មកដឹងអ្នកប្រដាល់ជួរមុខ ៤នាក់ ដែលមិនឡើងសង្វៀនសោះអំឡុង COVID-19

2020-05-14 03:45:11
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងពេលផ្ទុះជំងឺ COVID-19 រយៈពេលប៉ុន្មានខែនេះគឺឃើញមានកីឡាករកម្ពុជាជាច្រើនរូបមិនថាកីឡាករជួរមុខ ឬកីឡាករកម្រិតទី២ ទី៣ នោះទេតែងបង្ហាញមុខឡើងប្រកួតប៉ះខ្មែរគ្នាឯងលើសង្វៀននានា។ ប៉ុន្តែកីឡាករល្បីឈ្មោះចំនួនក៏មិនបានឡើងប្រកួតសោះដែរនាអំឡុងជំងឺនេះក្នុងនោះរួមមានដូចខាងក្រោម៖

កីឡាករ កែវ រំចង់

**ទី១ កីឡាករ កែវ រំចង់** អ្នកប្រដាល់ដើមកំណើតមកពីបាត់ដំបងដែលតែងតែឡើងសង្វៀនបាយ័នរូបនេះ ក៏មិនបានបង្ហាញមុខប្រកួតអំឡុងជំងឺ COVID-19 នេះទេ ខណៈការប្រកួតទាំងនេះគឺខ្មែរប៉ះខ្មែរ។ រំចង់ ធ្លាប់បាននិយាយពីមុនមកដែរថា ខ្លួនមិនប្រកួតជាមួយកីឡាករខ្មែរគ្នាឯងឡើយ។

កីឡាករ ម៉ឺន សុភា

ទី២ កីឡាករ ម៉ឺន សុភា អ្នកលេងកណ្ដាប់ដៃថ្មម្នាក់នេះក៏មិនបានឡើងសង្វៀនដែររយៈពេលប៉ុន្មានខែនេះ ពោលចាប់តាំងពីឡើងសង្វៀន១ប្រកួតនៅឯកភ្នំរួមមកគឺខានរហូតដល់បច្ចុប្បន្ន។ ណាមួយប្រពន្ធរបស់ ម៉ឺន សុភា ទើបនិងសម្រាលបុត្របានប៉ុន្មានខែនេះទេដូច្នេះអាចថារវល់ច្រើន។

កីឡាករ ហ៊ឹម សេរី

ទី៣ កីឡាករ ហ៊ឹម សេរី ជើងខ្លាំងទម្ងន់ស្រាលរូបនេះក៏មិនបានឡើងប្រកួតផងដែរមួយរយៈពេលនេះ។ គេធ្លាប់ឃើញអ្នកប្រដាល់ម្នាក់នេះឧស្សាហ៍បានប្រកួតណាស់ជាពិសេសនៅសង្វៀន CNC មុនពេលផ្ទុះជំងឺ COVID-19 ប៉ុន្តែឥលូវនេះក៏មិនបានបង្ហាញខ្លួននោះដែរ។

កីឡាករ សែន រ៉ាដេត

ទី៤ កីឡាករ សែន រ៉ាដេត អ្នកប្រដាល់សាច់សមកពីខេត្តកោះកុងម្នាក់នេះបានសម្រាកនៅឯស្រុកកំណើតតាំងពីជំងឺ COVID-19 ចាប់ផ្ដើមមកម្ល៉េះ។ ប៉ុន្តែថ្មីៗនេះឮដំណឹងពីលោក ស៊ន អេលីត ថាកីឡាកររូបនេះនឹងវិលមកកាន់សង្វៀនឆាប់ៗវិញដោយសុំហ្វឹកហាត់ឲ្យបានគ្រប់គ្រាន់សិន៕

អត្ថបទ៖ នួន ស៊ីណា