មិត្តភក្ដិកំពុងរាប់អានសព្វថ្ងៃមាន ៦យ៉ាងនេះ បញ្ជាក់ថាគេជាមនុស្សល្អបំផុតហើយ

2017-06-16 03:54:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងជីវិតរស់នៅប្រចាំថ្ងៃសំខាន់បំផុត ការរាប់អានមិត្តភក្ដិ ហើយមនុស្សគ្រប់គ្នាតែងប្រាថ្នាចង់បានមិត្តភាពមួយដ៏យូរអង្វែង សេពគប់ចំមនុស្សត្រូវ។ ដូច្នេះតើលក្ខណៈសម្បត្តិដូចម្ដេចខ្លះ ដែលបញ្ជាក់ថា មិត្តភក្ដិកំពុងសេពគប់សព្វថ្ងៃជាមិត្តល្អបំផុត? ខាងក្រោមនេះជាការចែករំលែកបទពិសោធន៍ផ្ទាល់ខ្លួន ពីយុវវ័យមួយចំនួនជុំវិញបញ្ហានេះ។

១. តែងនៅក្បែរយើងមិនថាស្ថានភាពបែបណា

លី សុម៉ាវត្តី និស្សិតឆ្នាំទី ៣ នៃសាកលវិទ្យាល័យភូមិន្ទភ្នំពេញជំនាញអក្សរសាស្ត្រខ្មែរ បានលើកឡើងថា៖ មិត្តល្អដ៏ពិតប្រាកដ គឺជាមនុស្សដែលតែងនៅក្បែរយើង មិនថាលំបាក សប្បាយ កើតទុក្ខ គឺមានវត្តមានគេគ្រប់ពេល នៅពីក្រោយខ្នងយើង ផ្ដល់កម្លាំងចិត្ត ជាទីប្រឹក្សាដ៏ល្អម្នាក់។ យុវតីរូបនេះ បន្ថែមទៀតថា បើបានជួបមនុស្សបែបនេះហើយ គួរថែរក្សាមិត្តភាពឱ្យបានយូរអង្វែង ព្រោះលើលោកនេះមិនមែនចេះតែសំណាងជួបមនុស្សបែបនេះរហូតនោះទេ។

២. ព្រមទទួលយកទាំងចំណុចវិជ្ជមាននិងអវិជ្ជមាន

លី សុម៉ាវត្តី ដដែលបាននិយាយទៀតថា៖ មនុស្សខ្លះមើលឃើញតែចំណុចល្អរបស់យើង តែពេលដឹងពីចំណុចខ្វះខាតណាមួយរបស់យើង បែរជាកាត់បន្ថយភាពស្និទ្ធស្នាល ឬមានអារម្មណ៍មិនល្អចំពោះយើងទៅវិញ។ កញ្ញា លើកឡើងថា មនុស្សម្នាក់ៗ មិនមែនល្អឥតខ្ចោះនោះទេ តែងមាននេះខ្វះនោះ តែបើមិត្តភក្ដិដែលកំពុងសេពគប់ អាចរាប់អានដោយមិនខ្វល់ថា យើងជាមនុស្សបែបណា នោះហើយជាមិត្តដ៏ល្អបំផុត ហើយត្រូវតបស្នងនូវទឹកចិត្តដែលគេមានចំពោះចំពោះយើង តាមរយៈធ្វើជាមិត្តល្អបំផុត ចំពោះគេវិញដូចគ្នា។

ចុចអាន៖ មកមើលឯកសណ្ឋានទទួលសញ្ញាបត្រស្អាតៗបំផុត នៅសាកលវិទ្យាល័យល្បីៗកម្ពុជា

៣. មិនបន្តុះបង្អាប់តែតែងកែតម្រូវ

ចំពោះ ណារ៉ាក់ និស្សិតផ្នែកព័ត៌មានវិទ្យាវិញ បានប្រាប់ថា កល្យាណមិត្ត គឺជាមិត្តដែលតែងប្រាប់ពីចំណុចខ្វះខាត និងជួយកែតម្រូវ ដើម្បីឱ្យក្លាយជាបុគ្គលល្អ មានលក្ខណៈសម្បត្តិប្រពៃ។ ណារ៉ាក់ បន្តថា ពេលខ្លះមនុស្សម្នាក់ មិនអាចដឹងថា ខ្លួនឯងធ្វើរឿងអ្វីមួយគប្បី ឬមិនគប្បីនោះទេហើយក៏មិនបានដឹងថា ខ្លួនឯងមានចំណុចខ្វះខាតអ្វីខ្លះនោះដែរ។ ដូច្នេះហើយ មិត្តដែលតែងប្រាប់ តែងជួយកែតម្រូវទៅរកផ្លូវល្អ នោះគឺជាមិត្តល្អបំផុតហើយ។

៤. តែងឆ្លៀតពេលទំនេរមករកយើង

និស្សិត ព័ត៌មានវិទ្យា រូបនេះប្រាប់មួយចំណុចទៀតថា មិត្តភាពមួយអាចយូរអង្វែងទៅបាន គឺអាស្រ័យលើការចេះផ្ដល់ពេលវេលា ឱ្យគ្នាទៅវិញទៅមក តែបើម្នាក់ៗរវល់តែរឿងការងាររៀងខ្លួន មិនចំណាយពេលវេលាឱ្យគ្នាខ្លះ នោះមិត្តភាពក៏មិនអាចបន្តរយៈពេលវែងបានដែរ។ ណារ៉ាក់និយាយថា៖ បាទចំពោះខ្ញុំ មិត្តភក្ដិដែលចំណាយពេលវេលាដ៏មមាញឹករបស់គេ មកជួបខ្ញុំ ដើម្បីមិត្តភាព ខ្ញុំនឹងថែរក្សាម្នាក់នោះឱ្យបានល្អបំផុត ហើយវាជាការបង្ហាញនូវក្ដីស្រឡាញ់ ចំពោះមិត្តភក្ដិដ៏ពិតប្រាកដ។

ចុចអាន៖ ៦យ៉ាងសំខាន់បំផុតក្នុងជីវិតមនុស្សម្នាក់ៗ ដាច់ខាតត្រូវមានពេលអាយុ ២៥ឆ្នាំ

៥. មិនដែលមានបញ្ហារឿងលុយកាក់ជាមួយយើង

មកជួបជាមួយ យ៉ារិទ្ធិ បុគ្គលិកក្នុងក្រុមហ៊ុនឯកជនមួយកន្លែង បានលើកឡើងថា មិត្តភាពភាគច្រើនអាចបែកបាក់ក៏បណ្ដាលមកពីរឿងលុយកាក់នេះដែរ ដូចជាខ្ចីលុយមិនដែលសង ទៅញ៉ាំអីមិនដែលចេញលុយ ដើរខ្សែលើជាដើម។ យ៉ារិទ្ធិ និយាយថា មិត្តភក្ដិល្អពិតប្រាកដគឺ ខ្ចីដឹងខ្ចី មិនដែលមានបញ្ហា តែងចេះចែករំលែកគ្នា ឧទាហរណ៍ថា ពេលទៅញ៉ាំអីជុំគ្នា ប្រសិនបើម្នាក់មិនមានលុយ ម្នាក់ទៀតចេញឱ្យសិន លើកក្រោយចេញឱ្យវិញ ស្មើភាពគ្នា។

ចុចអាន៖ មូលហេតុ ៥យ៉ាងនេះសោះ បានជាអ្នកជំពាក់លុយគេធ្វើមុខក្រាស់មិនព្រមសង

៦. មិនដែលផ្លាស់ប្ដូរទោះគេទៅជាមនុស្សបែបណា

ចំណុចនេះគឺកាន់តែសំខាន់ គឺសំដៅលើមនុស្សដែលមិនចេះភ្លេចធាតុដើមរបស់ខ្លួន មិនមែនបានរីកចម្រើនភ្លេចមិត្តចាស់នោះទេ គឺនៅតែរក្សាអត្តចរិតដូចដើមគ្មានផ្លាស់ប្ដូរ។ មិត្តភក្ដិបែបនេះ ជាមនុស្សដែលយើង គួររាប់អាន និងរក្សាមិត្តភាពតរៀងទៅ៕

អត្ថបទ៖ វឌ្ឍនៈ