MH370 បាត់ដំណឹងឈឹងជិត ៤ឆ្នាំ ឥឡូវមានក្រុមហ៊ុនចង់រុករកបន្ត

2017-10-17 07:29:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរម៉ាឡេស៊ី បាននិយាយនៅថ្ងៃអង្គារនេះថា មានក្រុមហ៊ុន៣ បានដាក់សំណើសុំរុករកជើងហោះហើរ MH370 ជាថ្មី បន្ទាប់ពីបាត់ដំណឹងសូន្យតាំងពីឆ្នាំ២០១៤ ដោយនាំទាំងមនុស្ស ២៣៩នាក់ទៅជាមួយ។

ជើងហោះហើរ MH370 បានបាត់ដំណឹងកាលពីថ្ងៃទី ០៨ ខែមីនា ឆ្នាំ២០១៤ ក្នុងមហាសមុទ្រឥណ្ឌា ក្រោយហោះហើរចេញពីក្រុងប៉េកាំង ប្រទេសចិន ដោយមានគោលដៅឆ្ពោះទៅកូឡាឡាំពួរ ប្រទេសម៉ាឡេស៊ី។ បន្ទាប់ពីបាត់ខ្លួន ប្រទេសជាច្រើន បានចូលរួមរុករកទ្រង់ទ្រាយធំបំផុតក្នុងប្រវត្តិសាស្ត្រ ដោយចំណាយប្រាក់អស់រាប់លានដុល្លារ ហើយវាបានក្លាយជារឿងអាថ៌កំបាំងបំផុត ក្នុងប្រវត្តិសាស្ត្រគ្រោះថ្នាក់យន្តហោះ។

រដ្ឋមន្ត្រីក្រសួងដឹកជញ្ជូនរបស់ប្រទេសម៉ាឡេស៊ី Liow Tiong Lai បាននិយាយថា ការស្នើសុំរុករកជាថ្មីនេះ ទទួលបានពីក្រុមហ៊ុនបីគឺ Ocean Infinity នៅអាមេរិក, Fugro របស់ប្រទេសហុល្លង់ និងក្រុមហ៊ុនមិនស្គាល់អត្តសញ្ញាណមួយទៀត នៅប្រទេសម៉ាឡេស៊ីផ្ទាល់។ ទោះយ៉ាងណា រដ្ឋមន្រ្តីរួបនេះបានបញ្ជាក់ថា មិនទាន់មានការសម្រេចចិត្តនៅឡើយទេពេលនេះ។

លោក Liow បានបន្តទៀតថា អាជ្ញាធរម៉ាឡេស៊ីត្រូវពិភាក្សាជាមួយក្រុមហ៊ុនទាំងអស់ខាងលើ ដើម្បីលម្អិតចំពោះការរុករក។ យ៉ាងណាក្ដី លោកបានបញ្ជាក់ប្រាប់សារព័ត៌មានមួយមកពីអូស្ត្រាលីថា ការរុករកអាចនឹងចាប់ផ្ដើមឡើងវិញក្នុងពេលឆាប់ៗខាងមុខនេះ ដោយរង់ចាំការពិភាក្សាជាមួយប្រទេសអូស្ត្រាលី និងប្រទេសចិនសិន។