នេះហើយជើងឯកជើងឯករងពានរង្វាន់ «ក្រុមអធិរាជបាល់ទះ ISI PIPE-ISI PALM» ប្រចាំខែទី១និងទី២

2022-02-02 07:23:40
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួតដណ្ដើមមេដាយមាសនៃពានរង្វាន់ «ក្រុមអធិរាជបាល់ទះ ISI PIPE-ISI PALM» បានរកឃើញក្រុមជើងឯកនិងជើងឯករងចំនួនបួនក្រុមហើយ នៅឡើយបួនក្រុមទៀតដែលនឹងចាប់ផ្ដើមក្នុងពេលឆាប់ៗខាងមុខ។

ក្រសួងមហាផ្ទៃ A លេខ១ និងក្លឹបស្នងការលេខ២ ប្រចាំខែទី១

ក្រុមជើងឯកប្រចាំខែទី១ បានលើក្លឹបបាល់ទះក្រសួងមហាផ្ទៃ A ក្រោយទម្លាក់ក្លឹបជើងខ្លាំងស្នងការដ្ឋាននគរបាលរាជធានីភ្នំពេញក្នុងលទ្ធផល២សិតសូន្យ កាលពីខែធ្នូ ឆ្នាំ២០២១។

ក្នុងនាមជាជើងឯកប្រចាំខែទី១ ក្លឹបបាល់ទះក្រសួងមហាផ្ទៃ A ទទួលបានប្រាក់រង្វាន់៦លានរៀល លេខ២ទទួលបានប្រាក់រង្វាន់ ២លាន ៨០ម៉ឺនរៀល ខណៈលេខ៣ទទួលបានរង្វាន់លើកទឹកចិត្តមួយចំនួន។

យ៉ាងណាមិញក្រុមជើងឯកប្រចាំខែទី២ ដែលទើបបញ្ចប់ទៅនៅខែមករាដើមឆ្នាំ២០២២នេះ បានទៅលើក្រុមបាល់ទះបុរីឃាមបញ្ញា ក្រោយទម្លាក់ក្រុមបុរីតាប៉ាកបាំង្គសីក្នុងលទ្ធផល២សិតសូន្យ។

សិតទីមួយជាសិតស្វិតស្វាញបំផុត ព្រោះថាក្រុមទាំងពីរបានធ្វើការប្រកួតប្រជែងអស់ពីសមត្ថភាពនិងល្អមើលខ្លាំង ប៉ុន្តែក្រុមបាល់ទះបុរីឃាមបញ្ញាធ្វើបានល្អជាង ដោយបានយកឈ្នះក្រុមបុរីតាប៉ាកបាំង្គសីក្នុងលទ្ធផលពិន្ទុ ១៥ ទល់នឹង ១២ ចំណែកសិតទី២ឈ្នះ ១៥ ទល់នឹង ៥។ សម្រាប់ប្រាក់រង្វាន់ជើងឯក ជើងឯករងប្រចាំខែទី២ គឺដូចទៅនឹងជើងឯកជើងឯករងប្រចាំខែទី១ដែរ។

ក្រុមបាល់ទះបុរីឃាមបញ្ញាលេខ១ប្រចាំខែទី២

ក្រុមបាល់ទះបុរីតាប៉ាកបាំង្គសីលេខ២ប្រចាំខែទី២

គួរបញ្ជាក់ថា ការប្រកួតដណ្ដើមពានរង្វាន់ «ក្រុមអធិរាជបាល់ទះ ISI PIPE-ISI PALM» នៅមិនទាន់ចប់ទេ ពោលគឺនៅរកជើងឯកនិងជើងឯករងប្រចាំខែទី៣ និងទី៤បន្តទៀត មុនដល់វគ្គផ្ដាច់ព្រ័ត្រនៅខែទី៥ ដោយត្រូវយកលេខ១ និងលេខ២ប្រចាំខែនីមួយៗចាប់ឆ្នោតប្រកួតជម្រុះចាញ់ធ្លាក់ ដណ្ដើមប្រាក់រង្វាន់ធំ ២០ លានរៀល និង ១០ លានរៀល សម្រាប់ក្រុមជើងឯក និងជើងឯករង៕

អត្ថបទ៖ អ៊ុំ សុភក្តិ