iPhone X ចេញភ្លាម ទិញ ២៥គ្រឿងភ្លែត ដើម្បីសុំមិត្តស្រីរៀបការ

2017-11-10 08:27:42
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិចិនវ័យក្មេងម្នាក់ បានទិញទូរសព្ទម៉ូដែលថ្មីចុងក្រោយបំផុតរបស់ក្រុមហ៊ុន Apple គឺ iPhone X សម្រាប់សុំមិត្តស្រីរៀបការ។

បុរសរូបនេះមានឈ្មោះ Chen Ming ជាអ្នកឌីហ្សាញវីដេអូហ្គេម រស់នៅទីក្រុង Shenzen ខេត្តក្វាងទុង ប្រទេសចិន បានធ្វើឲ្យហ្វេនទូរសព្ទ iPhone មួយចំនួននៅជុំវិញពិភពលោកច្រណែន បន្ទាប់ពីទិញ iPhone X ច្រើនគ្រឿងកាលពីថ្ងៃទី ៣ វិច្ឆិកា ជាថ្ងៃដែល Apple ទើបដាក់លក់ជាផ្លូវការនៅចិន។

Chen Ming បានទិញ iPhone X ចំនួន ២៥គ្រឿង តម្រៀបជារូបបេះដូងរោយផ្កាកុលាបពីក្រោម និងដាក់ប្រអប់ចិញ្ចៀនភ្ជាប់ពាក្យកណ្ដាលរង្វង់បេះដូង។ លោក Chen បានពឹងពាក់មិត្តភ័ក្ដិឲ្យតម្រៀបទូរសព្ទលើកម្រាលឥដ្ឋនៅកន្លែងមួយ បន្ទាប់មកឲ្យមិត្តភ័ក្ដិផ្សេងទៀតនាំមិត្តស្រីទៅកាន់ទីនោះ។

មិត្តស្រីឈ្មោះ Lee បានទៅដល់កន្លែងរៀបចំ និងឃើញទូរសព្ទទំនើបៗយ៉ាងច្រើនធ្វើឲ្យនាងភ្ញាក់ផ្អើល ក្រោយមកលោក Chen បានចេញមកលុតជង្គង់មុខនាងដោយកាន់ប្រអប់ចិញ្ចៀន ធ្វើឲ្យនាងរំភើបចិត្តទប់ទឹកភ្នែកមិនជាប់។ មិត្តប្រុសបានសុំនាងរៀបការ ហើយនាងក៏យល់ព្រមដែរ។

តាមប្រភពរបស់សារព័ត៌មានចិន អ្នកទាំងពីរបានស្គាល់គ្នាជាង ២ឆ្នាំហើយតាមរយៈហ្គេមមួយដែលលោក Chen ជាអ្នកបង្កើត។ ចំណែកការជ្រើសរើសយកទូរសព្ទចំនួន ២៥គ្រឿង ព្រោះមិត្តស្រីអាយុ ២៥ឆ្នាំ។ តាមប្រភពដដែលអះអាងថា ទូរសព្ទទាំងអស់នេះមានតម្លៃយ៉ាងតិច ៣១ ៥០០ដុល្លារ៕