ឆាយ វីរៈយុទ្ធ បង្ហាញកាយវិការកត្តញ្ញូដាក់ម្ដាយក្មេក

2017-11-29 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារូបភាពកម្រមួយពាក់ព័ន្ធនឹងតារាចម្រៀងផលិតកម្មសាន់ដេ លោក ឆាយ វីរៈយុទ្ធ ចាប់តាំងពីលោកបានរៀបការមានគូជីវិតមក ដោយថ្មីៗនេះបានឃើញនាំក្រុមគ្រួសារទៅកម្សាន្តនៅរមណីយដ្ឋានមួយនៅមិនឆ្ងាយប៉ុន្មានពីរាជធានីភ្នំពេញ ជាទីដែលគេបានឃើញលោកយកចិត្តទុកដាក់ជាមួយស្ត្រីចំណាស់មួយរូប។

បង្ហាញវត្តមានជាលក្ខណៈឯកជនថ្ងៃនោះ លោក ឆាយ វីរៈយុទ្ធ ស្លៀកសម្លៀកបំពាក់សាមញ្ញ ខោខាវប៊យខ្មៅ អាវយឺតដៃវែងពណ៌ទឹកប៊ិចក្រម៉ៅ ឯសក់របស់លោក រំលេចនូវស្ទីលថ្មីពណ៌ប្រាក់ រួមដំណើរជាមួយក្រុមគ្រួសារមានគ្នាប្រមាណ ៥-៦នាក់ មានភរិយា និងម្ដាយក្មេកជាដើម។ តារាចម្រៀងរូបនេះ គេឃើញមានរូបរាងធាត់ជាងមុន ស្ទើរមើលមិនស្គាល់ នៅគ្រានោះ។

មិនខ្វល់នឹងក្រសែភ្នែកអ្នកទេសចរជុំវិញខ្លួន តារាចម្រៀងមកពីខេត្តកំពង់ចាមរូបនេះ បង្កើតបរិយាកាសរីករាយជាមួយមិត្តភក្ដិ និងក្រុមគ្រួសារដោយការលេងបៀលំហែ។ បន្ទាប់ពីលំហែអស់ចិត្ត នៅម៉ោងប្រមាណ ខ្ទង់៣រសៀល លោក និងសមាជិករួមដំណើរទាំងអស់បានចាកចេញមកវិញ។ ក្នុងពេលដែលអ្នកមានកម្លាំងពលំរឹងមាំទៅមុនអស់ លោក ឆាយ វីរៈយុទ្ធ ឯណេះ នៅយកចិត្តទុកដាក់ជាមួយស្ត្រីវ័យចំណាស់ម្នាក់យ៉ាងខ្ជាប់ខ្ជួន ដែលត្រូវបានស្គាល់ថាជាម្ដាយក្មេកលោកតែម្ដង។ ដំបូង ឆាយ វីរៈយុទ្ធ បានជួយគ្រាម្ដាយក្មេកដែលមានរាងកាយធាត់ពិបាកងើបនោះ ឲ្យក្រោកឈរ បន្តមកទៀត លោកបានទៅរៀបចំស្បែកជើង សម្រាប់អ្នកមានគុណរបស់ភរិយាលោកនេះពាក់។ ចុងក្រោយ លោកនៅបានជួយគ្រាម្ដាយក្មេកលោក ធ្វើដំណើរចេញទៅទៀត ក្រោមក្រសែភ្នែករបស់ភ្ញៀវទេសចរណ៍ជាច្រើន។

លោក ឆាយ វីរៈយុទ្ធ បានរៀបការកាលពីថ្ងៃទី ២១ ឧសភា ២០១៧។ ភរិយាលោកឈ្មោះ សែ ចាន់ឌី ដែលមុនពេលភ្ជាប់និស្ស័យជាមួយគ្នា ភរិយារូបនេះ ធ្លាប់សរសេរបទចម្រៀងឲ្យលោកច្រៀងបានប្រមាណ ១០បទដែរ។ ពាក់ព័ន្ធការងារច្រៀងរបស់លោក ថ្មីៗនេះ ឆាយ វីរៈយុទ្ធ ទើបបានចេញបទថ្មីសប្ដាហ៍មុននេះមានចំណងជើងថា “ជម្រើសទី២” ជាប្រភេទបទ Original Song។ បុគ្គលជិតស្និទ្ធមួយរូបនឹងតារាចម្រៀងរូបនេះ ខ្សឹបប្រាប់ថា នេះជាការបំបុកទីផ្សារក្នុងបំណងលើកស្ទួយប្រជាប្រិយភាពលោកមួយកម្រិតទៀតរបស់លោក ឈានទៅឈរតំណែងជាកំពូលតារាចម្រៀងប្រចាំសាន់ដេ បន្ទាប់សិរីមន្តបានចេញទៅកាន់ទ្រនំថ្មីរួចមក៕

អត្ថបទៈ ប៊ុនណា សភា