ដឹងមូលហេតុចម្បងៗ អេ អាំងម៉ារីនភូថង សន្លប់ព្រឹកមិញ និងរឹតតែអាណិតខំបន្តវៃឲ្យចប់ទឹក

2023-05-07 05:47:15
ចំនួនមតិ 0 | ចំនួនចែករំលែក 0

ចន្លោះមិនឃើញ

មូលហេតុចម្បងដែលនាំឲ្យកីឡាករល្បីឈ្មោះ អេ អាំម៉ារីនភូថង ឈានដល់សន្លប់យកទៅសង្គ្រោះនៅមន្ទីរពេទ្យព្រឹកមិញនេះទី១ សម្រក់ទម្ងន់ច្រើនខ្លាំងពេក ទី២ ថ្លឹងភ្លាមវ៉ៃភ្លាម ទី៣ មិនសូវមានកម្លាំងហើយប្រឹងខ្លាំង។

អាំងម៉ារីនភូថង ព្រឹកមិញ(រូបភាពហ្វេសបុក មេឃា)

នេះបើតាមការឲ្យដឹងពី ម៉ឺន មេឃា ដែលជាបងប្រុសរបស់ អាម៉ារីនភូថង មុននេះបានបញ្ជាក់ថា នៅពេលនេះប្អូនរបស់ខ្លួនធូរស្រាលឡើងវិញហើយ ប៉ុន្តែនៅមន្ទីរពេទ្យនៅឡើយទេ។ ចំពោះការសន្លប់នេះគឺដោយសារតែការសម្រក់ទម្ងន់ច្រើនពេក។

មេឃា លើកឡើងទៀតថា គីឡូពេញរបស់ អេ អាំងម៉ារីនភូថង គឺរហូតដល់ ៦៨គីឡូឯណោះ ប៉ុន្តែកាលពីហាត់នៅវៀតណាមចាប់ផ្ដើមសម្រក់ជាបណ្ដើរៗដូចគ្នា។ យ៉ាងណាបន្ទាប់ពីមកពីវៀតណាមវិញប្អូនរបស់ខ្លួនក៏ឡើងទម្ងន់រហូតដល់ ៦៥គីឡូវិញ ដូច្នេះក៏នាំឲ្យពិបាក និងត្រូវធ្វើការសម្រក់ម្ដងទៀត។

កីឡាករ មេឃា

មួយវិញទៀតដោយសារតែត្រូវសម្រក់ទម្ងន់ដើម្បីទម្លាក់ចុះមកត្រឹម ៥៩-៦០ គីឡូក្រាមនៅព្រឹកនេះ ហើយត្រូវប្រកួតភ្លាមៗ (ខ្ទង់ម៉ោង ៨ព្រឹក) ធ្វើឲ្យអស់កម្លាំងខ្លាំងហេតុនេះហើយកម្លាំងមិនអាចឡើងវិញបានភ្លាមៗដូចគ្នា។ ដូច្នេះការអស់កម្លាំងខ្លាំង និងការខំប្រឹងប្រកួតទៀតនោះនាំឲ្យរូបគេឈានដល់សន្លប់ ចង់គាំងនៅពេលក្រោយប្រកួតព្រឹកមិញនេះ។

អេ អាំងម៉ារីនភូថង និងបងៗ

កូនប្រុសលោក អេ ភូថង រូបនេះបន្ថែមទៀតថា ខ្លួនផ្ទាល់ គ្រូ និងមិត្តជម្រើសជាតិឲ្យ អេ អាំងម៉ារីភូថង បញ្ឈប់ការប្រកួតតាំងពីទឹកទី២ មកម្ល៉េះ។ ប៉ុន្តែប្អូនប្រុសមិនចង់ឈប់ និងធ្វើម៉េចខំប្រឹងបន្តប្រកួតទាល់តែចប់ទឹក ចប់ចុងចប់ដើម។ បញ្ជាក់ដែរថា ព្រឹកមិញនេះកីឡាករ អេ អាំងម៉ារីនភូថង បានចាញ់កីឡាករវៀតណាមដោយពិន្ទុលើវិញ្ញាសាប្រយុទ្ធទម្ងន់ ៦០គីឡូក្រាម ប្រភេទកីឡាវ៉ូវីណាម។ ដោយឡែកក្រោយប្រកួតកីឡាកររូបនេះត្រូវពេទ្យសង្គ្រោះបន្ទាប់ភ្លាមៗ៕

អត្ថបទ៖ នួន ស៊ីណា