ប្រវត្តិស្នេហ៍ជួបព្យុះភ្លៀងកាលពីជាង៧០ឆ្នាំមុនរបស់ម្ចាស់ក្សត្រិយ៍ Elizabeth

2017-11-19 09:10:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ក្សត្រិយ៍ Elizabeth បានជួបឧបសគ្គច្រើនសម្រាប់ដើមកំណើតស្នេហារបស់ព្រះនាងជាមួយព្រះស្វាមីព្រះអង្គ Philip ក្នុងនោះបណ្ដាញសារព័ត៌មានរិះគន់ខ្លាំងៗ សូម្បីព្រះមាតារបស់ព្រះនាងក៏ជំទាស់ដែរ។

ម្ចាស់ក្សត្រិយ៍ Elizabeth នៃចក្រភពអង់គ្លេសបានជួបព្រះអង្គម្ចាស់ Philip ដែលជាព្រះរាជបុត្រមានខ្សែសែស្រឡាយប្រទេសក្រិក និងដាណឺម៉ាកលើកទី១ឆ្នាំ១៩៣៤ និងលើកទី២ឆ្នាំ១៩៣៧។ ពួកព្រះអង្គត្រូវជាបងប្អូនជីទួតមួយ បើគិតតាមញាតិវង្សតាំងពីស្តេច Christian IX របស់ប្រទេសដាណឺម៉ាក និងជាជីលួតមួយបើគិតតាមម្ចាស់ក្សត្រិយ៍ Victoria។

ម្ចាស់ក្សត្រិយ៍ Elizabeth និងព្រះអង្គ Philip

ក្រោយមកពួកព្រះអង្គបានជួបគ្នានៅមហាវិទ្យាល័យ Royal Naval College ឆ្នាំ១៩៣៩ដែលនោះម្ចាស់ក្សត្រិយ៍ Elizabeth ទើបព្រះជន្ម១៣វស្សា និងបានបន្ទូលថា ព្រះនាងស្រលាញ់ព្រះអង្គ Philip។ ចាប់តាំងពីពេលនោះមក ពួកព្រះអង្គចាប់ផ្តើមទំនាក់ទំនងគ្នាតាមរយៈព្រះរាជលិខិតឆ្លងឆ្លើយ។ ពេលព្រះនាងមានព្រះជន្ម២១វស្សាត្រូវបានប្រកាសព្រះរាជពិធីភ្ជាប់ពាក្យផ្លូវការថ្ងៃទី៩ ខែកក្កដា ឆ្នាំ១៩៤៧។

ព្រះរាជពិធីភ្ជាប់ពាក្យបានកើតមានរឿងរ៉ាវចម្រូងចម្រាស់។ ព្រះអង្គម្ចាស់ Philip គ្មានគោលជំហរហិរញ្ញវត្ថុ និងប្រសូតនៅក្រៅប្រទេសពោលគឺមិនមែនប្រសូតនៅចក្រភពអង់គ្លេស។ ជាពិសេសព្រះមានបងប្អូនស្រីរៀបការជាមួយជនជាតិអាល្លឺម៉ង់ដែលមានជាប់ពាក់ព័ន្ធនឹង Nazi។ លោកស្រី Marion Crawford បម្រើការនៅរាជវង្សអង់គ្លេសបានសរសេរថា ៖«ទីប្រឹក្សារបស់ព្រះរាជវាំងមួយចំនួនគិតថា ព្រះអង្គ Philip មិនស័ក្ដិសមនឹងព្រះនាង Elizabeth ឡើយ។ ព្រះអង្គគ្មានផ្ទះ។ ព្រះអង្គគ្មាននគរ»។ សារព័ត៌មានមួយចំនួនបានចុះផ្សាយវាយប្រហារពាក់ព័ន្ធនឹងដើមកំណើតរបស់ព្រះអង្គPhilip ដែលមិនស្ថិតនៅចក្រភពអង់គ្លេស។

ក្រោយមកត្រូវបានគេរាយការណ៍ថា មាតារបស់ព្រះនាង Elizabeth បានជំទាស់ និងបានហៅព្រះអង្គPhilip ថាជា "The Hun"។ ទោះបីជាយ៉ាង ក្រោយមកព្រះមាតារបស់ព្រះនាងបានប្រាប់អ្នកកត់ត្រាជីវប្រវត្តិ Tim Heald ថា ព្រះអង្គម្ចាស់ Philip ជាបុរសអង់គ្លេស។

មុនពេលរៀបអភិសេក ព្រះម្ចាស់ Philip បានបោះបង់ចោលតួនាទីដែលជាប់ពាក់ព័ន្ធនឹងរាជវង្សក្រិក និងដាណឺម៉ាក។ ក្រោយមកព្រះអង្គទទួលបានគោរមងារថា Duke of Edinburgh។ ព្រះនាង Elizabeth និងព្រះអង្គម្ចាស់ Philip បានរៀបអភិសេកថ្ងៃទី២០ ខែវិច្ឆិកា ឆ្នាំ១៩៤៧នៅព្រះវិហារ Westminster Abbey។

ម្ចាស់ក្សត្រិយ៍ Elizabeth និងព្រះអង្គម្ចាស់ Philip មានព្រះរាជបុត្រ៤ព្រះអង្គគឺព្រះរាជបុត្រា Charles ប្រសូតឆ្នាំ១៩៤៧ ព្រះរាជបុត្រី Anne ប្រសូតឆ្នាំ១៩៥០ ព្រះរាជបុត្រា Andrew ប្រសូតឆ្នាំ១៩៦០ និងព្រះរាជបុត្រា Edward ប្រសូតឆ្នាំ១៩៦៤។ ថ្ងៃទី២០ ខែវិច្ឆិកា ឆ្នាំ២០១៧នេះជាខួបលើកទី៧០ឆ្នាំនៃព្រះរាជអភិសេករបស់ព្រះអង្គទាំងពីរ។ ដូច្នេះបើគិតទាំងទំនាក់ទំនងមុនពេលរៀបអភិសេកគឺមានរយៈពេលប្រហែលជា៨០ឆ្នាំហើយ៕