លក្ខណៈពិសេស ដែលបរទេសទាក់ចិត្តខ្លាំងនឹងរបាំក្បាច់បុរាណខ្មែរ

2017-11-24 03:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មានហេតុផលមិនច្រើនទេ ដែលរបាំក្បាច់បុរាណរបស់ខ្មែរ ត្រូវបានមជ្ឈដ្ឋានអន្តរជាតិនិយមចូលចិត្តមើល ទោះតែពួកគេមិនចេះភាសាខ្មែរក៏ដោយ។ តើមានហេតុផងអ្វីខ្លះដែលធ្វើឱ្យជាតិសាសន៍នៅឯនាយសមុទ្រពេញចិត្តរបាំខ្មែរម្ល៉េះ?

បើតាមទីប្រឹក្សាក្រសួងវប្បធម៌និងវិចិត្រសិល្បៈ លោក ព្រឿង ឈៀង បានឱ្យ Sabay ដឹងថា ជនបរទេសនៅប៉ែកអឺរ៉ុបភាគច្រើនចូលចិត្តមើលរបាំបុរាណខ្មែរណាស់ ព្រោះពួកគេចង់ស្វែងយល់ពីរបាំ និងវប្បធម៌ខ្មែរ។ លោកថាធាតុពិតជនបរទេសខ្លះមិនចេះភាសាខ្មែរទេ ហើយរបាំភាគច្រើនពឹងទៅលើចម្រៀងបង្ហាញអំពីអត្ថន័យរបស់របាំ តែលក្ខណៈពិសេសដែលជនបរទេសអាចមើលយល់ពីរបាំខ្មែរគឺនៅត្រង់កាយវិការនោះឯង។ (ភាគច្រើនមុនសម្ដែងរបាំនៅក្រៅប្រទេស សិល្បករតែងបង្ហាញក្បាច់របាំ និងអត្ថន័យរបាំឱ្យភ្ញៀវបានយល់ខ្លះៗជាមុនសិន)។

ទីប្រឹក្សាក្រសួងរូបនេះបញ្ជាក់ថា ធាតុផ្សំដែលអាចជួយឱ្យអ្នកមើលយល់ពីរបាំបុរាណខ្មែរ ថាចង់បានន័យថាយ៉ាងណានោះ គឺមាន២ចំណុច។ ទី១ទៅលើការច្រៀង ទី២ទៅលើកាយវិការ ហើយកាយវិការនោះទៀតសោតបែងចែកជា២ទៀត គឺកាយវិការបង្ហាញពីជីវភាពប្រចាំថ្ងៃ និងកាយវិការនិមិត្ត។

ដូច្នេះទោះតែជនបរទេសមិនចេះភាសាខ្មែរ ក៏ពួកគេអាចមើលរបាំខ្មែរបានយល់មួយចំនួនធំដែរ។ ម្យ៉ាងទៀតដោយរបាំខ្មែរមានភាពចំណាស់ និងភាពទន់ភ្លន់បង្ហាញអំពីចរិតនារីខ្មែរពីសម័យដើមទើបអាចទាក់ចិត្តអ្នកទស្សនាជាជនបរទេសខ្លាំងបែបនេះ។

ទីប្រឹក្សាក្រសួងវប្បធម៌និងវិចិត្រសិល្បៈលោក ព្រឿង ឈាង

“កាយវិការរបាំហ្នឹងមានច្រើនដូចជា គេចង់ហៅ គេធ្វើកាយវិការដូចជាយើងហៅអីចឹង គ្រាន់តែសម្ដែងចេញដោយភាពទន់ភ្លន់ ដូចជាចង់ឱ្យទៅ សើច យំ ព្រួយចិត្តឬពិបាកចិត្ត ភ័យ អីអស់ហ្នឹងសុទ្ធតែស្រដៀងនឹងជីវិតប្រចាំថ្ងៃ គ្រាន់តែគេរៀបបែបបទឱ្យស្អាតប៉ុណ្ណោះ។ មួយទៀតកាយវិការនិមិត ដូចជាការរីកចំរើន រុងរឿង ស្អាត ជាដើមហ្នឹងយើងមើលមិនឃើញទេ ដូច្នេះត្រូវពឹងលើចម្រៀង។

លោក ព្រឿង ឈាង បានបញ្ជាក់ថា បើតាមលោកព្រឹទ្ធាចារ្យ ឆេង ផុន ធ្លាប់បានមានប្រសាសន៍ ថា ក្បាច់របាំរបស់ខ្មែរទាំងអស់មានចំនួន៤៥០០ក្បាច់ ដោយលោកថាមានក្បាច់ខ្លះកប់នៅក្នុងរបាំ។ ដោយឡែកមកដល់ពេលនេះលោក ព្រៀង ឈាង នៅមិនទាន់បានស្រាវជ្រាវឃើញក្បាច់ទាំងនោះអស់នៅឡើយទេ តែក៏ចេះតែរកឃើញក្បាច់ថ្មីៗជាបន្តបន្ទាប់ដែរ។