Pep ៖ ពិតណាស់ខ្ញុំពិតជាបារម្ភសម្រាប់ការចាកចេញរបស់ Ederson

2024-10-08 02:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

«វាជាការពិតខ្ញុំពិតជាមានការបារម្ភ សម្រាប់ការចាកចេញរបស់អ្នកចាំទី Ederson Moraes គេជាកីឡាករដ៏សំខាន់ក្នុងក្រុម យើងពិតជាសំណាងដែលមានគេក្នុងក្រុម»។ នេះជាការលើកឡើងរបស់លោក Pep Guardiola អ្នកចាត់ការរបស់ក្រុមមេឃខៀវ Manchester City ។

គិតមកដល់់ពេលនេះមានក្លឹប PSG និង ក្លឹបនៅអារ៉ាប៊ីសាអ៊ូឌីតជាដើម បានចាប់អារម្មណ៍ និងកំពុងតែតាមចែចូវនាំយកអ្នកចាំទីជម្រើសជាតិប្រេស៊ីលពីក្រុមមេឃខៀវ Manchester City ប៉ុន្តែអ្វីៗហាក់មិនទាន់បានសម្រេចបើទោះជាក្លឹបនៅអារ៉ាប៊ីសាអ៊ូឌីតបានអន្ទងតាមរយៈការផ្ដល់ថ្លៃពលកម្មខ្ពស់កប់ពពកក៏ដោយ។ យ៉ាងណាអ្នកចាំទីរបស់ក្រុមជើងឯក English Premier League 2023 ក៏ហាក់មានការចាប់អារម្មណ៍ខ្លះៗដែរ បើទោះជាគេស្ថិតក្នុងជម្រើសដំបូងរបស់លោក Pep រហូតមកក៏ដោយ។

ការតាមប្រមាញ់ពីសំណាក់ក្លឹបអ្នកមានលុយខាងលើអ្នកចាត់ការរបស់មេឃខៀវលើកឡើងទៀតថា លោកសង្ឃឹមថា Ederson នឹងនៅតែសប្បាយចិត្តនៅមេឃខៀវដដែល។ យ៉ាងណាគ្មានអ្នកណាដឹងថានឹងមានរឿងអ្វីកើតឡើងនៅថ្ងៃបន្ទាប់បាននៅទេ បើទោះជាពេលនេះគេនៅជាកីឡាកររបស់ Manchester City ក៏ដោយ ហើយក៏គ្មានអ្នកណាដឹងពីចិត្តកីឡាករនោះដែរថាគេចង់បន្តឬក៏ចង់ចាកចេញនោះ។

គួរបញ្ជាក់ថាកុងត្រារបស់ Ederson Moraes នៅដល់ឆ្នាំ២០២៦ ខណៈអ្នកចាំទីដៃទី២របស់មេឃខៀវបច្ចុប្បន្ន Stefan Ortega មានវ័យ៣១ឆ្នាំទៅហើយ ដូច្នេះវាច្បាស់ណាស់ប្រសិនបើ Ederson ពិតជាចង់ចាកចេញទៅកាន់កន្លែងខ្លាញ់មែន Manchester City នឹងត្រូវស្វែងរកអ្នកចាំទីម្នាក់ទៀតមកជំនួសកន្លែងដ៏សំខាន់នេះ៕