ពិតមែនទេ ស្រីស្អាត ឈូឈូ ទៅសម្ងំមកបើកហាងលក់គ្រឿងម្ជូរ!
- 2020-11-23 08:06:45
- ចំនួនមតិ 0 | ចំនួនចែករំលែក 0
ពិតមែនទេ ស្រីស្អាត ឈូឈូ ទៅសម្ងំមកបើកហាងលក់គ្រឿងម្ជូរ!
ចន្លោះមិនឃើញ
នៅប៉ុន្មានថ្ងៃមកនេះ តារាសម្តែងវ័យក្មេង ឈូឈូ បានធ្វើឱ្យមហាជនមានការចាប់អារម្មណ៍ជាថ្មី ក្រោយលេចរូបប៉ុន្មានសន្លឹកលើបណ្ដាញសង្គម ដោយគេឃើញនាង អង្គុយលក់គ្រឿងម្ជូរ ដែលធ្វើឱ្យមានការសង្ស័យក្មេងស្រីរូបនេះបង្កើតមុខរបរមួយទៀតគឺ បើកហាងលក់គ្រឿងម្ជូរដ៏ធំមួយកន្លែង។
រូបភាពទាំងនេះ បានលេចឡើងកាលពី២ថ្ងៃមុននេះ ក្នុងនោះ ឈូឈូ ជាមួយមិត្តភ័ក្ដិនាងម្នាក់ បានបង្ហាញសកម្មភាពក្នុងហាងលក់ម្ជូរធំមួយ។ វត្តមានរបស់តារាស្រីវ័យក្មេង មិនមែនជាអ្នកទិញនោះទេ ប៉ុន្តែនាងត្រូវគេសង្ស័យថា ជាម្ចាស់អាជីវកម្មត្រូវចិត្តយុវវ័យនេះ ព្រោះថា ពេលនោះ គឺនាងអង្គុយឡាយលក់គ្រឿងម្ជូរជាច្រើនប្រភេទនោះតែម្ដង។ ចំណុចនេះ បានធ្វើឲ្យទស្សនិកជន និងមហាជនជាច្រើននាំគ្នាចាប់អារម្មណ៍។
ក្នុងចំណោមនោះ ខ្លះក៏ឆ្ងល់ថាដែរថា សិល្បការិនីជាច្រើន និយមបើកហាងលក់ផលិតផលថែរក្សាសម្ផស្ស ឬហាងកែសម្ផស្សជាដើម ចម្លែកអីតែ ឈូឈូ មកចាប់យកមុខរបបលក់គ្រឿងម្ជូរ បន្ថែមទៀតក្រៅពីអាជីពសិល្បៈទៅវិញ។
ចំពោះបញ្ហានេះ ជាតារាស្រីវ័យក្មេងដែលបង្ហាញខ្លួនស្ទើរគ្រប់រឿងភាគទូរទស្សន៍នោះ នៅថ្ងៃនេះ បានចេញមកគូសបញ្ជាក់ ដោយទាត់ចោលការសង្ស័យទាំងឡាយដែលថា នាងគឺជាថៅកែហាងម្ជូរមួយនោះ។ សុជាតា ប្រាប់ថា នាងមិនមែនជាម្ចាស់ហាង ឬថៅកែអីទេ។
ថ្ងៃដែលនាងឡាយអង្គុយញាំម្ជូរ និងឡាយលក់នោះ គឺនាងគ្រាន់តែបំពេញការងាររបស់នាងប៉ុណ្ណោះ។ កូនស្រីរបស់ សឿន ផាភួង ប្រាប់ថា នាងគឺជាតារាស្រីតំណាងឱ្យហាងម្ជូរស្នាដៃសៀមរាបនោះ ដូច្នេះហើយ នាងក៏បានជួយផ្សព្វផ្សាយលក់ តាមការព្រមព្រៀងគ្នារវាងនាង និងម្ចាស់អាជីវកម្មទៅ។ យ៉ាងណាក៏ដោយ សុជាតា បានបដិសេធចំពោះការប្រាប់ពីតួលេខ ក្នុងកិច្ចព្រមព្រៀងក្នុងការងារខាងលើនោះទេ។
ចំពោះសំណួរដែលសួរថា តើនាងចង់បង្កើតអាជីវកម្មនេះដូចគ្នាឬអត់នាពេលខាងមុខ អាង សុជាតា ប្រាប់ថា មិនអាចទៅរួចទេ ព្រោះថា បច្ចុប្បន្ននាងមិនមានពេលវេលាគ្រប់គ្រាន់នោះទេ។ ត្បិតរាល់ថ្ងៃរវល់នឹងការងារ និងការថតរឿងស្ទើរតែគ្មានសម្រាកទៅហើយ។ ដូច្នេះហើយ នាងមិនទាន់គិតដល់រឿងការធ្វើអាជីវកម្មនោះទេ ព្រោះក្រៅពីរវល់នឹងការងារសិល្បៈ ដែលត្រូវថតស្ទើររាល់សប្ដាហ៍ នាងខ្លួនឯងក៏នៅខ្ចីសេចក្ដីដែរលើការងារនេះ។
ប៉ុន្តែទៅមុខ ពេលវេលាអំណោយផល មានលទ្ធភាពគ្រប់គ្រាន់ នាងអាចគិតពីការរកស៊ីបន្ថែមទៀតដែរ ត្បិតថាសិល្បៈមិនអាចចិញ្ចឹមខ្លួនមួយជីវិតនោះទេ៕