ស្ងាត់ៗ អ៊ុន អាលីហ្សា ជះលុយរាប់ម៉ឺនដុល្លារនៅខេត្តកំពង់ធំ

2017-06-29 01:54:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះតារាសម្ដែង អ៊ុន អាលីហ្សា បានចំណាយថវិកាផ្ទាល់ខ្លួនរាប់ម៉ឺនដុល្លារបើកមុខជំនួញថ្មីនៅលើទឹកដីខេត្តកំពង់ធំ។

អ៊ុន អាលីហ្សា បានប្រាប់ Sabay ថា "តាមពិតទៅមុខជំនួញថ្មី បើកហាងសម្អាងការរបស់ខ្ញុំហ្នឹង ដំណើរការបាន៣ខែមកហើយបង បើគិតមកដល់ពេលនេះ។ ចំណែកឯដើមទុនវិញ យើងបើកដំបូងអញ្ចឹងនាងខ្ញុំមិនសូវជាហ៊ានចំណាយច្រើនទេ ត្រឹមតែ ៤ ទៅ ៥ម៉ឺនដុល្លារតែប៉ុណ្ណោះ ព្រោះចង់សិក្សាទីផ្សារនៅខេត្តកំពង់ធំសិន"។

មូលហេតុដែល អ៊ុន អាលីហ្សា សម្រេចចិត្តបើកសម្អាងការនៅខេត្តកំពង់ធំ ដែលមិនមែនជាស្រុកកំណើតរបស់ខ្លួននោះ ដោយសារតែមើលឃើញថា មានមិត្តភ័ក្ដិមួយចំនួនជោគជ័យច្រើននៅពេលពួកគេបើកមុខជំនួញនៅតាមខេត្ត។ ម្យ៉ាងទៀតនាពេលបច្ចុប្បន្ននេះប្រជាជននៅតាមខេត្ត ហ៊ានចំណាយមិនចាញ់ប្រជាជនដែលរស់នៅក្រុងភ្នំពេញប៉ុន្មានឡើយ។ អ៊ុន អាលីហ្សា បន្ថែម។

តារាសម្ដែងមកពី ខេត្តកំពង់ចាម រូបនេះថ្លែង ថា៖“នៅពេលដែលនាងខ្ញុំ ទៅទីហ្នឹង (ខេត្តកំពង់ធំ) មួយរយៈ ខ្ញុំឃើញថានៅខេត្តក៏ពួកគាត់ហ៊ានចំណាយស្មើនឹងអ្នកទីក្រុងភ្នំពេញដែរ ពេលខ្លះនៅខេត្តចំណាយច្រើនជាងទីក្រុងភ្នំពេញទៀតផង។ ហេតុដូច្នេះហើយទើបខ្ញុំទៅបើកសម្អាងការ នៅខេត្ត"។

សម្អាងការដែល អ៊ុន អាលីហ្សា បើកបាន៣ខែ នៅខេត្តកំពង់ធំនោះ នាងមិនបានគ្រប់គ្រងដោយខ្លួនឯងផ្ទាល់នោះទេ ព្រោះគ្មានពេលវេលាគ្រប់គ្រាន់ក្នុងការមើលខុសត្រូវ ដោយទុកឲ្យបងប្រុសជាអ្នកគ្រប់គ្រងជំនួសវិញ៕

ចុចអាន៖ជុំវិញរឿងរ៉ាវទាក់ទង អ៊ុន អាលីហ្សា

អត្ថបទ៖ ឆុង ស៊ីណាន