ស្ងាត់ៗ AT Madrid បើកយុទ្ធនាការសម្រុកទិញកីឡាករ

2024-08-09 13:04:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបយក្សអេស្ប៉ាញ Atletico Madrid កំពុងបើកយុទ្ធនាការសម្រុកទិញកីឡាករ ខណៈទីផ្សារដោះដូរកីឡាករនឹងបិទបញ្ចប់នៅថ្ងៃទី ៣០ ខែសីហាខាងមុខ។

បើទោះជាទីផ្សារដោះដូរកីឡាកររដូវកាលនេះ បានចាប់ផ្ដើមបើកតាំងពីខែមិថុនាកន្លងទៅក៏ដោយ បើគិតត្រឹមបំណាច់ខែកក្កដាទៅមិញនេះ ក្លឹប AT Madrid មិនបាននាំចូលកីឡាករសូម្បីតែម្នាក់។

ទោះជាយ៉ាងណា និន្នាការនេះបានផ្លាស់ប្ដូរយ៉ាងរហ័សចាប់ពីដើមខែសីហានេះមក។ ក្នុងរយៈពេលដ៏ខ្លី ក្លឹបផ្ទេរបានសម្រេចកីឡាករចំនួន ២ រូបទៅហើយ ម្នាក់គឺខ្សែការពារបារាំងវ័យ ២៧ ឆ្នាំ Robin Le Normand ពីក្លឹប Real Sociedad ឯមួយរូបទៀត គឺខ្សែប្រយុទ្ធន័រវែសវ័យ ២៨ ឆ្នាំ Alexander Sorloth ពីក្លឹប Villarreal។ មិនតែប៉ុណ្ណោះ យោងតាមរបាយការណ៍គួរទុកបានចុងក្រោយមួយចំនួន ក្លឹបខិតកាន់តែជិតក្នុងការផ្ទេរចូលខ្សែប្រយុទ្ធអាហ្សង់ទីន Julian Alvarez ពីក្លឹបយក្សមេឃខៀវ Manchester City និងខ្សែបម្រើអង់គ្លេស Conor Gallagher ពីក្លឹប Chelsea។ កីឡាករទាំងពីរសុទ្ធតែជាកីឡាករវ័យក្មេង ហើយបច្ចុប្បន្នមានវ័យ ២៤ ឆ្នាំ។ កីឡាករទាំងពីរគ្រោងនឹងមកចូលរួមជាមួយ AT Madrid ក្នុងពេលឆាប់ៗនេះ ក្រោយក្លឹបអេស្ប៉ាញបានឯកភាពនឹងថ្លៃផ្ទេររួចរាល់ហើយ។

Atletico Madrid នឹងចំណាយប្រមាណ ១០០ លានដុល្លារសហរដ្ឋអាមេរិកសម្រាប់ Julian Alvarez និងរង្វង់ ៤៥ លានដុល្លារសហរដ្ឋអាមេរិកសម្រាប់ Conor Gallagher។

បើតាមការចុះផ្សាយរបស់ Goal ក្លឹប Atletico Madrid គ្រោងនឹងនាំចូលកីឡាករមួយចំនួនទៀត ជាពិសេស ខ្សែការពារ និងខ្សែបម្រើ មុនដំណាច់ទីផ្សារដោះដូរកីឡាករនាចុងខែនេះ។

យោងតាមការវិភាគនៃប្រភពដដែល បានកត់សម្គាល់ថាអ្វីដែល AT Madrid កំពុងធ្វើ គឺជាយុទ្ធសាស្ត្រផ្ទេររបស់ក្លឹប ដើម្បីពង្រឹងភាពប្រកួតប្រជែងរបស់ក្លឹប។ កាលពីរដូវកាលមុន ក្លឹបធ្លាក់ទម្រង់លេងយ៉ាងខ្លាំង ហើយសមត្ថភាពប្រជែងពានធ្លាក់ចុះក្នុងលីគកំពូលអេស្ប៉ាញ និងកម្មវិធី Champions League។

ហេតុដូច្នេះហើយ ទើបក្លឹបប្រើប្រាស់រយៈពេលពាក់កណ្ដាលដំបូងនៃទីផ្សារដោះដូរលើកនេះ ក្នុងការជម្រុះចេញកីឡាករមួយចំនួនដូចជា បណ្ដោយឲ្យកីឡាករមួយចំនួនផុតកុងត្រា និងលក់កីឡាករខ្លះចេញដូចជា Alvaro Morata ជាដើមទៅក្លឹប AC Milan ក្នុងតម្លៃប្រមាណ ១៥ លានដុល្លារសហរដ្ឋអាមេរិក។ ការផ្ទេរចេញទាំងអស់នេះ បង្កលទ្ធភាពឲ្យ AT Madrid មានកម្លាំងជាថ្មីក្នុងការនាំចូលកីឡាករថ្មីៗចំគោលដៅយ៉ាងឆាប់រហ័សតាមការចង់បានរបស់អ្នកចាត់ការ Diego Simone។