ជួបមនុស្សសំខាន់នៅពីក្រោយអាជីពបាល់ទាត់របស់ ឃួន ឡាបួរ៉ាវី

2017-09-15 01:24:27
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកខ្លះនិយាយថា «គេថាយកប្តីជាអ្នកកីឡាប្រាក់ខែមិនបាន១០០ ដុល្លារផង ចាយស្អីគ្រាន់»ត្រូវបានចូលពេញត្រចៀកនារីវ័យក្មេងម្នាក់ដែលបានរៀបការជាមួយបុរសជាកីឡាករបាល់ទាត់កម្ពុជា។ ពាក់ព័ន្ធនឹងការលើកឡើងនេះ ដ៏ដូចជាបញ្ហាផ្សេងៗក្នុងវិស័យបាល់ទាត់ខ្មែរ Sabay បានធ្វើបទសម្ភាសន៍ពិសេសមួយពោរពេញដោយអត្ថន័យជាមួយនារីម្នាក់នេះគឺអ្នកនាង ពេជ្រ សង្វា ជាភរិយាដ៏ស្រស់ស្អាតរបស់ខ្សែប្រយុទ្ធជម្រើសជាតិកម្ពុជា និងចម្ការកៅស៊ូបឹងកេត ឃួន ឡាបូរ៉ាវី។ រហូតដល់ពេលនេះ អ្នកទាំងពីរទទួលបានកូនប្រុស២នាក់ហើយដើម្បីចំណងដៃអាពាហ៍ពិពាហ៍របស់អ្នកទាំងពីរ។

ឃួន ឡាបូរ៉ាវី

- **ជាន ចាន់រ៉ា៖ ហេតុអ្វីបានជាអ្នកនាងស្រលាញ់កីឡាករបាល់ទាត់នៅស្រុកខ្មែរ?**

ពេជ្រ សង្វា៖ ព្រោះខ្ញុំស្រលាញ់បាល់ទាត់ហើយខ្ញុំចូលចិត្តមើលបាល់ទាត់ណាស់។ ជាពិសេសក្រុមបាល់ទាត់នៅអឺរ៉ុប មើលហើយមានអារម្មណ៍ថា ចង់បានមិត្តប្រុសជាកីឡាករបាល់ទាត់។

ជាន ចាន់រ៉ា៖ បន្ទាប់ពីបានរៀបការជាមួយកីឡាករបាល់ទាត់ តើមានអារម្មណ៍យ៉ាងម៉េចដែរ?

ពេជ្រ សង្វា៖ ខ្ញុំមានអារម្មណ៍ថា ស្រលាញ់បាល់ទាត់ជាងមុន និងស្រលាញ់បាល់ទាត់ជាតិជាងពីមុនខ្លាំងឡើង ព្រោះទង្វើដែលប្តីខ្ញុំធ្វើរាល់ថ្ងៃធ្វើឲ្យខ្ញុំដឹងថា ធ្វើជាកីឡាករបាល់ទាត់គឺពិតជាលំបាកណាស់។ ទម្រាំតែយើងអាចក្លាយជាកីឡាករល្អម្នាក់ វាមិនងាយនោះទេ។

ជាន ចាន់រ៉ា៖ តើអ្នកនាងធ្វើយ៉ាងម៉េចដើម្បីលើកទឹកចិត្ត ក៏ដូចជាជំរុញកម្លាំងចិត្តដល់ស្វាមី?

ពេជ្រ សង្វា៖ ខ្ញុំតែងតែលើកទឹកចិត្តដល់គាត់នៅថៃ្ងដែលគាត់ត្រូវចេញទៅប្រកួត និងនាំកូនប្រុសរបស់ខ្ញុំទៅគាំទ្រគាត់ដល់ទីលាន។ គាត់ថា ពួកខ្ញុំគឺជាកម្លាំងចិត្តរបស់គាត់ បន្ទាប់ពីអ្នកគាំទ្រ និងពេលដែលមានប្រកួតចាញ់ខ្ញុំឃើញគាត់ពិបាកចិត្តខ្ញុំនិងកូនប្រុសតែងតែលួងលោមគាត់និងផ្តល់កម្លាំងចិត្តដល់គាត់ កុំឲ្យគាត់បាក់ទឹកចិត្ត។

ជាន ចាន់រ៉ា៖ ធ្លាប់មានគេនិយាយអ្វីទេដូចជាថា យកប្តីជាអ្នកកីឡាមិនអាចរកប្រាក់ចំណូលបានច្រើនសម្រាប់គ្រួសារ? តើអ្នកនាងជម្នះនឹងបញ្ហាបែបនេះដូចម្តេច ប្រសិនបើមាន?

ពេជ្រ សង្វា៖ ធ្លាប់មានគេនិយាយដែរ។ គេថាយកប្តីជាអ្នកកីឡាប្រាក់ខែមិនបាន១០០ ដុល្លារផង ចាយស្អីគ្រាន់ ប៉ុនែ្តជាសំណាងសម្រាប់ពួកខ្ញុំទាំងពីរគឺគ្រួសារខ្ញុំ ទាំងប៉ាម៉ាក់ យាយតារបស់ខ្ញុំសុទ្ធតែស្រលាញ់ និងអាណិតគាត់(ឡាបូរ៉ាវី) ហើយអត់មានខ្វល់និងគិតពីមាត់នរណានិយាយអ្វីអាក្រក់ពីអាជីពរបស់ប្តីខ្ញុំទេ ។

ខ្ញុំធ្វើអារម្មណ៍ឲ្យសប្បាយៗ ដោយមិនខ្វល់ពីនរណាថាអ្វីទាំងអស់។ ខ្ញុំគ្រាន់តែដឹងថា មនុស្សមា្នក់នេះគឺខ្ញុំជាអ្នកស្រលាញ់ ខ្ញុំជាអ្នករស់នៅជាមួយគាត់ ទោះស្អាត ឬ អាក្រក់ មាន ឬ ក្រ ខ្ញុំជាអ្នកជ្រើសដោយខ្លួនឯង។ គ្មាននរណាមកបង្ខំខ្ញុំទេ ខ្ញុំស្រលាញ់គាត់ព្រោះគាត់ជាមនុស្សមា្នក់ដែលឲ្យខ្ញុំផើ្ញជីវិតរស់នៅជាមួយបានមួយជីវិត។ អ្នកដែលធ្លាប់ថាឲ្យប្តីខ្ញុំពីមុន ហើយឥឡូវបែរជាមកសរសើរ និងលើកទឹកចិត្តបី្តខ្ញុំទៅវិញ និងលែងនិយាយអី្វដែលមិនល្អដល់បាល់ទាត់ជាតិទៀតហើយ ដោយពួកគាត់ងាកមកគាំទ្របាល់ទាត់ជាតិវិញ។

ឃួន ឡាបូរ៉ាវី ប្រធានក្រុមជម្រើសជាតិកម្ពុជា

ជាន ចាន់រ៉ា៖ តើអ្នកនាងក៏ដូចជាគ្រួសារទទួលបានអ្វីពីបាល់ទាត់ ក្នុងនាមប្ដីជាកីឡាករបាល់ទាត់?

ពេជ្រ សង្វា៖ ខ្ញុំនិងក្រុមគ្រួសារ ទទួលបានចំណេះដឹងច្រើនពីបាល់ទាត់ ព្រោះគ្រួសារខ្ញុំអត់មានអ្នកជាប់សែស្រឡាយជាអ្នកកីឡាអីទេ។ ដល់ពេលខ្ញុំរៀបការជាមួយកីឡាករបាល់ទាត់អាជីពហើយមានអ្នកជិតខាង និងបងប្អូនសាច់ញាតិពួកគាត់កោតសរសើរហើយ ផ្ដល់កិត្តិយស ដល់ក្រុមគ្រួសារខ្ញុំ និងបងវីខ្លាំងណាស់ ព្រោះពួកគាត់ឃើញបងវីលេងបាល់បានល្អ ហើយជាកីឡាករជម្រើសជាតិ ជាពិសេសទទួលបានរង្វាន់ស្បែកជើងមាសច្រើន និងឈ្នះរង្វាន់ជាកីឡាករឆ្នើមទៀត។

ជាន ចាន់រ៉ា៖ តើអាជីពបាល់ទាត់អាចធ្វើឲ្យជីវភាពគ្រួសារធូរធារសមរម្យ និងថ្លៃថ្នូរទេ?

ពេជ្រ សង្វា៖ អាជីពកីឡាករបាល់ទាត់អាចធើ្វឲ្យខ្ញុំ និងបី្ត ព្រមទាំងកូនអាចរស់នៅបានសមរម្យ និងថៃ្លថ្នូរ ទោះប្រាក់ខែវាមិនទាន់ច្រើនដូចប្រទេសដទៃ ប៉ុនែ្តខ្ញុំ និងបី្តសប្បាយចិត្តនិងលេងឲ្យបានល្អដើម្បីជួយក្លិប ព្រោះវាជាអាជីពមួយដែលប្តីខ្ញុំស្រលាញ់។

ជាន ចាន់រ៉ា៖ ចុះបើកូនប្រុសចង់ក្លាយជាកីឡាករបាល់ទាត់ តើគិតយ៉ាងម៉េចដែរ?

ពេជ្រ សង្វា៖ បើកូនប្រុសខ្ញុំគេចង់ក្លាយជាកីឡាករបាល់ទាត់ ខ្ញុំនឹងយល់ព្រម ព្រោះរាល់ថៃ្ងនេះគេនៅផ្ទះចូលចិត្តលេងទាត់បាល់ណាស់។ បើអត់បាល់វិញឃើញកំប៉ុងទឹកក្រូចក៏គេទាត់លេងដែរ ប្រើតែជើងឆេ្វងដូចប៉ាគេដែរ។

ជាន ចាន់រ៉ា៖ ចុងក្រោយអ្នកនាងមានអ្វីចង់និយាយអំពីបាល់ទាត់ស្រុកខ្មែរ និងអ្នកគាំទ្របាល់ទាត់ទេ?

ពេជ្រ សង្វា៖ ខ្ញុំមានតែសំណូមពរឲ្យបងប្អូនទាំងអស់ជួយគាំទ្របាល់ទាត់ជាតិកាន់តែច្រើនជាងមុន និងចូលរួមផ្ដល់កម្លាំងចិត្តឲ្យបានច្រើនរៀងរាល់ចុងសបា្តហ៍ ការប្រកួតបាល់ទាត់លីគក្នុងស្រុក និងពេលដែលមានការប្រកួតលក្ខណៈអន្តរជាតិធំៗជាពិសេសឆ្នាំ២០២៣ យើងនឹងធ្វើជាម្ចាស់ផ្ទះស៊ីហេ្គមមានតែអ្នកគាំទ្រទេជាកីឡាករទី១២ដែលមិនអាចខ្វះបាននៅលើទីលាន និងត្រូវការជាចាំបាច់៕