើកន្ទេលក្នុងផ្ទះដើរក៏មិនរួច ឈរក៏មិនបាន សូម្បីតែអង្គុយក៏មិនកើត។ អស់រយៈពេលជាច្រើនខែពោលគឺតាំងពីចុងឆ្នាំ២០១៦មក អារម្មណ៍របស់លោកគ្រូមិនបានគិតទៅណាឆ្ងាយក្រៅពីរង្វង់កីឡាប្រដាល់គុនខ្មែរឡើយ។

ក្រុមការងារ Sabay បានទៅសួរសុខទុក្ខលោកគ្រូ ជ័យ ប៊ុនឈឿ នៅផ្ទះរបស់លោកក្នុងខេត្តបាត់ដំបងកាលពីខែកុម្ភៈ ឆ្នាំ២០១៧កន្លងទៅនេះ។ លោកគ្រូបានរៀបរាប់ទាំងអួលដើមកថា រាល់ថ្ងៃនេះលោកគ្រូពិតជានឹកសង្វៀនប្រដាល់ខ្លាំងណាស់។ លោកគ្រូចង់ឃើញសង្វៀនប្រដាល់គុនខ្មែររាល់ថ្ងៃសម្រាប់ជីវិតចុងក្រោយ។ ពេលលោកគ្រូឈឺដេកលើកន្ទេលដែលមិនអាចធ្វើដំណើរទៅណាមកណាបាន លោកគ្រូបើកមើលកម្មវិធីប្រដាល់រាល់ថ្ងៃ។ រាល់ពេលដែលកម្មវិធីប្រដាល់នៅតាមកញ្ចក់ទូរទស្សន៍មិនថាផ្សាយផ្ទាល់ ឬចាក់ផ្សាយឡើងវិញ ថ្ងៃចុងសប្តាហ៍ ឬក៏ថ្ងៃធម្មតាឡើយឲ្យតែមានកម្មវិធីប្រដាល់ លោកគ្រូតែងតែបើកមើលរហូតដោយមិនឲ្យកូនចៅណាម្នាក់បើកមើលកម្មវិធីអ្វីផ្សេងឡើយ។

អ្នកស្រី ឈឿ សុធារី កូនស្រីទី២របស់លោកព្រឹទ្ធាចារ្យ ជ័យ ប៊ុនឈឿ បានបញ្ជាក់ថា ឪពុករបស់គាត់ពេលធ្លាក់ខ្លួនឈឺដើរទៅណាមិនរួចហើយក៏ដោយ ក៏អារម្មណ៍របស់គាត់ដិតដាមជាប់នឹងកីឡាប្រដាល់គ្រប់វិនាទី។ ឪពុករបស់គាត់ពិតជានឹកសង្វៀនប្រដាល់ខ្លាំងណាស់។ ដូច្នេះហើយទើបក្រោយជាសះស្បើយម្តងកាលពីដើមឆ្នាំ២០១៦ គាត់សុខចិត្តចូលធ្វើអាជ្ញាកណ្តាលសាថ្មី ប៉ុន្តែអាការៈជំងឺបានរើឡើងវិញហើយក៏ឈប់តែម្តង។

លោកគ្រូ ជ័យ ប៊ុនឈឿ និងភរិយា

ដើមឆ្នាំ២០១៦ លោកតា ជ័យ ប៊ុនឈឿ បានទៅព្យាបាលនៅមន្ទីរពេទ្យខ្មែរ-សូវៀតដែលមានលោកជំទាវ ហ៊ុន ម៉ាណា ចេញថ្លៃព្យាបាលរហូតដល់ជាសះស្បើយ។ ក្រោយជាសះស្បើយលោកគ្រូក៏បានវិលត្រឡប់មកធ្វើអាជ្ញាកណ្តាលម្តងទៀត ហើយបានមួយរយៈពេលខ្លីក៏បានឈប់សម្រាក។ នៅចុងឆ្នាំ២០១៦កន្លងទៅនេះអាការៈជំងឺក៏បានចាប់ធ្វើទុក្ខឡើងវិញដោយអាការៈធ្ងន់ធ្ងរជាងលើកមុនរហូតទទួលមរណភាពនៅយប់ថ្ងៃទី១១ ឈានចូលថ្ងៃទី១២ ខែឧសភា ឆ្នាំ២០១៧ក្នុងវ័យ៧២ឆ្នាំ៕

អត្ថបទ៖ ជាន ចាន់រ៉ា