៦សន្លឹក បង្ហាញពីមុខរបរ និងជីវិតប្រចាំថ្ងៃកូនខ្មែរ

2018-01-02 04:02:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ Sabay សូមបង្ហាញរូបភាពពីមុខរបរ ដែលកូនខ្មែរកំពុងធ្វើរាល់ថ្ងៃ មានដូចជា ការផលិតខ្សែក្រវាត់ឈើ, ចង្ក្រានពានាខេត្តព្រៃ, ត្រសក់ចាវអូររាំងឪ, ការងារផ្សារដែក, របរធ្វើស្លាចំណិតអ្នកស្រុកជប់ និង រទេះប្រើក្របី ដែលសឹងលែងឃើញនៅកម្ពុជា។ នេះជាមុខរបររៀបរាប់ត្រួសៗ ចង់ដឹងកាន់តែច្បាស់ សូមមើលរូបភាព មានភ្ជាប់អត្ថន័យដូចខាងក្រោមនេះ៖

១.ខ្សែក្រវាត់ឈើ

នេះជាសកម្មភាពបាញ់ថ្នាំលំអខ្សែក្រវាត់ដែលច្នៃពីកំណាត់ឈើរបស់សិប្បកម្មផលិត និងកែច្នៃមួយនៅភូមិពានាជើង ឃុំអំពិលក្រៅ ស្រុកស៊ីធរកណ្ដាល ខេត្តព្រៃវែង។ ខ្សែក្រវាត់ឈើដែលច្នៃចេញពីកំណាត់ឈើតូចៗដែលគេបោះចោល លាយជាមួយខ្សែ នីឡុង។ ទីផ្សារខ្សែក្រវាត់ឈើដែលចាប់ផ្ដើមផលិតតាំងពីឆ្នាំ២០១៣មួយនេះល្បីរហូតក្រៅប្រទេសក្នុងនោះមាន បារាំង សហរដ្ឋអាមេរិក អូស្ត្រាលី ញ៉ូវហ្សឺលែន កូរ៉េ និងម៉ាឡេស៊ី តម្លៃលក់ក្នុងទីផ្សារក្នុងស្រុកគឺ ៥០ដុល្លារ ទៅ ៧០ដុល្លារក្នុងមួយខ្សែ។

២.ចង្ក្រានពានាខេត្តព្រៃវែង

កម្មករធ្វើចង្ក្រាន២នាក់កំពុងចោះសន្ទះបាតសង្ក្រាន្តនៅសិប្បកម្មផលិតចង្ក្រានធ្វើពីដីឥដ្ឋមួយ មានទីតាំងជាប់ផ្លូវជាតិ ក្នុងស្រុកស៊ីធរកណ្ដាល ខេត្តព្រៃវែង។ ចង្ក្រានឡូវ របស់សិប្បកម្ម មួយនៅខេត្តព្រៃវែងនេះផលិតសម្រាប់ចែកចាយបានតែស្រុកមួយចំនួនក្នុងខេត្តនេះតែប៉ុននោះ។ តម្លៃចង្ក្រានឡូ វនេះមួយលក់ចន្លោះពី ៤ពាន់ ទៅ ៥ពាន់រៀល។

៣.ត្រសក់ចាវអូររាំងឪ

នេះជាសកម្មភាពមួយជ្រុងតូចរបស់អ្នកផលិតត្រសក់ចាវកំពុងលើកចាក់ត្រសក់ដែលហាលរួមមកចាក់ចូលក្នុងអាងត្រាំដើម្បីធ្វើត្រសក់ចាវក្នុងភូមិមួយក្នុងស្រុក អូររាំងឪ ខេត្ត ត្បូងឃ្មុំ។ ក្នុងមួយថ្ងៃអ្នកភូមិនៅក្នុងស្រុកនេះអាចផលិតត្រសក់ចាវបានប្រមាណជាង២តោន។ សម្រាប់តម្លៃលក់ទៅឲ្យអ្នកបោះឲ្យម៉ូយយកទៅលក់បន្តក្នុងមួយគីឡូ ២៨០០រយរៀល និងតម្លៃលក់រាយ ៣ពាន់រៀលក្នុងមួយគីឡូក្រាម។

៤.ការងារពាក់វ៉ែនតាខ្មៅប្រចាំ

ជាងផ្សាតុកៅអីម្នាក់នៅរោងជាងផលិតសម្ភារៈ និងគ្រឿងសង្ហារិមធ្វើពីឈើ ដែក និងផ្ដៅមួយកន្លែងនៅភូមិកោះក្របី ខណ្ឌច្បារអំពៅ រាជធានីភ្នំពេញ។ ការងារមួយនេះគឺតម្រូវឲ្យពាក់វ៉ែនតាខ្មៅ ដើម្បីការពារភ្នែកពីពន្លឺរបស់ ប៉ុស្តិ៍ផ្សាដែលមានពន្លឺខ្លាំងអាចធ្វើឲ្យភ្នែកខូចបាន។

៥. របរធ្វើស្លាចំណិតអ្នកស្រុកជប់

អ្នកស្រី សាំង សារិ អាយុ ៤៥ឆ្នាំ ជាអ្នករកស៊ីផលិតជាស្លាចំណិតធំមួយរូបប្រចាំភូមិជប់ក្រៅ ឃុំ ជប់ ស្រុក និងខេត្ត ត្បូងឃ្មុំ។ ការងារប្រចាំថ្ងៃរបស់ស្ត្រីជាអ្នកម៉ៅចម្ការស្លារយៈពេល៧ឆ្នាំរូបនេះគឺរវល់តាំងពីព្រឹកព្រលឹមរហូតដល់យប់កណ្ដាលអធ្រាត្រទើបបានសម្រាក។

៦. រទេះប្រើក្របីសឹងលែងឃើញនៅកម្ពុជា

នេះជារូបរទេះក្របីដឹកអុសចេញពីព្រៃវិលត្រឡប់ទៅផ្ទះវិញរបស់បងប្អូនប្រជាជនខ្មែរដែលរស់នៅទឹកដីស្រុកសំបូរ ខេត្តក្រចេះដែលដែលមានចម្ងាយជាង៣០គីឡូម៉ែត្រពីទីរួមខេត្តក្រចេះ។ រទេះដែលប្រើក្របីបែបនេះហាក់មានកាន់តែតិចតួចណាស់នៅកម្ពុជាសម័យបច្ចុប្បន្ននេះ។ នេះអាចមកពីវិស័យបច្ចេកវិទ្យានៅកម្ពុជាមានជឿនលឿនគ្រឿងយន្តក្នុងវិស័យកសិកម្មកាន់តែរីកចម្រើន។ ការប្រើប្រាស់គ្រឿងយន្តកាន់តែច្រើន រទេះគោក្របីដែលជាយានជំនិះប្រពៃណីតាំងពីបរមបុរាណរបស់កម្ពុជាសឹងតែលែងមានវត្តមាននៅកម្ពុជា។

ព័ត៌មានចាប់អារម្មណ៍ផ្សេងទៀត៖