សេន ប៊ុនថេន៖ ត្រេកអរបានឧកញ៉ា ប៉ែន កាក់ ក្លាយជាអនុប្រធានសហព័ន្ធចូលជួយគុនខ្មែរ

2021-12-16 08:25:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតអ្នកប្រដាល់គុនខ្មែរ សេន ប៊ុនថេន មានចិត្តត្រេកអរជាខ្លាំងពេលលោកឧកញ៉ា ប៉ែន កាក់ ក្លាយជាអនុប្រធានសហព័ន្ធប្រដាល់គុនខ្មែរដើម្បីចូលរួមជួយលើកស្ទួយវិស័យកីឡាឆ្ពោះទៅរកភាពរីកចម្រើនបន្ថែមទៀត។ .

ឧកញ៉ា ប៉ែន កាក់

សេន ប៊ុនថេន បានឲ្យដឹងថា លោកពិតជាសប្បាយចិត្តដែលមានមនុស្សល្អៗស្រឡាញ់គុនខ្មែរពិតប្រាកដចូលរួមជួយប្រដាល់គុនខ្មែរដូចជាឧកញ៉ា ប៉ែន កាក់ នេះជាដើម។ កន្លងទៅដូចដឹងស្រាប់ហើយថា លោកឧកញ៉ាតែងតែជួយក្នុងវិស័យប្រដាល់នេះដូចជាពេលកីឡាករបាក់បែកជួយដល់ថ្លៃព្យាបាល ជួយឧបត្ថម្ភជាថវិកាលើកទឹកចិត្ត និងសម្ភារគ្រឿងឧបភោគបរិភោគជាច្រើន។

ឧកញ៉ា ប៉ែន កាក់ និងគ្រួសារ សេន ប៊ុនថេន

គ្រូប្រដាល់ជម្រើសជាតិរូបនេះបន្ថែមទៀតថា ចំពោះការជួយដល់ក្លឹបបែនកាក់គុនខ្មែរវិញ លោកឧកញ៉ាចំណាយខ្ទង់១០០០ដុល្លារសម្រាប់ការប្រើប្រាស់ផ្សេងៗទាំងការហូបចុកជាដើម។ ដូច្នេះសម្រាប់ការក្លាយជាអនុប្រធានសហព័ន្ធគុនខ្មែរនៅពេលនេះជឿជាក់ថានឹងសំបូរធនធានកីឡាករបន្ថែម និងរីកចម្រើនលើសមត្ថភាពប្រកួតទៀតផង។

ទិដ្ឋភាពជុំគ្នាទាំងគុនខ្មែរ និង Kick Boxing

រំលឹកដែរថា មហាសន្និបាតអាណត្តិទី៧ (២០២១-២០២៥) កាលពីពេលថ្មីៗនេះគឺបានតែងតាំងលោកឧកញ៉ា ប៉ែន កាក់ ជាអនុប្រធានសហព័ន្ធ។ លោកឧកញ៉ាក៏ជាម្ចាស់ក្លឹបប៉ែនកាក់គុនខ្មែរផងដែរ ដែលក្លឹបមួយនេះកំពុងបណ្ដុះបានកីឡាករល្អៗវ័យក្មេងនាពេលបច្ចុប្បន្នជាច្រើន៕