ធ្លាយព័ត៌មានកៀកព្រលប់ថា ស្រីស្អាត យៀកលី ភ្ជាប់ពាក្យស្ងាត់ៗហើយ!

2017-12-19 12:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រីស្អាតមកពីក្រុងប៉ោយប៉ែត យៀកលី បានដកខ្លួនមួយរយៈមកហើយពីការងារសិល្បៈ ដោយប្រាប់ថាជាប់ខ្លួនជាមួយជំនួញ។ ប៉ុន្តែថ្មីៗនេះធ្លាយដំណឹងថា តាមពិតនាងដកខ្លួនដើម្បីយកពេលភ្ជាប់ពាក្យជាមួយគូស្នេហ៍ទេ។

តាមប្រភពលាក់មុខមួយ បានឲ្យដឹងថា តារាសម្ដែងវ័យក្មេង ម៉េង យៀកលី ទើបបានភ្ជាប់ពាក្យថ្មីៗ ត្រៀមលាជីវិតនៅលីវឆាប់ៗនេះហើយ។ ពិធីនោះបានប្រព្រឹត្តដោយមានត្រឹមសាច់ញាតិទាំងសង្ខាង មិនមានមិត្តភក្ដិសិល្បៈឡើយ។ ដូច្នេះហើយ ទើបដំណឹងភ្ជាប់ពាក្យរបស់នាងមិនសាយភាយខ្លាំងក្នុងចង្កោមសិល្បៈ។

ប្រភពដែលសុំមិនបញ្ចេញឈ្មោះដដែល ឲ្យដឹងទៀតថា គូដណ្ដឹងរបស់ យៀកលី គឺជាបុរសវ័យកណ្ដាលម្នាក់ និងមានតួនាទីខ្ពស់នៅក្នុងក្រុមហ៊ុនមួយដែលផ្គត់ផ្គង់អាហារបំប៉នសុខភាព និងកំពុងមានការពេញនិយមពីអ្នកគាំទ្រ។ "ក្រុមហ៊ុននោះ ក៏ជាកន្លែងធ្វើការរបស់ អាលី ដែរ គេទៅធ្វើការនៅហ្នុងហើយ បានពួកគេជួបគ្នា ស្រឡាញ់គ្នា រហូតឈានដល់ភ្ជាប់ពាក្យនោះបង" ប្រភពបន្ថែម។

ពាក់ព័ន្ធបញ្ហាខាងលើ សាមីខ្លួនកញ្ញា យៀកលី បានឆ្លើយប្រាប់ Sabay ថា នាងពិតជាបានភ្ជាប់ពាក្យពិតមែន កាលពីពេលថ្មីៗនេះ ទើបជាហេតុធ្វើឲ្យនាងដកខ្លួនពីការងារសិល្បៈទាំងអស់។ ប៉ុន្តែទោះជាយ៉ាងនេះក្ដី រវល់នឹងការងារជំនួញ ក៏ហេតុផលរួមផ្សំមួយធ្វើឲ្យនាងបង្ខំចិត្តផ្អាកសិល្បៈបណ្ដោះអាសន្នដែរ។

បើទោះជាទទួលស្គាល់ពីដំណឹងភ្ជាប់ពាក្យ ប៉ុន្តែអតីតជយលាភីលេខ២ក្នុងកម្មវិធី Freshie Girls & Boys ២០១៥ រូបនេះ មិនបាននិយាយលម្អិតឡើយថាតើ គូដណ្ដឹងនាងជាថ្នាក់លើរបស់នាង និងថាបុរសនោះ ឈ្មោះអ្វី អាយុប៉ុន្មាន ក៏ទេដែរ។ "ចាំតាមដាន និងអ៊ុតមើលទាំងអស់គ្នាទៅបង...!” ម៉េងលី ថ្លែងខ្លីទាំងសំណើច។

យ៉ាងណាក៏ដោយ ស្រីស្អាតរូបនេះ ប្រាប់ខ្លីចុងក្រោយទៀតថា ពិធីរៀបមង្គលការរបស់នាងគ្រោងនឹងរៀបចំនៅឆ្នាំ ២០១៨នេះហើយ៕

អត្ថបទ៖ ទារិកា