មនុស្សវ័យចំណាស់នៅជនបទខ្លះ ចង់ឃើញមុខកូននៅឯនាយសមុទ្រ ខំរៀនប្រើបណ្តាញសង្គម

2018-12-31 02:56:44
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនមែនតែយុវជននោះទេដែលនិយមប្រើប្រាស់បណ្តាញសង្គមជាពិសេសបណ្តាញសង្គមហ្វេសប៊ុក តែមនុស្សវ័យចំណាស់ដែលអ្នករស់នៅតាមបណ្តាខេត្តក៏ចូលចិត្តប្រើប្រាស់បណ្តាញសង្គមមួយនេះដែរ។

អ្នកប្រើប្រាស់បណ្តាញសង្គមនៅតាមបណ្តាខេត្តបានលើកឡើងថាខ្លួនក៏ទំនងជាដូចយុវវ័យឬមនុស្សវ័យចំណាស់នៅទីក្រុងដែរពោលគឺប្រើបណ្តាញសង្គមដើម្បីភ្ជាប់ទំនាក់ទំនង និងតាមដានព័ត៌មានជាដើម។

(អ្នកស្រី ហ៊ុន សុផល កំពុងវចុចទូរសព្ទ បើកបណ្តាញសង្គមហ្វេសប៊ុក)

ស្រ្តីវ័យ៥០ឆ្នាំម្នាក់រស់នៅខេត្តតាកែវលើកឡើងថា អ្នកស្រីបានប្រើបណ្តាញសង្គមហ្វេសប៊ុកអស់រយៈពេលបីឆ្នាំមកហើយ ពោលគឺពេលដែលកូនរបស់អ្នកស្រីចេញទៅរស់នៅបរទេស។ ការប្រើបណ្តាញមួយនេះអ្នកស្រី ហ៊ុន សុផល លើកឡើងថាដើម្បីងាយស្រួលទាក់ទងជាមួយកូន និងចំណាយថវិកាតិច។ សម្រាប់អ្នកស្រីហ៊ុន សុផល គឺចូលចិត្តទាក់ទងជាមួយកូនស្រីដែលកំពុងរសនៅ និងធ្វើការនៅប្រទេសកូរ៉េតាមរយៈវីដេអូខល តាមMessenger ជាងការទាក់ទងតាមប្រព័ន្ធទូរសព្ទធម្មតា ព្រោះថាអាចមើលមុខគ្នាឃើញដូចបានជួបផ្ទាល់និងម៉្យាងទៀតវាមានភាពងាយស្រួល។

អ្នកស្រីបញ្ជាក់ថា៖ « ពីមុនខ្ញុំនឹកចៅចង់ឃើញមុខចៅពិបាកណាស់...ឥឡូវនេះបានធូរអារម្មណ៍តិចពេលបានឃើញគាត់ពេលកូនខលមកជួបម្ដងៗ...មានអារម្មណ៍ថាសប្បាយពេលហ្នឹង»។

នៅតាមបណ្តាខេត្តទោះនៅបីជិត ឬឆ្ងាយពីទីប្រជុំជនក្តី ក៏ឃើញមានមនុស្សវ័យចំណាស់មានទូរសព្ទដៃប្រភេទស្មាតហ្វូន និងមានទាំងភ្ជាប់បណ្តាញសង្គមផងដែរ។ ទិន្នាការនៃការរីកចម្រើនក្នុងការប្រើប្រាស់បណ្តាញសង្គមនេះអាចមកពីតម្លៃទូរសព្ទស្មាតហ្វូតធូរថ្លៃដែលអាចរកទិញបានក្នុងតម្លៃទាបជាង២០០ដុល្លារក៏មាន។

មួយវិញទៀតបណ្តាញអ៊ីនធឺណែតមានគ្របដណ្តប់ស្ទើរពេញផ្ទៃប្រទេស ជាពិសេសមានប្រព័ន្ធ4G ទៀតផង។

បើតាមទិន្ន័យរបស់ក្រសួងទូរគមនាគមន៍ដែលបង្ហាញដោយមន្ត្រីជំនាញនាពេលកន្លងទៅឲ្យដឹងថាគិតត្រឹមឆ្នាំ២០១៧ មានអ្នកប្រើស៊ីមកាត១៩លានស៊ីម និងអ្នកភ្ជាប់អ៊ីនធឺណែតចំនួន៨,៥លាន និងបណ្តាញ4G មានគ្រប់២៥រាជធានី ខេត្ត ឬស្មើនឹង៦០ភាគរយនៃទឹកដីកម្ពុជា។

ចំណែកស្រ្តីវ័យ៥៥ឆ្នាំម្នាក់ទៀត រស់នៅខេត្តតាកែវដែរ គឺអ្នស្រី អ៊ូច ស៊ា មានប្រសាសន៍ថាអ្នកស្រីមិនចេះភាសាអង់គ្លេសអ្វីទេ ប៉ុន្តែថាអ្នកស្រីចេះប្រើបណ្តាញសង្គមនេះដោយក្មួយជួយបង្រៀន។ អ្នកស្រីបន្តថាប្រើបណ្តាញសង្គមមិនត្រឹមងាយស្រួលទាក់ទងកូននៅឯសហរដ្ឋអាមេរិកនោះទេ ប៉ុន្តែថែមទាំងអាចមើលព័ត៌មានទៀតផង។

អ្នកស្រីបន្តថា៖ «ដំបូងមានការលំបាកដែរ ...ព្រោះមិនចេះអក្សរ ខ្មែរ ឬអង់គ្លេសអីទេ..ហើយពីមុនមកសូម្បីតបើកវិទ្យុហ្នឹង ក៏អត់ចេះផង...តែបានកូនក្មួយជួយប្រាប់ជួយណែនាំទៅ...ឥឡូវអាចខលទៅរកកូន បងប្អូននៅភ្នំពេញ បាត់ដំបង បានដោយខ្លួនឯង...ចូលចិត្តតាមដានព័ត៌មានតាមហ្វេសប៊ុកផងដែរ...មិនបាច់ចាំចំណាយពេលអង្គុយនៅមុខកញ្ចក់ទូរទស្សន៍ដូចមុនទៀតឡើយ»៕

អត្ថបទដោយ៖ ជិន វេន