៤៦ឆ្នាំ! កម្ពុជា នៅមិនទាន់បំបែកកំណត់ត្រាមេដាយមាសស៊ីហ្គេមផ្ទាល់ខ្លួនបាន

2017-09-02 00:29:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតមកទល់ពេលនេះ អស់រយៈពេល៤៦ឆ្នាំហើយ កម្ពុជា ពុំទាន់អាចបំបែកកំណត់ត្រាមេដាយមាសរបស់ខ្លួន ក្នុងព្រឹត្តិការណ៍កីឡាតំបន់អាស៊ីអាគ្នេយ៍ ឬ ស៊ីហ្គេមនៅឡើយ បើធៀបនឹងស៊ីហ្គេមលើកទី៦ឆ្នាំ១៩៧១ ដែលកម្ពុជារកបានដល់ទៅ១៧មេដាយមាស។

កែ ឡេង និងអ៊ុក ស្រីមុំ ឈ្នះមេដាយមាសឆ្នាំ២០១៧

គ្រានោះប្រទេសចំនួន៧ បានចូលប្រជែងនៅទីក្រុងកូឡាឡាំពួរ រួមមានម្ចាស់ផ្ទះម៉ាឡេស៊ី កម្ពុជា ឡាវ មីយ៉ាន់ម៉ា សិង្ហបុរី ថៃ និងវៀតណាម។ កម្ពុជា ដែលកាលនោះត្រូវគេស្គាល់ជា សាធារណរដ្ឋខ្មែរ ដណ្ដើមបានមេដាយមាស១៧ ប្រាក់១៨ និងសំរឹទ្ធ១៧គ្រឿង ឈរចំណាត់ថ្នាក់លេខ៥ លើឡាវ និងវៀតណាម។

ស៊ន សៀវម៉ី ឈ្នះមេដាយមាសឆ្នាំ២០១៧

ចាប់ពីពេលនោះមក កម្ពុជា ចូលរួមស៊ីហ្គេមបាន១២លើកទៀត ប៉ុន្តែពុំមានលើកណាអាចបំបែកកំណត់ត្រាមេដាយមាស និង មេដាយប្រាក់ កាលឆ្នាំ១៩៧១ឡើយ ពោលត្រឹមបំបែកកំណត់ត្រាមេដាយសំរឹទ្ធប៉ុណ្ណោះ។ គួរដឹងដែរថា តាំងពីព្រឹត្តិការណ៍កីឡាតំបន់អាស៊ីអាគ្នេយ៍បង្កើតឡើងដំបូង នៅឆ្នាំ១៩៥៩មក កម្ពុជា ចូលប្រជែងចំនួន១៧លើក ក្នុងចំណោម២៧លើក ដោយដណ្ដើមបានមេដាយសរុប៣៤៤គ្រឿង ក្នុងនោះមាស៥០គ្រឿង ប្រាក់៩០គ្រឿង និងសំរឹទ្ធ២០៤គ្រឿង។

ឃីម ឌីម៉ា ឈ្នះមេដាយមាសឆ្នាំ២០១៧

បែបណាក្ដី កម្ពុជា ពុំធ្លាប់ធ្វើជាម្ចាស់ផ្ទះម្ដងណាឡើយ ក្នុងចំណោមព្រឹត្តិការណ៍ស៊ីហ្គេម២៧លើកមកនេះ។ ២០២៣ នឹងក្លាយជាឆ្នាំដំបូងបង្អស់ សម្រាប់ កម្ពុជា ក្នុងការធ្វើជាម្ចាស់ផ្ទះ។

សម្រាប់ស៊ីហ្គេមលើកទី២៩ ដែលទើបបញ្ចប់ថ្មីៗនេះវិញ កម្ពុជា ឈរចំណាត់ថ្នាក់លេខ៨ក្នុងចំណោម១១ប្រទេស ដូចកាលឆ្នាំ២០១៥នៅសិង្ហបុរីដែរ ក្រោយដណ្ដើមបានមេដាយមាស៣គ្រឿង ប្រាក់២គ្រឿង និងសំរឹទ្ធ១២គ្រឿង៕