គ្រូ U23 ចិនថា ប៉ះ ម្ចាស់ផ្ទះកម្ពុជាស្អែក គឺលេងដើម្បីឈ្នះ

2017-07-18 07:21:31
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Massimiliano Maddaloni គ្រូបង្វឹក U23 ចិន បញ្ជាក់ពីគោលជំហររបស់ខ្លួនថា ប៉ះ U23 កម្ពុជាគឺលេងដើម្បីឈ្នះនៃការប្រកួតវគ្គជម្រុះ 2018 AFC U23 Championship នាវេលាម៉ោង ៦:៣០នាទីស្អែកនេះនៅពហុកីឡដ្ឋានជាតិ។

លោក Massimiliano Maddaloni

គ្រូបង្វឹករូបនេះបានឲ្យដឹងថា ការមកចូលរួមវគ្គជម្រុះនេះក្នុងគោលបំណងចង់ឲ្យកីឡាកររបស់ខ្លួនទទួលបានបទពិសោធថ្មីៗ និងបង្កើនការរីកចំរើនសមត្ថភាពឲ្យកាន់តែខ្ពស់ ដើម្បីត្រៀមលេងដំណាក់កាលផ្ដាច់ព្រ័ត្រ ដែលគ្រោងធ្វើឡើងនៅទឹកដីចិននាឆ្នាំ២០១៨។ ការជួប U23 កម្ពុជាគឺក្រុមរបស់លោក នឹងលេងឲ្យអស់ពីសមត្ថភាព ហើយលេងដើម្បីជ័យជម្នះ ទោះកម្ពុជាជាម្ចាស់ផ្ទះក៏ដោយ។

លោកបន្ថែមថា ទន្ទឹមនឹងមានគោលដៅបែបនេះ ក្រុមរបស់លោកមិនអាចមើលស្រាលម្ចាស់ផ្ទះបានឡើយ ពិសេសមិនអាចមើលរំលងសមត្ថភាពបង្វឹកដ៏ល្អរបស់លោក Leonardo Vitorino ទេ។ ជំនួបជាមួយម្ចាស់ផ្ទះស្អែកនេះ ក្រុមរបស់លោករំពឹងធ្វើបានល្អ ព្រមទាំងឈ្នះកម្ពុជាផងដែរ។

ការប្រកួតវគ្គជម្រុះ 2018 AFC U23 Championship ក្នុងពូល J ដែលកម្ពុជាធ្វើជាម្ចាស់ផ្ទះនេះគឺមាន U23 ចិន, U23 ជប៉ុន និង U23 ហ្វីលីពីន ហើយគ្រោងបញ្ចប់កម្មវិធីប្រកួតសន្សំពិន្ទុថ្ងៃទី២៣ ខែកក្កដា ឆ្នាំ២០១៧៕