ការផ្ទេររបស់ Osimhen ពិតជាគួរឲ្យភ្ញាក់ផ្អើល

2024-09-06 13:48:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេញមួយរដូវកាលដោះដូរកីឡាករជាង ២ ខែកន្លងទៅនេះ ក្លឹបចំនួនពីរ ក្នុងមួយគឺក្លឹប Chelsea ហើយមួយទៀតគឺក្លឹបអារ៉ាប៊ីសាអ៊ូឌីត Al Ahli ប្រទាញប្រទង់គ្នាដណ្ដើម យកខ្សែប្រយុទ្ធឆ្នើម Victor Osimhen ពីក្លឹបអ៊ីតាលី Napoli។ ចុងបញ្ចប់កីឡាករសញ្ជាតិនីហ្សេរីយ៉ាវ័យ ២៥ ឆ្នាំរូបនេះ បានទៅចូលរួមជាមួយក្លឹបទួរគីក្នុងនាមជាកីឡាករខ្ចីជើងទៅវិញ។ ខាងក្រោមជាដំណើរដើមទងនៃស្ថានភាពផ្ទេរគួរឲ្យភ្ញាក់ផ្អើលមួយនេះ។

ខ្សែប្រយុទ្ធ Victor Osimhen បានមកចូលរួមជាមួយក្លឹប Napoli កាលពីឆ្នាំ ២០២០ ពីក្លឹបបារាំង Lille។ នៅអ៊ីតាលី កីឡាករបានបង្ហាញទម្រង់លេងយ៉ាងល្អ។ កីឡាករលេងសរុប ១៣៣ ប្រកួត និងស៊ុតចូលដល់ទៅ ៧៦ គ្រាប់។ ជាពិសេសក្នុងរដូវកាល ២០២២/២០២៣ ខ្សែប្រយុទ្ធនីហ្សេរីយ៉ារកបានដល់ ៣១ គ្រាប់ឯណោះ ក្នុងចំណោមការប្រកួតសរុប ៣៩ លើក និងបានជួយក្លឹប Napoli លើកពានលីគកំពូលអ៊ីតាលីជាលើកដំបូងក្នុងរយៈពេលជាង ៣០ ឆ្នាំ។ ទម្រង់លេងយ៉ាងគាប់ប្រសើរនេះ ធ្វើឲ្យកីឡាករឡើងតម្លៃខ្លួនជាខ្លាំង។ ក្លឹប និងកីឡាករក៏ឯកភាពកុងត្រាថ្មីដែលមានសុពលភាពដល់ឆ្នាំ ២០២៦ និងឡើងប្រាក់ឈ្នួលជាគំហុករហូតដល់ ១២ លានដុល្លារក្នុងមួយឆ្នាំ។ កុងត្រាថ្មីត្រូវបានចុះហត្ថលេខានៅខែធ្នូ ឆ្នាំ ២០២៣។

យ៉ាងនេះក្ដី ទម្រង់លេងរបស់ Osimhen បន្តនៅល្អ ទោះស៊ុតចូលតិចជាងមុនក្នុងរដូវកាល ២០២៣/២០២៤។ យ៉ាងនេះក្ដី Osimhen ចង់ស្វែងរកទំព័រថ្មីក្នុងអាជីពបាល់ទាត់ខ្លួន រួចក៏បានស្នើសុំ Napoli ជាផ្លូវការក្នុងការបើកផ្លូវឲ្យរូបគេទៅក្លឹបថ្មី។ សកម្មភាពនេះធ្វើឲ្យទំនាក់ទំនងរវាង Osimhen និង Napoli ប្រេះឆាមិនអាចជានាគ្នាបាន។ Osimhen ត្រូវតែចេញពី Napoli ក្នុងរដូវកាលផ្ទេរនេះ។ សំណួរសួរថារូបគេនឹងទៅក្លឹបណា?

ក្នុងទីផ្សារដោះដូរលើកនេះ ទាំង Chelsea និងទាំង Al Ahli បានប្រឹងប្រែងប្រជែងយក Osimhen។ Napoli បានឯកភាពក្រៅផ្លូវការជាមួយតោខៀវ រឿងតម្លៃផ្ទេរគឺប្រមាណជិត ៩០ លានដុល្លារសហរដ្ឋអាមេរិក។ យ៉ាងនេះក្ដី Chelsea បានស្នើប្រាក់ឈ្នួលតិចទៅឲ្យ Osimhen ប្រមាណត្រឹម ៥ លានដុល្លារប៉ុណ្ណោះក្នុងមួយឆ្នាំ តែរយៈពេលកុងត្រាវែង (អាច ៦ ទៅ ៧ ឆ្នាំឯណោះ)។ Osimhen មិនព្រម ហើយទារប្រាក់ឈ្នួលពី Chelsea ដល់ទៅជាង ៣០ លានដុល្លារឯណោះក្នុងមួយឆ្នាំ។ ការទាមទារនេះ ត្រូវបានបដិសេធដោយតោខៀវ ទោះខំបញ្ចុះបញ្ចូលខាងកីឡាករឲ្យគិតគូរឡើងវិញយ៉ាងណាក៏ដោយ។ ការចរចានេះត្រូវបានបរាជ័យ។

ដោយឡែក Al Ahli វិញ ហ៊ានឯកភាពថ្លៃផ្ទេរជាមួយ Napoli ប្រមាណជិត ៩០ លានដុល្លារ ហើយហ៊ានឲ្យប្រាក់ឈ្នួល Osimhen ដល់ទៅជាង ៤០ លានដុល្លារឯណោះក្នុងមួយឆ្នាំ។ ភាគី Osimhen ពេញចិត្តនឹងទំហំប្រាក់ឈ្នួល តែអល់ឯកព្រោះកីឡាករចង់បន្តលេងនៅក្លឹបធំៗនៅអឺរ៉ុប។ ណាមួយទៀត ដោយមូលហេតុមួយចំនួន នៅសុខៗនានាទីចុងក្រោយស្រាប់តែ Napoli តំឡើងថ្លៃផ្ទេរទៅ ១០០ លានដុល្លារ បើទោះជាតម្លៃផ្ទេរដើមត្រូវបានឯកភាពគ្នារួចទៅហើយ។ ក្លឹបអារ៉ាប៊ីសាអ៊ូឌីតត្រូវបានរាយការណ៍ថាមានការខឹងសម្បារយ៉ាងខ្លាំងពីការក្រឡាស់សម្ដីមួយនេះ ហើយបញ្ចប់ការចរចាភ្លាមៗតែម្ដង។

ការផ្ទេរទាំងពីរនេះ គឺបរាជ័យនាពេលដំណាលគ្នានៅពេលទីផ្សារដោះដូរបានបិទបញ្ចប់នាចុងខែសីហាកន្លងទៅ។ Osimhen ត្រូវបន្តនៅ Napoli។ ការណ៍នេះបង្កការលំបាកយ៉ាងខ្លាំង ព្រោះទំនាក់ទំនងរវាងកីឡាករ និងក្លឹបបានប្រេះឆារួចបាត់ទៅហើយ។ Osimhen ចង់ចេញទៅក្លឹបផ្សេង ឯ Napoliមិនត្រូវការ Osimhen ទៀតទេ។

ចុងបញ្ចប់ ក៏ស្រាប់តែលេចឡើងនូវក្លឹបទួរគី Galatasaray ដាក់សំណើផ្ទេរយក Osimhen ក្នុងនាមជាកីឡាករខ្ចីជើង។ ក្លឹបទួរគីមួយនេះធ្វើដូច្នេះបាន ក៏ដោយសារតែនៅលីគទួរគី ទីផ្សារដោះដូរកីឡាករបិទនៅថ្ងៃទី ១២ ខែកញ្ញាឯណោះ ពោលគឺយូរជាងលីគអឺរ៉ុបធំៗដទៃទៀត។ គ្មានជម្រើស ទាំង Napoli និង Osimhen ក៏ឯកភាពសំណើនេះ។

ចុងបញ្ចប់ Osimhen ក្លាយជាកីឡាករខ្ចីជើងរបស់ក្លឹប Galatasaray រយៈពេលមួយរដូវកាល។ យ៉ាងនេះក្ដី Osimhen និងក្លឹប Galatasaray ត្រូវបានរាយការណ៍ថា មានកិច្ចសន្យាពិសេសដែលបើកផ្លូវឲ្យ កីឡាកររូបនេះចេញ បើមានក្លឹបផ្សេងចង់បាន នៅទីផ្សារដោះដូរខែមករាខាងមុខ ក្នុងករណីមានការឯកភាពថ្លៃផ្ទេរពីក្លឹបអ្នកទិញ និងក្លឹប Napoli៕

ប្រភព៖ Goal អត្ថបទ៖ សេរី មង្គល