អ្នកណានឹងសម្ដែងតួ អ៊ូខុង ជំនួស កុំកុំ ក្នុងរឿង "Monkey King” វគ្គ២?

2014-11-10 18:03:38
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង និងសម្ដែងល្បីហុងកុង Aaron Kwok Fu Sing នឹងសម្ដែងជាតួ ស៊ុន អ៊ូខុង ជំនួស កុំកុំ (Donnie Yen) ក្នុងខ្សែភាពយន្ត “The Monkey King 2”។ នេះបើតាមការបញ្ជាក់របស់គេហទំព័រ Hktopten។

បើទោះជាមិនទាន់មានការបញ្ជាក់ជាផ្លូវការ ប៉ុន្តែតារាវ័យ ៤៩ឆ្នាំ Aaron Kwok ហាក់កំពុងបង្ហើបថាខ្លួន នឹងសម្ដែងជាតួឯកក្នុងរឿងថ្មីនេះ។ ប៉ុន្មានថ្ងៃមុន Aaron Kwok បានបង្ហោះរូបភាពកូនស្វាតូចមួយ ដោយសរសេរភ្ជាប់ថា "ខ្ញុំចង់ជួយសង្គ្រោះពិភពលោក"។ ហើយនៅថ្ងៃទី៧ ខែវិច្ឆិកា តារារូបនេះក៏បានបង្ហើបកាន់តែច្បាស់ថែមទៀត ដោយបានបង្ហោះរូបភាពរឿង "Monkey King 2” ដោយសរសេរពាក្យខ្លីៗ ថាឲ្យអ្នកគាំទ្រគិតមើលទាំងអស់គ្នា។

ដោយឡែកប្រភពមួយចំនួនក៏បាននិយាយដែរថា Aaron កំពុងតែហ្វឹកហាត់សម្ដែងជាតួ ស៊ុន អ៊ូខុង ស្ងាត់ៗ ជាមួយតួសម្ដែងដទៃទៀតដូចជា Chow Yun Fat និង Gong Li។ "Monkey King 2” នឹងចាប់ផ្ដើមថតនៅចុងខែវិច្ឆិកានេះ ហើយនឹងអាចចេញបញ្ចាំងនៅឆ្នាំ២០១៦ ក្នុងអំឡុងពេលចូលឆ្នាំចិន។

ខ្សែភាពយន្ត “The Monkey King” វគ្គ១បានចេញបញ្ចាំងកាលពីចុងខែមករា កន្លងទៅ និងទទួលបានជោគជ័យយ៉ាងធំធេងដោយអាចរកចំណូលសរុបបានជាង ១៧៥លានដុល្លារ ដូច្នេះផលិតកម្ម Filmko ក៏បានសម្រេចចិត្តផលិតវគ្គបន្តមួយទៀត។ ប៉ុន្តែតារាក្បាច់គុន កុំកុំ មិនបានសម្ដែងបន្តឡើយ ដោយបាននិយាយថាខ្លួនជាប់រវល់ថតរឿង “CROUCHING TIGER HIDDEN DRAGON 2” ខណៈពាក្យចចាមអារ៉ាមលេចឮថា តារាវ័យ ៥១ឆ្នាំរូបនេះ មានបញ្ហាជាមួយផលិតកម្មរឿងតម្លៃខ្លួន ៕

អានអត្ថបទ៖“Fast & Furious 7” ចេញ trailer ផ្លូវការ មើលហើយធានាថាពេញចិត្ត