ទម្រាំបាន កាបូបធ្វើពីកំប្លោកមួយ ដឹងថា ឆ្លងកាត់ការលំបាកអ្វីខ្លះ?

2017-12-16 10:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រជាជនខ្មែរ ជាពិសេសស្រ្តី ប្រាកដជាធ្លាប់បានឃើញ និង ធ្លាប់បានប្រើប្រាស់កាបូបធ្វើពីកំប្លោកហើយ ប៉ុន្ដែ មនុស្សតិចតួចបានឃើញអំពីដំណាក់កាលនិមួយៗ នៃការច្នៃកំប្លោកធ្វើជាកាបូប ឬវត្ថុផ្សេងៗ។ ថ្ងៃនេះ ក្រុមការងារផ្លូវទៅស្រុកវគ្គ២ នឹងបង្ហាញរូបភាព និងគន្លឹះខ្លះៗអំពីដំណើរការនៃការច្នៃកំប្លោកធ្វើជាកាបូប ប្រើប្រាស់ ដែលកំពុងពេញនិយមទាំងក្នុងស្រុក និង ក្រៅប្រទេស។

ខាងក្រោមនេះ គឺជា ដំណាក់កាលខ្លីៗ នៃការច្នៃកំប្លោកធ្វើជាកាបូប ពីសិប្បកម្មភ្នំក្រោម ស្ថិតក្នុងខេត្តសៀមរាប៖

១. កំប្លោកគឺជាវត្ថុធាតុដើមសំខាន់តែមួយគត់ ដែលត្រូវបានសិប្បកម្មកំប្លោកភ្នំក្រោម ប្រើប្រាស់ដើម្បីផលិតកាបូប និងសម្ភារៈប្រើប្រាស់ដទៃមួយចំនួនទៀត។ ដើម្បីបានកំប្លោកដែលអាចត្បាញជាសម្ភារៈប្រើប្រាស់បាន គេត្រូវទៅកាត់កំប្លោកនៅក្នុងបឹងឆ្ងាយពីផ្ទះ។

២. ដើមកំប្លោកដែលបានកាត់ពីបឹងរួចហើយ ត្រូវយកមកហាលឲ្យស្ងួត មុនយកទៅសម្អាតនិងត្បាញ។ ការសម្ងួតតាមបែបធម្មជាតិនេះ អាចប្រើពេលពីមួយថ្ងៃទៅពីរថ្ងៃ អាស្រ័យលើពន្លឺនិងកម្ដៅនៃព្រះអាទិត្យ។

៣. កំប្លោកដែលស្ងួតល្អហើយ ត្រូវយកទៅលាងសម្អាតជាមួយសាប៊ូឲ្យជ្រះស្លែនិងក្រមរផ្សេងៗ។ ក្នុងអំឡុងពេលលាងសម្អាត សិប្បករនឹងជ្រើសរើសដើមកំប្លោកទាំងឡាយណា ដែលទំហំនិងប្រវែងសមល្មមសម្រាប់យកទៅត្បាញ។ បន្ទាប់ពីលាងសម្អាតស្អាតហើយ សិប្បករយកកំប្លោកទាំងនោះទៅហាលឲ្យស្ងួតម្ដងទៀត។

៤. នៅមុនពេលយកកំប្លោកទៅត្បាញជាសម្ភារៈផ្សេងៗ សិប្បករយកកំប្លោកទៅឆ្ពុងនឹងចំហេះស្ពាន់ធ័រ ដើម្បីឲ្យដើមកំប្លោកទន់ ស និងគ្មានមេរោគ។ ការឆ្ពុងកំប្លោកត្រូវប្រើរយៈពេលពី២០ទៅ៣០នាទី។

៥. សិប្បករកំពុងត្បាញកំប្លោកជារាងប្រអប់ ឬវត្ថុប្រើប្រាស់ផ្សេងៗ។ ដើម្បីត្បាញកំប្លោកឲ្យទៅជាសម្ភារៈប្រើប្រាស់ផ្សេងៗ សិប្បករត្រូវច្នៃម៉ូដ និងផលិតពុម្ពនៃវត្ថុទាំងនោះជាមុនសិន។

៦. អ្នកស្រី សូរ សម្បត្តិ ប្រធានសមាគមសិប្បកម្មកំប្លោកភ្នំក្រោម បង្ហាញកាបូបយួរដៃស្ដ្រី ផលិតពីកំប្លោក នៅក្នុងសិប្បកម្មរបស់អ្នកស្រី នៅភូមិភ្នំក្រោម សង្កាត់សៀមរាប ក្រុងសៀមរាប។ ផលិតផលកំប្លោករបស់អ្នកស្រីត្រូវបានបញ្ជាទិញទៅកាន់ប្រទេសជាច្រើនទូទាំងពិភពលោក រាប់ចាប់តាំងពីអាមេរិក ជប៉ុន កូរ៉េ ម៉ាឡេស៊ី និងប្រទេសបារាំងជាដើម៕

អត្ថបទ៖ ក្រុមការងារផ្លូវទៅស្រុក

រូបថត៖ Shot on Canon