យោងតាមការវិភាគថ្មីមួយដែលចេញផ្សាយដោយ Cable.co.uk ដែលជាក្រុមហ៊ុនធ្វើការស្ទង់មតិប្រចាំឆ្នាំអំពីតម្លៃប្រើប្រាស់ទិន្នន័យទូរសព្ទចល័តពិភពលោក។ ប្រទេសកម្ពុជាមានតម្លៃទិន្នន័យទូរសព្ទទាបជាងគេបំផុតនៅក្នុងតំបន់។ Cable.co.uk ក៏បានធ្វើការត្រួតពិនិត្យតម្លៃទិន្នន័យទូរស័ព្ទចល័តនៅក្នុងប្រទេសនិងតំបន់ចំនួន ២២៨ ។ ជាលទ្ធផលកម្ពុជាជាប់ចំណាត់ថ្នាក់លេខ ១ នៅអាស៊ីអាគ្នេយ៍និងលេខ ៣ នៅអាស៊ី។មិនគួរឱ្យជឿតម្លៃនៅប្រទេសកម្ពុជាសម្រាប់ការចូលប្រើទិន្នន័យអ៊ីនធឺណិតចល័តនៅពេលនេះគឺប្រហែល ០.២ ដុល្លារអាមេរិកសម្រាប់អ៊ីនធឺណិតល្បឿនលឿន ១ ជីកាបៃ។

ការប្រកួតប្រជែងទីផ្សារគឺទាក់ទងទៅនឹងតម្លៃសមរម្យដែលមានស្រាប់ និងផ្តល់លទ្ធភាពដល់អ្នករាល់គ្នានូវសមត្ថភាពប្រើប្រាស់អ៊ីនធឺណិតជាមួយតម្លៃថោក។ ជាមធ្យមវាចំណាយត្រឹមប្រហែល ៤ ដុល្លារក្នុងមួយខែដែលស្មើនឹងថ្លៃផឹកកាហ្វេមួយឬពីរកែវ អតិថិជនអាចបំពេញតម្រូវការទាំងអស់បាន។ វាបានផ្តល់លទ្ធភាពដល់បុគ្គលម្នាក់ៗដើម្បីងាយស្រួលទទួលបានព័ត៌មាន ការអប់រំ ការងារ និងភាពរីករាយ។

ទន្ទឹមនឹងនេះអត្រាទិន្នន័យចល័តនៅបណ្តាប្រទេសអាស៊ីអាគ្នេយ៍ផ្សេងទៀតនៅតែខ្ពស់នៅឡើយសម្រាប់ការចូលប្រើទិន្នន័យសម្រាប់១ជីកាបៃ ជនជាតិឡាវត្រូវចំនាយ ៣,១៩ដុល្លារ ប្រ៊ុយណេ ២,២៣ដុល្លារ ហ្វីលីពីន ១,៧៧ដុល្លារ។ អ៊ីស្រាអែលជាប្រទេសដែលមានតម្លៃទិន្នន័យទូរសព្ទទាបជាងគេបំផុតនៅលើពិភពលោកដោយទិន្នន័យល្បឿនលឿនមានតម្លៃត្រឹមតែប្រមាណ ០.០៥ ដុល្លារក្នុងមួយជីកាបៃ បន្ទាប់មកកៀហ្ស៊ីស៊ីស្ថាន (០.១៥ ដុល្លារ) ហ្វីជី (០.១៩ ដុល្លារ) កម្ពុជាជាប់ចំណាត់ថ្នាក់លេខ ៤ នៅលើពិភពលោក (០.២ ដុល្លារ) ។

ផ្ទុយទៅវិញក្រុមប្រទេសនិងដែនដីចំនួន ៥ ដែលមានតម្លៃទិន្នន័យទូរសព្ទចល័តថ្លៃជាងគេបំផុតនៅលើពិភពលោកដូចជា ហ្គីណេអេក្វាទ័រ (៤៩.៦៧ ដុល្លារ) កោះហ្វក់ឡែន (៤៤.៥៦ ដុល្លារ) សាំងហេឡេណា (៣៩.៨៧ ដុល្លារ) សៅតូម៉េ និងប្រាំងស៊ីប (៣០.៩៧ ដុល្លារ) និងម៉ាឡាវី ( ២៥,៤៦ ដុល្លារ) ។ ក្នុងខែកក្កដា តាមចំណាត់ថ្នាក់ពី Speedtest.net ដែលជាគេហទំព័ររបស់ Ookla ដែលជាអ្នកផ្តល់សេវាកម្មវាយតម្លៃគុណភាពសេវាកម្មទិន្នន័យឈានមុខគេនៅលើពិភពលោកបានបង្ហាញថា ប្រទេសកម្ពុជាមានល្បឿនតភ្ជាប់បណ្តាញទូរសព្ទចល័តលឿនជាងគេទី ៨ នៅអាស៊ីអាគ្នេយ៍៕