ឡុង សុភី៖ កីឡាករគុនខ្មែរសម័យឥលូវល្បីតែមួយប្រាវឆាប់បាត់ទៅវិញព្រោះ...

2020-10-06 09:24:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ចាស់វស្សា ឡុង សុភី ថាក្មេងៗប្រដាល់សម័យនេះល្បីឈ្មោះមិនសូវបានយូរ ល្បីតែមួយប្រាវភាគច្រើនបាត់ទៅវិញហើយ ព្រោះមិនសូវហាត់ និងមានចរិតតួឯកខុសពីកីឡាករពីសម័យមុនៗ។

ឡុង សុភី (ក្រហម)

ឡុង សុភី បានឲ្យដឹងថា សម័យឥលូវនេះប្រដាល់គឺស្រួលច្រើន ដូចជាមានសង្វៀនច្រើន មានកម្មវិធីច្រើនដើម្បីបានប្រកួត មានឱកាសច្រើនក្នុងការបង្ហាញសមត្ថភាពរបស់ខ្លួនហើយក៏បានប្រាក់ច្រើនដែរ។

អ្នកប្រដាល់ដើមកំណើតពីខេត្តបាត់ដំបងខាងលើបន្តប្រាប់ថា ពីមុនទម្រាំបានឡើងប្រកួត ឬក្លាយជាគូឯកមិនងាយឡើយ ពោលទាល់តែខំប្រឹងហ្វឹកហាត់តស៊ូព្យាយាមណាស់ទើបមានឱកាសម្ដងៗ។ ខុសពីឥលូវកីឡាករស្រួលមានកម្មវិធីវ៉ៃច្រើន ឆាប់បានបង្ហាញមុខក៏ប៉ុន្តែល្បីក៏មិនសូវបានយូរដែរ ព្រោះមិនសូវព្យាយាមហ្វឹកហាត់ មិនសូវតស៊ូ ឆាប់អឺ ឬឆាប់មានចរិតតួឯក វ៉ៃបានលុយច្រើនលែងសូវគោរពគ្រូ។ តាមការសម្គាល់របស់ ឡុង សុភី មានកីឡាករច្រើនណាស់សម័យនេះល្បីឈ្មោះមិនបានយូរគឺធ្លាក់ទៅវិញ មិនដូចអ្នកប្រដាល់ជំនាន់មុនៗឡើយ។

ឡុង សុភី ពេលប៉ះ ពុទ្ធ ឆាយរិទ្ធី

រំលឹកដែរថា ឡុង សុភី ជាអ្នកប្រដាល់ចាស់វង្សា និងបានប្រឡូកក្នុងវិស័យប្រដាល់១៦ឆ្នាំមកហើយ តាំងពីជំនាន់ កែវ រំចង់ ឡៅ ស៊ីណាត ជាដើម។ បច្ចុប្បន្នកីឡាកររូបនេះបានដូរក្លឹបថ្មីគឺនៅជាមួយក្លឹប កុលបុត្រគុនខ្មែរខណ្ឌពោធិសែនជ័យ៕

អត្ថបទ៖ នួន ស៊ីណា