វេជ្ជបណ្ឌិត ថេង សទ្ធា៖ ចុកចុងដង្ហើម មិនមែនសុទ្ធតែក្រពះទេ កុំលេបថ្នាំផ្ដេសផ្ដាស

2017-07-05 04:38:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អាការៈចុកពោះ អាចបណ្ដាលមកពីមូលហេតុច្រើនយ៉ាង ដោយពាក់ព័ន្ធទៅនឹងសរីរាង្គខាងក្នុង ឬខាងក្រៅពោះ។ ចំពោះការចុកចុងដង្ហើម មនុស្សជាច្រើនតែងគិតថាជាបញ្ហាក្រពះ រួចលេបថ្នាំដោយខ្លួនឯង ប៉ុន្តែវេជ្ជបណ្ឌិត ថេង សទ្ធា បានលើកឡើងថា នេះជាការយល់ខុសមួយ។

វេជ្ជបណ្ឌិត ថេង សទ្ធា

វេជ្ជបណ្ឌិត ថេង សទ្ធា ដែលមានឯកទេសផ្នែកវះកាត់ប្រព័ន្ធរំលាយអាហារនៅមន្ទីរពេទ្យកាល់ម៉ែត្រ និងជាអ្នកណែនាំផ្នែកទ្រឹស្ដីនៅសាកលវិទ្យាល័យពុទ្ធិសាស្ត្រ បាននិយាយថា៖ "ប្រជាជនកម្ពុជា ភាគច្រើន គាត់ស្គាល់រសជាតិនៃការចុកចុងដង្ហើម ឲ្យតែចុកចុងដង្ហើមគាត់គិតថាក្រពះ តែមិនមែនរឿងហ្នឹងទាំងអស់ទេ... វាអាចជារឿងថង់ទឹកប្រមាត់ ដោយសារមានគ្រាប់គ្រោះនៅក្នុងអាហ្នឹង ជាជំងឺទី២ ដែលប្រជាជនគាត់ទុករហូតដល់ចេញលឿង ចេញអីជាដើម រហូតដល់ខូចថ្លើមក៏មានដែរ។"

វេជ្ជបណ្ឌិតរូបនេះ បានបន្តទៀតថា នៅពេលមានអាការៈចុកពោះ គួរកុំធ្វើពេទ្យខ្លួនឯង ដោយលេបថ្នាំផ្ដេសផ្ដាស ព្រោះវាមិនត្រឹមតែមិនបានផលប៉ុណ្ណោះទេ ប៉ុន្តែវាក៏អាចប៉ះពាល់ដល់សរីរាង្គផ្សេងទៀតផងដែរ។ ម្យ៉ាងវិញទៀត ការចុកពោះរ៉ាំរ៉ៃ ដោយមិនបានទៅជួបគ្រូពេទ្យ អាចធ្វើឲ្យជំងឺកាន់តែធ្ងន់ធ្ងរ រហូតក្លាយជាមហារីក ឬមានខូចសរីរាង្គនានានៃប្រព័ន្ធរំលាយអាហារ។

ចំពោះការចុកពោះ វេជ្ជបណ្ឌិត ថេង សទ្ធា បានអះអាងថា មកពីមូលហេតុជាច្រើនដូចជា៖

ទី១ ការរលាកសរីរាង្គណាមួយនៅក្នុងពោះ។ ការឆ្លងមេរោគលើសរីរាង្គណាមួយនៅក្នុងពោះ។

ទី២ ការធ្លាយសរីរាង្គណាមួយនៅក្នុងពោះ ឧទាហរណ៍ដូចជា៖ ការធ្លាយក្រពះ ធ្លាយពោះវៀនតូច ឬធំ ឬការធ្លាយថង់ទឹកប្រមាត់ ជាដើម។

ទី៣ ការស្ទះសរីរាង្គប្រហោងណាមួយនៅក្នុងពោះ ដូចជាក្រពះ ពោះវៀនតូច ពោះវៀនធំ។

ទី៤ ការរលួយសរីរាង្គណាមួយនៅក្នុងពោះ ឬជាការកៀបសង្កត់សរីរាង្គណាមួយនៅក្នុងពោះ។

មូលហេតុផ្សេងៗទៀត៖ ការហូរឈាមនៅក្នុងពោះ ការឈឺចុកចាប់ពោះដោយសារគ្រោះថ្នាក់ចរាចរណ៍ ឬទាក់ទងនឹងសរីរាង្គមួយចំនួនដូចជា ការឈឺទ្រូង ឈឺបេះដូង រលាកសួត ដែលទាំងនោះធ្វើឲ្យមានអាការៈឈឺចុកពោះផងដែរ៕