ខេត្តកោះកុង កំពុងត្រៀមខ្លួនសម្រាប់ព្រឹត្តិការណ៍ដ៏សំខាន់មួយ នោះគឺការរៀបចំពិធីបុណ្យថ្នាក់ខេត្តលើកដំបូងរបស់ខ្លួន គឺពិធីបុណ្យ "សាទរ ដែននិរតី" ដែលនឹងប្រព្រឹត្តទៅ ចាប់ពីថ្ងៃទី១០ ដល់ថ្ងៃទី១៥ ខែមិថុនា ឆ្នាំ ២០២៥ នៅក្នុងក្រុង ខេមរភូមិន្ទ។

ខេត្តកោះកុង ស្ថិតនៅតាមបណ្ដោយឆ្នេរសមុទ្រភាគនិរតីដ៏ស្រស់ស្អាតរបស់កម្ពុជា ដែលតែងតែត្រូវបានគេកោតសរសើរចំពោះសម្រស់ធម្មជាតិរបស់ខ្លួន។ ឥឡូវនេះ អាជ្ញាធរមូលដ្ឋានសង្ឃឹមថា ពិធីបុណ្យនេះនឹងជួយឲ្យខេត្តកោះកុង ក្លាយជាគោលដៅទេសចរណ៍ដ៏សំខាន់មួយ តាមរយៈការបង្ហាញនូវទេសភាពធម្មជាតិដ៏សម្បូរបែប វប្បធម៌ចម្រុះ និងស្មារតីសហគមន៍ដ៏កក់ក្តៅរបស់ខ្លួន។

ពិធីបុណ្យរយៈពេលមួយសប្ដាហ៍នេះ នឹងមានសកម្មភាពចម្រុះជាច្រើន រួមមានការប្រគំតន្ត្រីផ្ទាល់ពីសិល្បករខ្មែរល្បីៗ ការប្រកួតកីឡាប្រដាល់គុនខ្មែរបុរាណ និងការប្រកួតប្រជែងច្រៀងទូទាំងខេត្ត។

ភ្ញៀវទេសចរ ក៏អាចភ្លក្សអាហារជាច្រើនប្រភេទនៅក្នុងពិព័រណ៍ម្ហូបអាហារ ចម្រុះជាតិសាសន៍ ទស្សនាសិប្បកម្មក្នុងស្រុកពីសិប្បករ និងអាជីវកម្មខ្នាតតូច និងអុំទូកកាយ៉ាក់តាមបណ្ដោយឆ្នេរសមុទ្រដ៏ស្រស់ស្អាត។ ចំពោះអ្នកដែលចង់ភ្ជាប់ទំនាក់ទំនងកាន់តែជិតស្និទ្ធជាមួយធម្មជាតិ ថែមទាំងអាចបោះជំរំក្រោមពន្លឺផ្កាយទៀតផង។ បន្ថែមពីនេះ ពិធីបុណ្យ "សាទរ ដែននិរតី" នឹងមានព្រឹត្តិការណ៍ជិះកង់មនុស្សធម៌ ដែលចំណូលបានពីការលក់សំបុត្រនឹងយកទៅជួយឧបត្ថម្ភកុមារខ្វះខាត ដែលអ្នករៀបចំកម្មវិធីបាននិយាយថា ជាកិច្ចខិតខំប្រឹងប្រែងឆ្លុះបញ្ចាំងពីតម្លៃសហគមន៍របស់ខេត្ត។

រដ្ឋបាលខេត្តកោះកុង បានឲ្យដឹងថា ពិធីបុណ្យនេះ មិនត្រឹមតែជាការអបអរសាទរមោទនភាពក្នុងស្រុកប៉ុណ្ណោះទេ ប៉ុន្តែក៏ជាជំហានយុទ្ធសាស្ត្រឆ្ពោះទៅរកទេសចរណ៍ប្រកបដោយចីរភាពផងដែរ។ ជាមួយនឹងការរួមបញ្ចូលគ្នានៃការកម្សាន្ត បេតិកភណ្ឌវប្បធម៌ និងភាពទាក់ទាញធម្មជាតិ ព្រឹត្តិការណ៍នេះមានគោលបំណងទាក់ទាញភ្ញៀវទេសចរជាតិ និងអន្តរជាតិ ឲ្យមកស្វែងយល់ពីសក្ដានុពលរបស់ខេត្ត។

ខណៈដែលពិធីបុណ្យត្រៀមនឹងបើកទ្វារ ខេត្តកោះកុង រួចរាល់ហើយដើម្បីបង្ហាញពីភាពលេចធ្លោរបស់ខ្លួន ដោយសូមអញ្ជើញគ្រប់គ្នាឲ្យមកទទួលយកបទពិសោធន៍ដ៏ល្អបំផុតនៃភាគនិរតីនៃប្រទេសកម្ពុជា៕