រៀនចប់ជំនាញគ្រប់គ្រង ស្រីស្អាត Avida បែរមកចាប់អាជីពជា DJ

2017-10-05 05:01:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេជ្រ ចិន្តា ឬ Avida គឺជា ឌីជេស្រីមួយរូបដែលកំពុងទទួលបានការចាប់អារម្មណ៍យ៉ាងខ្លាំងពីសំណាក់យុវវ័យក្នុងប្រទេសកម្ពុជា ជាពិសេសអ្នកគាំទ្រវិស័យតន្ត្រីកន្ត្រាក់អារម្មណ៍នេះតែម្ដង។

ផ្ដើមពីនិស្សិតសិក្សាជំនាញគ្រប់គ្រង និងមានអាជីពជាតារាម៉ូដែល ផងនោះ Avida ប្រាប់ថា រូបនាងមិនដែលគិតទាល់តែសោះថាអាចក្លាយខ្លួនជា DJ ហើយទទួលបានការគាំទ្រដូចពេលនេះ។ នាងរំលឹកថា វាអាចនិយាយបានថា វាជានិស្ស័យ ឬ ក៏ជាអ្វីមួយដែលនាងត្រូវតែធ្វើសម្រាប់ជីវិតនាង។

"ដំបូងឡើយខ្ញុំចាប់ផ្ដើមពីអ្នកដែលស្រឡាញ់តន្ត្រី ហើយខ្ញុំដើរលេងជាក្រុមមាន DJ អីចឹងទៅ ក៏ខាងសាលា DJ គេឃើញគែគិតថាខ្ញុំជាDJ តែខ្ញុំថាខ្ញុំមិនមែនទេ។ គេថាមើលទៅខ្ញុំសមជា DJ ដែរ ខ្ញុំឮចឹងក៏ប្រាប់គេថាខ្ញុំចង់រៀនដែរ គេក៏ឲ្យខ្ញុំចូលរៀនបាន១វគ្គ។ ពេលរៀនចប់ហើយខ្ញុំគិតថាខ្លួនអាចទៅរួចក៏បន្តទៀតតែម្ដង"។ Avida រៀបរាប់។

នាងបន្ថែមថា កាលណោះនាងតស៊ូរៀនមែនទែន ខ្លាចរៀនមិនចេះ ត្បិតអីវគ្គនោះគេឧបត្ថម្ភហើយគ្រានោះ នាងខ្វះខាតថវិកាខ្លាំង កុំថាឡើយទិញឧបករណ៍ចាក់ភ្លេង សូម្បីតែ Flash ក៏គ្មាននាងលុយទិញផង។

វិលមកជំនាញដែលខ្លួនសិក្សាវិញ DJស្រីខាងលើ រៀបរាប់ថា នាងមិនបានបោះបង់ទេ ព្រោះជំនាញនេះ នាងកំពុងប្រើប្រាស់ជាមួយការងារមួយទៀតគឺ ជំនួយការអ្នករៀបចំកម្មវិធី ឬ Assistant Producer ដែលនាងត្រូវគ្រប់គ្រងកម្មវិធី ពេលវេលា តួសម្ដែង និងសម្ភារៈការងារផ្សេងៗទៀត។ នាងថា៖ "តាមគ្រប់គ្រងអាចត្រូវទាំងអស់មិនចាំបាច់តែធ្វើការងារក្នុងក្រុមហ៊ុនទេ សូម្បីតែធ្វើតែ DJ ខ្ញុំអាចគ្រប់គ្រង់ពេលវេលាខ្លួនឯង និងមនុស្សក្នុងក្លឹបថាពេលនេះខ្ញុំគួរធ្វើអ្វីជាក់ចម្រៀងបែបណាឲ្យត្រូវតាមស្ថានភាពជាក់ស្ដែង"៕

អត្ថបទ៖ សុខណា