ទីតាំងចែកចាយគ្រឿងអាហារថ្មីបើកនៅសៀមរាប ធំហើយស្តង់ដារទំនើបទៀត

2017-08-17 03:22:20
ចំនួនមតិ 0 | ចំនួនចែករំលែក 0

ចន្លោះមិនឃើញ

DKSH ក្រុមហ៊ុនអាជីវកម្មផ្នែកគ្រឿងឧបភោគបរិភោគដោយផ្ដោតចម្បងក្នុងតំបន់អាស៊ី បានបន្តអភិវឌ្ឍអាជីវកម្មរបស់ខ្លួននៅកម្ពុជា តាមរយៈការបើកសម្ពោធមជ្ឈមណ្ឌលចែកចាយទំនិញថ្មីមួយទៀតនៅខេត្តសៀមរាបមានទំហំ ១ ០០០ ម៉ែត្រការ៉េ ដើម្បីផ្គត់ផ្គង់តម្រូវការនៅតំបន់ភាគពាយ័ព្យប្រទេសជាមួយនឹងផលិតផលគ្រឿងឧបភោគបរិភោគដែលមានគុណភាពខ្ពស់។

លោក Kwanchai Assanee នាយកគ្រប់គ្រង អាជីវកម្មផ្នែកគ្រឿងឧបភោគបរិភោគ DKSH ប្រចាំកម្ពុជា និងឡាវ បាននិយាយថា៖ "កម្ពុជា ជាទីផ្សារមានការរីកចំរើនលឿនមួយក្នុងតំបន់ ជាមួយនឹងកំណើនឆាប់រហ័សនៃប្រជាជនដែលមានកម្រិតជីវភាពមធ្យម និងមានតម្រូវការលើផលិតផលដែលមានគុណភាពខ្ពស់"។

មជ្ឈមណ្ឌលចែកចាយនេះ បំពាក់ដោយប្រព័ន្ធគ្រប់គ្រងឃ្លាំងទំនើប និងត្រូវបានតភ្ជាប់ទៅនឹងប្រព័ន្ធបច្ចេកវិជ្ជាព័ត៌មាន SAP ជាសាកលរបស់ DKSH ដើម្បីធានាគុណភាព និងការអនុលោមតាមបទដ្ឋានច្បាប់ ហើយឃ្លាំងស្តុកទំនិញបានបំពាក់ដោយប្រព័ន្ធរក្សាសីតុណ្ហភាពដែលប្រកាន់ខ្ជាប់តាមមាត្រដ្ឋានអន្តរជាតិ ISO 9001:2015។

លោកបានបន្តថា៖ " DKSH តែងតែឈានមុខគេ ក្នុងការជួយដល់ដៃគូអាជីវកម្មនៅទូទាំងពិភពលោកឲ្យចូល និងពង្រីកអាជីវកម្មរបស់ពួកគេទៅក្នុងទីផ្សារ តាមរយៈសេវាកម្មជាច្រើនដូចជា ការធ្វើទីផ្សារ ការលក់ ការចែកចាយ និងសេវាកម្មដឹកជញ្ជូន ដោយយើងមានបទពិសោធន៍ជាង ៦០ ឆ្នាំមកហើយ នៅកម្ពុជា និងមានបណ្ដាញក្នុងតំបន់រឹងមាំ"។

DKSH ផ្នែកគ្រឿងឧបភោគបរិភោគ ជាអ្នកផ្ដល់សេវាកម្មពង្រីកទីផ្សារដោយផ្ដោតលើផ្នែកផលិតផលគ្រឿងឧបភោគបរិភោគ សេវាកម្មម្ហូបអាហារ ផលិតផលប្រណីត សំលៀកបំពាក់ និងផលិតផលប្រចាំថ្ងៃដូចជាគ្រឿងសំអាងផ្នែកសក់ និងស្បែក ដោយមានទីតាំងអាជីវកម្ម ៧២០ កន្លែងក្នុង ២០ ប្រទេស៕