ចុងសប្ដាហ៍នេះ លីគសម្រាកតែមានប្រកួតមិត្តភាពធំៗ

2017-09-28 02:39:21
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅចុងសប្ដាហ៍នេះការប្រកួតបាល់ទាត់លីគកំពូលកម្ពុជាត្រូវសម្រាក ដើម្បីឱ្យក្រុមជម្រើសជាតិប្រមូលផ្ដុំហ្វឹកហាត់ត្រៀមហោះទៅវៀតណាមចូលរួមប្រកួតវគ្គជម្រុះ ពានរង្វាន់ 2019 AFC Asian Cup។

ត្បិតតែលីគសម្រាកយ៉ាងនេះមែន ប៉ុន្តែក្រុមធំៗក៏មានការប្រកួតមិត្តភាពដើម្បីឱ្យអ្នកគាំទ្របានទស្សនាសប្បាយរីករាយផងដែរ។ ដោយក្នុងនោះរួមមានក្រុមកំពូលតារាងព្រះខ័នរាជស្វាយរៀង នឹងប៉ះជាមួយក្រុមក្រសួងការពារជាតិនៅថ្ងៃទី២៩ខាងមុខវេលាម៉ោង៣:៣០នាទីរសៀលនៅស្ដាតចាស់។ ដោយឡែកអគ្គិសនីកម្ពុជា ត្រូវប៉ះជាមួយក្រុមឡើងជើងខ្លាំងនៅលីគលំដាប់ទី២ វិសាខា នៅថ្ងៃទី៣០វេលាម៉ោង៣រសៀលនៅទីលានរបស់អគ្គិសនី ស្របពេលដែលក្លឹបបឹងកេតឯណោះក៏ប្រកួតមិត្តភាពជាមួយក្រុមភ្នំពេញក្រោនផងដែរនៅទឹកដី RSN ថ្ងៃ៣០ដូចគ្នាវេលាម៉ោង៤ល្ងាច។

ចំពោះលីគកំពូលកម្ពុជាគិតត្រឹមសប្ដាហ៍ទី១៦នេះ ក្រុមព្រះខ័នរាជស្វាយរៀងកំពុងឈរនៅកំពូលតារាង មាន៣៧ពិន្ទុ ក្រុមលេខ២ ណាហ្គាវើលមាន៣២ពិន្ទុ ក្រុមលេខ៣ ភ្នំពេញក្រោនមាន៣១ពិន្ទុ និងក្រុមលេខ៤ បឹងកេតមាន៣០ពិន្ទុ។ ដើម្បីឈានដល់ការទទួលបានពានរង្វាន់ ក្រុមទាំង៤កំពូលតារាង ត្រូវធ្វើការប្រកួតគ្នាទៀត ដោយប្រើតាមរូបមន្ដលេខ៤ប៉ះលេខ៣ យកអ្នកឈ្នះទៅប៉ះលេខ២ ដើម្បីយកអ្នកឈ្នះទៀត ទៅប៉ះក្រុមលេខ១។ នរណាឈ្នះប្រកួតចុងក្រោយនេះ គឺជាម្ចាស់ពានរង្វាន់លីគកំពូលកម្ពុជាឆ្នាំ២០១៧តែម្ដង៕

អត្ថបទ៖ មុន្នីរម្យ