Alvarez ចែកផ្លូវជាមួយ Man City

2024-08-06 13:46:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Julian Alvarez នឹងចែកផ្លូវជាមួយ Manchester City ហើយនឹងមកចូលរួមជាមួយក្លឹបអេស្ប៉ាញ Atletico Madrid។

យោងតាមការចុះផ្សាយរបស់សារព័ត៌មានធំៗដូចជា BBC ជាដើម បានឲ្យដឹងក្លឹប Man City និង Atletico Marid បានឯកភាពរឿងតម្លៃផ្ទេរហើយ គិតមកទល់ពេលនេះ គឺរង្វង់សរុបប្រមាណជិត ១០០ លានដុល្លារសហរដ្ឋអាមេរិក។ ក្លឹបទាំងពីរកំពុងចរចាលើបញ្ហាសំខាន់ៗមួយចំនួនដើម្បីបិទបញ្ចប់ការផ្ទេរនេះ ខណៈពេលអារម្មណ៍នៃការចរចាគឺវិជ្ជមាន។

ដោយឡែកក្លឹប Atletico ក៏កំពុងបើកការចរចាជាមួយភាគីកីឡាករវ័យ ២៤ ឆ្នាំ Alvarez ផ្ទាល់។ យោងតាមដំណឹងល្ហិចល្ហៀងមួយចំនួន កុងត្រាដែល AT Madrid នឹងផ្ដល់ឲ្យ Alvarez គឺមានរយៈពេលដល់ ៥ ឆ្នាំ ក្នុងទំហំទឹកប្រាក់ឈ្នួលជាច្រើន។ បើតាមដំណឹងដដែល ខាងកីឡាករនឹងឯកភាពនឹងសំណើនេះ រួចនឹងហោះទៅអេស្ប៉ាញនាពេលឆាប់ៗដើម្បីពិនិត្យសុខភាព និងផ្ទេរចូលរួមជាមួយក្លឹបយក្សអេស្ប៉ាញជាផ្លូវការ។

គិតចាប់ពីចូលរួមជាមួយក្លឹបកាលពី ២០២២ មក ខ្សែប្រយុទ្ធ Julian Alvarez លេងសរុប ១០៣ ប្រកួត និងស៊ុតចូល ៣៦ គ្រាប់ឲ្យក្លឹប Manchester City និងឈ្នះពានធំៗជាច្រើនជាមួយក្លឹបដូចជា ពានលីគកំពូលអង់គ្លេស ពាន FA Cup និងពាន UEFA Champions League។ កីឡាកររូបនេះ គឺជាកីឡាករដ៏សំខាន់មួយរូបរបស់ក្លឹប តែដោយចង់លេងច្រើនប្រកួតជាងនៅ Man City កីឡាករក៏ចង់ចាកចេញពីក្លឹប ដើម្បីទៅរកក្លឹបណាដែលផ្ដល់តួនាទីស្នួលឲ្យរូបគេជាខ្សែប្រយុទ្ធបង្គោលរបស់ក្លឹប។ នៅ Man City បច្ចុប្បន្ន ខ្សែប្រយុទ្ធ Erling Haaland គឺជាខ្សែប្រយុទ្ធបង្គោលរបស់ក្លឹប។

យ៉ាងនេះក្ដី យោងតាមរបាយការណ៍ចុះផ្សាយចុងក្រោយ ការចាកចេញរបស់ខ្សែប្រយុទ្ធ Alvarez គឺនឹងធ្វើឲ្យអ្នកចាត់ការក្លឹប Manchester City លោក Pep Guardiola នឹងបើកយុទ្ធនាការស្វែងរកកីឡាករប្រយុទ្ធឆ្នើមមួយរូប ដើម្បីមកជំនួស Alvarez។ គិតមកទល់ពេលនេះ មិនទាន់មានការលើកឡើងណាមួយទេ ថាកីឡាករនោះគឺជាកីឡាកររូបណា៕