រំជួលចិត្តគ្រប់គ្នា! បុរសដែលជាប់គុក ៣៧ឆ្នាំទាំងគ្មានកំហុស ចូលប្រឡង America's Got Talent

2020-06-11 02:55:49
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសម្នាក់ឈ្មោះ Archie Williams បានប្រាប់គណៈកម្មការ America's Got Talent ថាខ្លួនបានជាប់គុករយៈពេល ៣៧ឆ្នាំ គិតចាប់ពីឆ្នាំ១៩៨២ មក ដោយសារទទួលរងការកាត់ក្ដីមិនត្រឹមត្រូវ។ បុរសនោះ បានណែនាំខ្លួន ប្រាប់គណៈកម្មការទាំង ៤ រួមទាំងទស្សនិកជន លើឆាក AGT 2020 កាលពីចុងខែឧសភាកន្លងទៅថា៖ "ខ្ញុំបានជាប់គុក ៣៧ឆ្នាំ ដោយសារបទឧក្រិដ្ឋដែលអ្នកផ្សេងប្រព្រឹត្ត។ DNA បានជួយឲ្យខ្ញុំមានសេរីភាពវិញ"។

Williams ដែលបច្ចុប្បន្នមានអាយុ ៥៩ឆ្នាំ បានពន្យល់បន្ថែមថា៖ "កាលពីព្រឹកថ្ងៃទី៩ ខែធ្នូ ឆ្នាំ១៩៨២ ស្រ្ដីស្បែក-ស អាយុ ៣០ឆ្នាំម្នាក់ ត្រូវបានគេរំលោភ និងចាក់សម្លាប់នៅផ្ទះរបស់នាង។ ខ្ញុំត្រូវបានគេចាប់ខ្លួននៅថ្ងៃទី៤ ខែមករា។ ខ្ញុំមិនជឿថាសោះ ថារឿងនោះបានកើតឡើង ដោយសារខ្ញុំមិនមានកំហុសអ្វីសោះ"។

Williams បានជាប់គុក រហូតដល់ឆ្នាំ ២០១៩ ទើបត្រូវបានដោះលែងវិញ ក្រោយគេរកឃើញភស្ដុតាងថ្មី តាមរយៈតេស្ដ DNA។ លោកបាននិយាយទៀតថា "វាជាសុបិនដ៏អាក្រក់បំផុតមួយ។ ខ្ញុំមិនបានប្រព្រឹត្តបទឧក្រិដ្ឋនោះទេ ប៉ុន្តែ ក្នុងនាមជាក្មេងជនជាតិស្បែកខ្មៅដ៏ក្រីក្រម្នាក់ ខ្ញុំមិនមានលទ្ធភាពថវិកា ដើម្បីប្ដឹងតវ៉ានៅរដ្ឋ Louisiana បានទេ។ នៅតុលាការ គ្មានស្នាមម្រាមដៃនៅកន្លែងកើតហេតុណាមួយ ដែលដូចស្នាមម្រាមដៃខ្ញុំនោះទេ។ ទោះជាបែបនេះក្ដី ខ្ញុំត្រូវបានតុលាការកាត់ទោសដាក់គុកមួយជីវិត។

សូមទស្សនាវីដេអូខាងក្រោម៖