សង្វៀនបាយ័នជាកន្លែងផ្ដល់ឱកាស និងបណ្ដុះធនធាន ខណៈកម្មវិធីខ្សែក្រវាត់ខារ៉ាបាវឈានដល់រដូវកាលទី១១

2024-05-06 04:56:01
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក នាង ស៊ីវុត្ថា តំណាងអ្នកផ្គូផ្គងប្រដាល់នៅទូរទស្សន៍បាយ័នថា ទីនេះគឺជាកន្លែងផ្ដល់ឱកាសដល់កីឡាករថ្មីៗ និងមិនទាន់ល្បីជាច្រើនរហូតឥលូវនេះដៃគូសហការក្រុមហ៊ុនខារ៉ាបាវនៅតែបន្តលើកស្ទូយគុនខ្មែរ ខណៈពេលនេះកម្មវិធីដណ្ដើមខ្សែក្រវាត់ឈានដល់រដូវកាលទី១១។

សន្និសីទសារព័ត៌មាន

តំណាងអ្នកផ្គូផ្គងប្រដាល់នៅទូរទស្សន៍បាយ័នខាងលើបានឲ្យដឹងក្នុងសន្និសីទសារព័ត៌មានម្សិលមិញនេះថា ដៃគូសហការឧបត្ថម្ភខារ៉ាបាវគិតមកដល់ពេលនេះគឺធ្វើការជាមួយគ្នាខ្ទង់ ១០ឆ្នាំមកហើយដោយនៅតែបន្តទុកចិត្តរហូតមក។ រយៈពេលដ៏យូរនេះបាយ័ន និងខារ៉ាបាវ បានបណ្ដុះធនធានជាច្រើន និងផ្ដល់ឱកាសដល់កីឡាករថ្មីៗ មិនទាន់ល្បីបានប្រកួតយកបទពិសោធរហូតឈានដល់មានកេរ្តិ៍ឈ្មោះល្បីទូទាំងប្រទេសផងដែរនាពេលកន្លងមក។

កម្មវិធីប្រដាល់ខារ៉ាបាវ

ការប្រកួតខ្សែក្រវាត់រដូវកាលទី១១ នេះគឺមិនខុសពីមុននោះឡើយ ពោលបេក្ខភាព និងកីឡាករដែលបានមកចូលរួមនៅទីនេះនឹងមានកេរ្តី៍ឈ្មោះ មានការគាំទ្រពីមហាជន និងមានទីផ្សារប្រកួតកាន់តែច្រើននៅកម្ពុជា។ លោក នាង ស៊ីវុត្ថា ថ្លែងអំណរគុណដល់ខារ៉ាបាវ និងអ្នកស្រឡាញ់គាំទ្រសង្វៀនបាយ័នកន្លងមកពីខាងស្ថានីយទទួលជានិច្ចចំពោះការរិះគន់ និងសំណូមពររបស់មហាជនក្នុងគោលបំណងឲ្យកម្មវិធីរឹតតែល្អប្រសើរពីមួយកម្រិតទៅមួយកម្រិត។

កម្មវិធីប្រដាល់ខារ៉ាបាវ

បញ្ជាក់ដែរថា យប់ម្សិលមិញនេះស្ថានីយទូរទស្សន៍បាយ័នបានធ្វើសន្និសីទសារព័ត៌មានប្រកាសការប្រកួតដណ្ដើមខ្សែក្រវាត់ខារ៉ាបាវរដូវកាលទី១១ លើប្រភេទទម្ងន់ ៦០គីឡូក្រាមដោយចែកជា២ពូល ខ្មែរ-ថៃ។ បេក្ខភាពកីឡាករខ្មែរចូលរួមរួមមាន មាស ប៊ុនថេន ផន លីហួរ រិទ្ធី សូសែន សេក គឹមសាន្ត ចំណែកថៃគឺ Sensakngern Petchsawath Suephokao Buakao Sor.Sor។ ការប្រកួតនេះធ្វើឡើងចាប់ពីថ្ងៃទី៥ ខែឧសភា ដល់ទី១៨ ខែសីហា ឆ្នាំ២០២៤៕

អត្ថបទ៖ នួន ស៊ីណា