ស្ថានភាពជំងឺរបស់តារាចម្រៀង សួស សងវាចា មិនប្រសើ គ្មានប្រាក់សម្រាប់ធ្វើចលនារាងកាយបន្ត

2017-06-11 05:58:42
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតមកដល់ពេលនេះ តារាចម្រៀងលោក សួស សងវាចា បានធ្លាក់ខ្លួនជាជនពិការ និងមិនអាចប្រកបអាជីពចម្រៀង របស់ខ្លួនបានឡើយ ខណៈពេលដែលមានជំងឺជិតពីរឆ្នាំមកនេះ រស់នៅដោយពិការភាពពឹងផ្អែកតែលើមុខរបរលក់គ្រឿងទេសបន្តិចបន្តួចនៅក្នុងផ្ទះរបស់ប្រពន្ធ ធ្វើឲ្យជីវភាពមានការខ្វះខាតរហូតលោក មិនបានបន្តទៅធ្វើចលនារាងកាយនៅមន្ទីរពេទ្យបន្តទៀត ដោយគ្មានលទ្ធភាពបង់ថ្លៃពេទ្យ។

តារាចម្រៀងក្នុងទស្សវត ទី៩០រូបនេះ បានត្អូញត្អែរថា ដោយគ្មានមុខរបរអ្វីផ្សេងក្រៅពីប្រកបអាជីពចម្រៀងដែលក្រុមគ្រួសារទាំងមូលបានពឹងផ្អែកលើលោក សម្រាប់ផ្គត់ផ្គង់សាលារៀន ម្ហូបអាហារប្រចាំថ្ងៃរបស់គ្រួសារ ប៉ុន្តែពេលនេះការរស់នៅមានភាពចុះថយព្រោះតែលោក ដែរជាបង្គោលរបស់គ្រួសារបានធ្លាក់ខ្លួនពិការដោយសារជំងឺដាច់សរសៃឈាមខួរក្បាល កាលពីអំឡុងឆ្នាំ២០១៥។

លោក សួស សងវាចា បានឲ្យដឹងថា គិតមកដល់ពេលនេះស្ថានភាពជំងឺរបស់លោក មិនទាន់បានធូរស្រាលនៅឡើយទេព្រោះតែដៃខាងឆ្វេងមិនអាចកំរើកលើកឡើងលើបានចំណែកអាជីពតែមួយដែលលោករំពឹងថានឹងជួយឲ្យក្រុមគ្រួសារមានជីវភាពធូរធាដូចមុននោះ គឺស្ថានភាពរឹតតែលំបាកបន្ថែមទៀត ព្រោះក្រៅពីមិនអាចប្រកបមុខរបរ ដើម្បីចិញ្ចឹមជីវិតបានហើយលោកត្រូវចំណាយទៅលើថ្នាំពេទ្យដែលលោក ត្រូវចំណាយជាប្រចាំខែ ប្រមាណ៥០០ទៅ៧០០ ដុល្លារអាមេរិក។ លោក បញ្ជាក់ថា “ពីមុនដោយសារមានលទ្ធភាព ព្រោះទទួលបានអំណោយពីបងប្អូនសប្បុរជនទាំងឡាយ ទាំងក្នុងស្រុកនិងក្រៅស្រុក ខ្ញុំបានទៅសម្រួលសរសៃ ភាសាពេទ្យគេថា (ធ្វើចលនា) ដោយក្នុងមួយម៉ោងត្រូវបង់១៥ដុល្លារ តែសព្វថ្ងៃនេះខ្ញុំមិនបានទៅធ្វើទៀតទេ ព្រោះតែគ្មានលទ្ធភាព”។

បន្ថែមពីជំងឺដាច់សរសៃឈាមខួរក្បាល កាលពីជាងពីរឆ្នាំមុន លោកសួស សងវាចា ក៏នៅមានជំងឺទឹកនោមផ្អែមកម្រិតធ្ងន់បន្ថែមមួយមុខទៀតដែរ ព្រោះស្ថានភាពជំងឺទឹកនោមផ្អែមរបស់លោកនាពេលនេះ គឺស្ថិតក្នុងកម្រិតមួយដែលត្រូវចាក់ថ្នាំអាំងសូលីនដើម្បីការពារ។ បូករូមទាំងជំងឺដាច់សរសៃឈាមនិងជំងឺទឹកនោមផ្អែម បានធ្វើឲ្យលោកត្រូវការថវិកា ដើម្បីបន្តទិញថ្នាំទ្រទ្រង់ជីវិតបន្តទៀត។

ទាក់ទិនទៅនឹងបញ្ហានេះ លោកបានសម្តែងអារម្មណ៍សោកស្តាយ ដែលធ្លាក់ខ្លួនពិការឈឺរហូតមកដល់សព្វថ្ងៃនេះធ្វើឲ្យរកការងារមិនបានធ្វើ ចំណែកចំណូលត្រូវបាត់បង់មិនមានលទ្ធភាពគ្រប់គ្រាន់សូម្បីតែទិញថ្នាំ និងការធ្វើចលនា បន្ថែមដើម្បីឲ្យជំងឺសរសៃទាញនោះ វិលមករកសភាពធម្មតាវិញបាន ។ លោកបញ្ជាក់បន្ថែមថា “ខ្ញុំបានសាកល្បងហាត់ច្រៀងជាប្រចាំដែរ ប៉ុន្តែច្រៀងមិនបានឆាប់ហត់ ហើយពេលស្រែកអ៊ឺន មិនពិរោះភ្លៀវៗ ចំណែកខ្លួនមួយចំហៀងនៅទន់មិនអាចធ្វើការបាន សូម្បីតែដើរក៏ត្រូវដើរតិចៗយឺតៗ ” ។

សូមរំលឹកថា តារាចម្រៀងសំនៀងស្រទន់បទមនោសញ្ចេតនា លោក សួស សងវាចា បានដួលដាច់សរសៃឈាមក្នុងខួរក្បាលដោយសារជំងឺលើសឈាម ត្រូវបានក្រុមគ្រួសារដឹកបញ្ជូនទៅសង្គ្រោះបន្ទាន់នៅក្នុងមន្ទីរពេទ្យជោរី ក្នុងខណ្ឌច្បារអំពៅ រាជធានីភ្នំពេញ ។ក្រោយមកបន្តការព្យាបាលនៅប្រទេសវៀតណាម រយៈពេល១២ថ្ងៃ បានធ្វើឲ្យអការៈជំងឺធូរស្រាលបន្តិចប៉ុន្តែរាងកាយមានសភាពទន់មួយចំហៀងខ្លួន ចំណែកដៃឆ្វេងមិនអាចលើកបានរហូតដល់បច្ចុប្បន្ន៕

ប្រភព៖ រស្មីកម្ពុជា ប្រែសម្រួល៖ សុខណា