តារាចម្រៀង គង់ សុធារិទ្ធ នាំដៃគូចម្រៀង ទស្សនាសារមន្ទីរតាំងយន្តហោះប្រធានាធិបតី USA

2017-05-20 02:17:13
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក គង់ សុធារិទ្ធ រួមជាមួយតារាចម្រៀងស្រីម្នាក់ទៀតគឺកញ្ញា ទៀង មុំសុធាវី បានទៅទស្សនាសារមន្ទីរមួយនៅសហរដ្ឋអាមេរិក ជាទីដែលលោក និងដៃគូ បានឡើងជិះយន្តហោះ១គ្រឿងរបស់ប្រធានាធិបតីអាមេរិក លោក ចន ខេនឌី ដែលត្រូវបានគេយកតាំងនៅទីនោះ។

តាមការឲ្យដឹងពីលោក គង់ សុធារិទ្ធ នៅក្នុងសារមន្ទីរ United States Air Force ដែលលោកបានទៅទស្សនានោះ មានការដាក់តាំងយន្តហោះច្រើនគ្រឿង ពោលគឺតាំងពីការចាប់ផ្ដើមការបង្កើតយន្តហោះធាក់កង់ឈើដំបូង រហូតមកដល់សម័យទំនើប។

ជាមួយគ្នានោះ យន្តហោះរបស់ប្រធានាធិបតីមួយចំនួនធំ របស់សហរដ្ឋអាមេរិកត្រូវបានរដ្ឋាភិបាលយកមកតាំងបង្ហាញនៅសារមន្ទីរនេះផងដែរ ប៉ុន្តែមិនគ្រប់ប្រធានាធិបតីទាំងអស់នោះទេ។ លោកបានប្រាប់ថា ចំពោះយន្តហោះដែលលោកបានថតណោះ គឺជាយន្តហោះរបស់លោក ចន ខេនឌី ប្រធានាធិបតីទី៣៥របស់សហរដ្ឋអាមេរិក ដែលត្រូវបានគេយកមកដាក់តាំងក្នុងឆ្នាំ១៩៩៨។

នេះបើតាមសរសេរបង្ហាញលើស្លាកសញ្ញាសំគាល់។ លោកថា ក្រៅពីយន្តហោះជាច្រើនគ្រឿង សារមន្ទីរUnited States Air Force នៃទីក្រុង ខូឡំបើស រដ្ឋ អូហាយូ ខាងលើនេះ ក៏មានការដាក់តាំងបង្ហាញនៅអាវុធទំនើបៗជាច្រើន ដូចជាកាំជ្រួច មីស៊ីល ជាដើម។

តាមការបញ្ជាក់របស់ប្រភពដដែល ការចូលទៅទស្សនាសារមន្ទីរ United States Air Forceនេះ រដ្ឋាភិបាលអាមេរិកមិនតម្រូវឲ្យបង់ប្រាក់ឡើយ គឺគ្រប់ជាតិសាស្ត្រទាំងអស់បើកឲ្យចូលទស្សនាដោយសេរី។ ក្នុងដំណើរទៅច្រៀងលើទឹកដីអាមេរិក តាំងពីដើមខែ មីនា ឆ្នាំ ២០១៧ លោក គង់ សុធារិទ្ធ និងកញ្ញា ទៀង មុំសុធារី បានទៅទស្សនានៅរមណីយដ្ឋានជាច្រើន។ អ្នកទាំង២គ្រោងនឹងត្រឡប់មកប្រទេសកម្ពុជាវិញនៅចុង ខែ មិថុនា ខាងមុននេះ៕

អត្ថបទ៖ ស៊ុនហួត