ធនធានអាចរកមេដាយស៊ីហ្គេម ២០២១ ប៉ុន្តែស្ដាយគ្រប់គ្នាអាចនឹងភ្លេចម្នាក់នោះ...

2021-03-05 07:40:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ចុងឆ្នាំ២០២១ នេះជាពេលដែលកម្ពុជាត្រូវចូលរួមប្រកួតប្រជែងមេដាយស៊ីហ្គេម ជាថ្មីទៀតហើយ ដោយឡែកកីឡាការិនីល្អទាត់ Samontha ប្រហែលជាមិនមានឱកាសក្នុងការចូលរួមនោះទេ ព្រោះសហព័ន្ធ Kick Boxing បង្ហើបឈ្មោះរួចហើយដែរ។

Samontha ពេលមកហាត់នៅខ្មែរ

ចំពោះអ្នកតាមដានប្រដាល់មួយចំនួនប្រហែលនៅចាំហើយក្មួយស្រីរបស់ កែវ រំចង់ ឈ្មោះថា Samontha ដែលធ្លាប់មកហ្វឹកហាត់គុនខ្មែរ និងធ្លាប់បានជួយកីឡាករមានទុក្ខលំបាកកាលពីប៉ុន្មានឆ្នាំមុន។ កីឡាការិនីរូបនេះក៏ធ្លាប់បានប្រកួតនៅលើទឹកដីថៃផងដែរពីមុនមក។

លោក Matt ដែលជាឪពុករបស់កីឡាការិនីខ្មែរ-អាមេរិក ខាងលើបានឲ្យដឹងថា កូនស្រីរបស់លោកគឺតែងតែហ្វឹកហាត់ជាប្រចាំ និងឆ្លៀតជួយបង្ហាត់បង្រៀនគុនខ្មែរក្នុងក្លឹបឯកជនមួយឯសហរដ្ឋអាមេរិកផងដែរ។ ដោយចង់ក្លាយជាជើងខ្លាំងគុនខ្មែរមួយរូប និងចង់ជួយផ្សព្វផ្សាយក្បាច់ខ្មែរ កូនស្រីរបស់លោកគឺតែងតែហ្វឹកហាត់ជាប្រចាំរហូតមកដល់បច្ចុប្បន្ន។ អ្វីដែលកត់សម្គាល់នោះ គឺលោកមើលឃើញថា Samontha មានការរីកចម្រើនសមត្ថភាពជាខ្លាំង។

Samontha ពេលមកហាត់នៅខ្មែរ

Matt បន្ថែមទៀតថា ប្រសិនបើកូនស្រីរបស់លោកអាចប្រកួតតំណាងកម្ពុជា លើប្រភេទវិញ្ញាសា Kick Boxing នេះជាឱកាសខ្ពស់ក្នុងការឈ្នះមេដាយ ព្រោះគេដឹងច្បាស់ពីរបៀបវ៉ៃបានពិន្ទុរួមផ្សំនិងភាពរហ័សរហួនផង។ មួយវិញទៀតទាំងការថែទាំកម្លាំង និងការហូបចុកបែបសុខភាព គឺសុទ្ធតែកូនស្រីរបស់លោកធ្វើបានល្អទាំងអស់។

Samontha ពេលមកហាត់នៅខ្មែរ

រំលឹកដែរថា ចុងឆ្នាំ២០២១ នេះព្រឹត្តិការណ៍ស៊ីហ្គេម លើកតី៣១ នឹងធ្វើឡើងនៅឯប្រទេសវៀតណាម ក្នុងនោះកម្ពុជាក៏នឹងត្រូវទៅចូលរួមប្រកួតប្រជែងផងដែរ។ ម្សិលមិញនេះលោក ជា រិទ្ធ គ្រូខាង Kick Boxing ក៏បង្ហើបថាមានកីឡាការិនីច្រើនរូបផងដែរដែលត្រូវជ្រើសរើសយកទៅប្រកួតក្នុងព្រឹត្តិការណ៍ខាងលើនេះ៕

អត្ថបទ៖ នួន ស៊ីណា